APOCALIPSIS 15

Ankje xi yaꞌa kjuanaꞌen xi fetꞌani

1 ꞌBa jaskan tsaꞌbe ngañaa̱ ngankꞌaa kjaꞌe chu̱ba̱ je xi makunna, xi yaku mé= xi ku̱an. Tsaꞌbia̱ yatu ankje xi yaꞌa yatu kjuanaꞌen xi fetꞌani, ꞌba kionga je ku̱an kibiu, je kjuetꞌa kjuasti jere Naꞌenchana.

2 ꞌBa nde tsaꞌbia̱ tsajmi xi matsejen joni jngu ndachikun xi chutsin ni xi tsꞌatjijinkoni ndiꞌi. ꞌBa ngandaire ndachikun chutsiun inyanduju xuta xi kiskjanko tjiubabiu ꞌba kitsaꞌenre. Ngatꞌa bi kitsichjire isenre tjiubabiu ninga bi kitsjaꞌnde nga kisꞌetꞌare numerore jaꞌenre. Kui xutabiu yaꞌa najni arpa xi Naꞌenchana kitsjare. 3 ꞌBa inyase sonre Moisés, jngu xi kitsaꞌexangire Naꞌenchana, ꞌba inyase sonre Kiꞌndi borrego. ꞌBa inyatsu:

Ji Naini̱, Naꞌen xi tseꞌe ngayéje kjuaꞌñu xi tjin,

ꞌñu= yaꞌe xi kjiñeꞌen ꞌba makun=ni.

Kixi ꞌba kjuakixi= ndiya xi tsiji.

Ji=ni reyre nangi xi tjin.

4 Ngatsiꞌi xuta tjinne=re nga sa̱kjunkeri, Naini̱.

Ngatsiꞌi xuta tjinne=re nga sikixiya nga je jaꞌenri.

Ngatꞌa tu ji sani xi tsjekjin.

Ngatsiꞌi xuta xi tjin ngasunꞌndio kjuaꞌe= ngixkuin nga sichjiri,

ngatꞌa je= kjiꞌyare nga kixi ñeꞌen kjua.

5 ꞌBa nga je kuán kibiu, tsaꞌbia̱ nga kichjuꞌi ningu xi kjijña ngankꞌaa, xi bakutsejen nga Naꞌenchana ꞌendako kjua xuta xi tseꞌe. 6 ꞌBa ningu ꞌetjuni ankje xi yatu xi yaꞌa kjuanaꞌen xi yatu. Yaja najñu tiba xi tsje xi tibaꞌna, ꞌba nisinre titsukjare tjiuxinjnde xi oro ni.

7 ꞌBa jngu xi ñujun xi tjindukun kitsjare nga jngu jngu ankje xi yatu jngu nisu xi oro ni xi kitse kjuasti jere Naꞌenchana xi tijñakun kaꞌnda ngantsjai nixtjin. 8 ꞌBa kitse ningu niꞌndi xi jendibanire kjuajere ko kjuaꞌñure Naꞌenchana, ꞌba niꞌyá kuán jaꞌasꞌen ningu ꞌnda nga jetꞌa kjuanaꞌen xi yatu xi yaꞌa ankje xi yatu.

<- APOCALIPSIS 14 APOCALIPSIS 16 ->