1 Yaagin Temaana biittaappe yiida Elifaazi hagaadan yaagidi zaariis; 2 “Aadhdhida eranchcha asi carkkodan ohettennabaa haasayii? Woikko arshsho bagga carkkuwaa ba uluwaa coo kunttii? 3 Pattenna woikko maaddenna mootuwaa mootettii? 4 Hegaa gidikko, neeni Xoossaassi yayyiyoogaa guuttadasa; haratikka Xoossaassi goinnennaadan diggaasa. 5 Ne iitatettai ne haasayan erettees; ne cincca haasayai nena genttees. 6 Ne bolli pirddiyai ne doonaappe attin, tana gidikke; ne inxxarssai ne bolli markkattees.

7 “Koiro yelettida asi nenee? Woikko neeni dereti merettanaappe kase yelettadii? 8 Neeni Xoossaa xuura yaa7aa tumu siyadii? Woikko aadhdhida eratettaa ne xalaalai eriyaabaa neeyyo milatii? 9 Nuuni erennabaa neeni eriyoobi aibee? Nuuyyo gelennan aggidi, neeyyo gelidabai aibee? 10 Ne aawaappe bairatiya asati, cimidi puulummida asati nu giddon de7oosona.

11 “Xoossai neeyyo immido minttettoinne nuuni neeyyo ashkketettan haasayido qaalai guutteeyye? 12 Ne wozanai nena aissi wora efii? Ne aifeekka aissi xeelaa dereqqii? 13 Yaatada neeni Xoossaa bolli hanqqettadasa; hegaa mala qaalaakka ne doonaappe kessadasa. 14 Asi Xoossaa sinttan geeshsha gidanau danddayii? Woikko maccaasappe yelettida asi xillo gidanau danddayii? 15 Be7a, Xoossai ba kiitanchchatunkka ammanettenna; harai atto salotikka a sinttan geeshsha gidokkona. 16 SHin ha sheneyiyaanne tunida asi, nagaraakka haattaadan ganiya asi ubba iitaa darennee!

17 “Iyyoobaa, ane siya! Taani neeyyo yootana; taani be7idobaa ubbaa neeyyo odana. 18 Aadhdhida eranchcha asati bantta maizza aawatuppe demmido eratettaa genttennan tana tamaarissidosona. 19 Ha biittai eta xalaalaassi imettiis; hara biittaa asaa timirttee eta giddon walahettibeenna.

20 “Asa huqqunnidi de7iya iita asi, ba de7o laitta ubban tuggi appe shaahettenna. 21 Ubbaton daganttiya cenggurssai a haittan siyettees; i saro de7ais giishin, panggati a bolli yaana. 22 Xumaappe kessi ekkanaagaa i ammanenna; i bisuwau qaadettiis. 23 A ahai ankkuwau quma gidana; baayyo xuma gallassai matattidoogaa i erees. 24 Metoinne tuggai olau kiyida kawuwaadan a daganttana. 25 Aissi giikko, i ba kushiyaa Xoossaa bolli denttiis; Ubbaa Danddayiya Xoossaa bollikka xaliis. 26 Burzzuzzai burzzuzzai kiyi uttido ordde gonddalliyaa oiqqidi, Xoossaa bolli makkaliis.

27 “A som77oi modhdhido gishshau, a xeessaikka boborccido gishshau, 28 i laattidi de7iyo katamatikka olan laalettido gishshaunne i de7iyo keettatikka ooninne de7enna ona gidido gishshau, 29 i ba duretettan daro gam77enna; a aqoikka aara takkenna.

30 “Xumaappe i kessi ekkenna; a tasheta lacoi melissana; a ciishshaakka carkkoi pitti xaissana. 31 Barkka bana cimmiiddi, hadaban ammanettoppo. Ammanettikko, i ekkanabaikka hadabaa. 32 Wodee gakkennan shulliyaanne meli simmidi, naa77antto aacanau danddayenna mittaa mala i gidana. 33 Teerennan wurccuwaara qoqqofettiya woiniyaa malanne ciishshai qoqqofettiyo wogaraa mala i gidana. 34 Xoossaassi yayyenna asatussi zaree xayana; mattaayiyan keexettida keettaakka tamai maana. 35 Eti metuwaa shahaaridi, iitabaa yeloosona; eta uluwankka cimoi kumi uttiis” yaagiis.

<- Iyyooba Maxaafaa 14Iyyooba Maxaafaa 16 ->