15
Muuse Mazamuriyaa
1 He wode Muuseenne Israa7eela asai ha mazamuriyaa GODAAYYO yexxidosona;
“Bonchchuwan i keehi xoqqu xoqqu giido gishshau,
taani GODAAYYO mazamuriyaa yexxana.
Paraanne paraa toggidaagaa abban oliis.
2 GODAI ta wolqqaanne ta mazamuriyaa;
i tana ashshiyaagaa gidiis.
I ta Xoossaa;
taani a sabbana.
I ta aawaa Xoossaa;
taani a xoqqu xoqqu oottana.
3 GODAI olanchcha; a sunttaikka GODAA.
4 Gibxxe kawuwaa para gaaretanne
a olanchchata abban oliis.
Gibxxe kawuwaa halaqati,
ubbaappe aadhdhi lo77iyaageeti Zo7o Abban muukettidosona.
5 Ciimma haattai eta kammiis;
eti shuchchadan ciimman mitettidosona.
6 “Abeet GODAU, ne ushachcha kushee
wolqqan goobidaagaa;
GODAU, ne ushachcha kushee
morkkiyaa mentterettiis.
7 Ne bonchchuwaa gitatettan
nenaara gaaddetidaageeta oladasa.
Ne eexxiya hanqquwaa neeni yeddin,
i eta daladan miis.
8 Ne siiriyaara kiyiya shemppuwan
haattai doorettiis.
Goggiya haattainne godadan minni eqqiis;
ciimma haattati abbaa gomppan irkkidi minnidosona.
9 “Morkkee ceeqettiiddi,
‘Taani eta yedettada oiqqana.
Taani eta aquwaa shaakkada,
ta koyidobaa ubbaa ekkana.
Taani ta bisuwaa shoddada,
eta xaissana’ yaagidi ceeqettiis.
10 SHin neeni eta
ne shemppuwan punnin,
abbai eta kammiis.
Eti wolqqaama haattan irssaasiyaa giyo biratai
mitettiyoogaadan mitettidosona.
11 Abeet GODAU, Xoossatu giddon
ne malai oonee?
Geeshshatettan bonchchettiyaabi,
bonchchuwan yayettiyaabi,
garamiyaabaa oottiyaabi ne malai oonee?
12 Neeni ne ushachcha kushiyaa miccin,
biittai eta mittiis.
13 “Neeni wozido asaa
aggenna ne siiquwan kaalettana.
Neeni ne wolqqan
eta neeni de7iyo geeshsha sohuwaa gelissadasa.
14 Kawotettati hegaa siyidi
kokkoridosona.
Pilisxxeema biittaa asatikka
maareti oiqqidobaadan un77ettidosona.
15 He wode Eedooma biittaa halaqati
dagammidosona.
Moo7aaba biittaa haariyaageeta
yashshai kokkorssiis.
Kanaane asati maashidosona.
16 Dagamainne yashshai eta oiqqiis.
Abeet GODAU, eti ne wolqqaa gitatettaa be7idi,
ne asai aadhdhana gakkanaassi,
neeni wozido asai aadhdhana gakkanaassi,
shuchchadan tolettidi eqqidosona.
17 Neeni eta ehaada,
ne buzo gaden de7iya deriyaa huuphiyan tokkana.
Abeet Godau, he sohoi
neeni neeyyo de7anau oottido soho.
Abeet Godau, he geeshsha sohoi
neeni ne kushiyan minttada essido soho.
18 GODAI merinaappe merinau kawotana”
yaagidi yexxidosona.
Miiriyaami Mazamuriyaa
19 Gibxxe kawuwaa parati, a para gaaretinne a paraasati abban gelido wode, GODAI abbaa haattaa guyye zaaridi eta bolli ehiis; shin Israa7eelati abbaa gidduwaara mela biittaara hemettidi biidosona. 20 Aaroona michchiyaa, hananabaa yootiya Miiriyaama karaabiyaa ekkaasu; maccaasai ubbai karaabiyaa baqqiiddinne yexxiiddi o kaallidosona. 21 Miiriyaama etayyo mazamuriyaa yexxaidda,
“GODAI keehi xoqqu xoqqu giido gishshau,
ayyo yexxite.
Paraanne paraa toggidaagaa
i abban oliis”
yaagada yexxaasu.
Cammiya Haattaa
22 Hegaappe guyyiyan Muusee Israa7eela Zo7o Abbaappe kaalettin, eti Suura giyo bazzuwaa biidosona. He bazzuwan eti haatta demmennan heezzu gallassaa hemettidosona. 23 Eti Maara giyoosaa gakkido wode, Maara haattai camo gidido gishshau, uyana danddayibookkona; hegaa gishshau, he sohoi Maara geetettiis. 24 Hegaa gishshau, asai, “Nuuni ai uyanee?” yaagidi Muuse bolli zuuzummiis.
25 Zuuzummin Muusee GODAAYYO waassiis; waassin GODAI a issi mitta bessiis; Muusee he mittaa haatta giddo olin, haattai mal77iis.
Yan GODAI etau awaajuwaanne higgiyaa kessiis; yan GODAI eta paacciis. 26 I eta hagaadan yaagiis; “GODAI intte Xoossai odiyoobaa minttidi siyikkonne a aifiyaa sinttan likkebaa oottikko, intte a azazuwaa ezggikkonne a awaajuwaa ubbaa naagikko, taani Gibxxetu bolli ehiido harggiyaappe issuwaanne intte bolli ehiikke; aissi giikko, taani inttena pattiya GODAATTENNE” yaagiis.
27 Hegaappe eti Elaama biitti yiidosona; yan tammanne naa77u haatta pulttotinne laappun tammu zambba mittati de7oosona. Eti yan haattaa doonan uttidosona.
<- Kessaabaa 14Kessaabaa 16 ->