1 Nga tifaꞌa Jesús, kio tsabe jngu xuta xi ka ꞌndani nga kitsin. 2 ꞌBa ꞌbatsaꞌen xutare tsiningiyare:

—Maestru —kitsure—, ¿ꞌyá xi tjinre je nga ꞌbatsaꞌen ka kitsinni xutabi? ¿A kui? ¿Asa xichare?

3 ꞌBa Jesús kitsingojore:

—Ninga kui ninga xichare tjinre je. ꞌBa=tsaꞌen kitsin tuxi xiani ngajinre mé= xi mare tsaꞌen Naꞌenchana. 4 Machjen= nga sikꞌetjusan xa xi tseꞌe xi kitsikasenna̱ kionga tsejen ngisaa̱. Ngatꞌa nga je ku̱ajñu, tuꞌyá nde ku̱an saꞌexa ngisani. 5 Yejerañu nga tejñaa̱ ngaꞌe ngasunꞌndebi, an ña̱ ndiꞌi xi tsitsejenre xuta xi tseꞌe ngasunꞌndebi.

6 ꞌBa kionga je ꞌba kitsu, ꞌetia tꞌanangiu ꞌba ko ndatiare ꞌendachi ndasiji, ꞌba kitsikajun tuxkun xuta ko. 7 ꞌBa kitsure:

—Tichunkjain ngaꞌnde ña inya nanda xi Siloé ꞌmi. (Siloé, en xi tsunire: xi kjinikasen.)

ꞌBa xuta ko kikunkjan, ꞌba kionga jendiba ngani, je nda matsejenre yaꞌa. 8 ꞌBa xuta xi ndai ndaba ko xuta xi tsabe nga miꞌa ton kitsure xinkjin:

—¿A bi tsa kui xutabi xi ꞌbejñaꞌin nga miꞌa ton?

9 ꞌBa yakꞌa kitsu:

—Jun, kui.

ꞌBa tjin xi kitsu:

—Bi kui, tunga ꞌba=tsaꞌen matsejen joni kui.

ꞌBa xutabiu kitsure:

—An= ña̱.

10 ꞌBa ꞌbatsaꞌen nchjabiu tsiningiyare:

—¿Jótsaꞌen kitjuꞌingini tuxkuin?

11 ꞌBa kui kitsingojore:

—Xuta xi Jesús ꞌmi kaꞌbenda ndasiji ꞌba katsikajun tuxkuaa̱n ꞌba ꞌbi katsuna̱: “Tichunkjain ngaꞌnde ña inya nanda xi Siloé ꞌmi.” Kui kjuañu kijiña̱ ꞌba kionga je kakunkjaa̱n, kamatsejenna̱ yaꞌaniñu.

12 ꞌBa ꞌbatsaꞌen nchjabiu tsiningiyare:

—¿Ñá tijña xutabiu nde?

—Bi ꞌbia̱ —kitsu xutabiu.

13 ꞌBa ꞌbatsaꞌen nchjabiu ngixkun xuta fariseo kiko xuta xi je kuatsejenre. 14 ꞌBa nixtjin nga ꞌenda ndasiji Jesús ꞌba nga tsixꞌangi tuxkun xutabiu, nixtjin nga nikjaꞌaya= ngatꞌa xutu= nixtjinbiu. 15 Kui kjuañu xuta fariseo tsiningiyanire jótsaꞌen kuatsejenre. ꞌBa xutabiu kitsu:

—Ndasiji katsikajun tuxkuaa̱n, ꞌba kakunkjaa̱n ꞌba kamatsejenna̱.

16 ꞌBa ꞌbatsaꞌen yakꞌa nchja fariseo kitsu:

—Bi Naꞌenchana kitsikasen xuta xi ꞌbi katsaꞌen, ngatꞌa bi bekun nixtjin nga nikjaꞌaya.

ꞌBa tjin xi kitsu:

—¿Jótsaꞌen jngu xuta xi tjinre je ku̱an saꞌen kjuakun joni kibi?

ꞌBa ꞌbatsaꞌen tsakjanya xuta fariseo ngatꞌare Jesús. 17 ꞌBa ꞌbatsaꞌen tsiningiya nganire xuta xi saꞌe fa kuatsejenre:

—ꞌBa ji xi kitjuꞌingi tuxkuin, ¿jó sji ngatꞌare xutabiu? —kitsure.

ꞌBa kui kitsingojore:

—Jngu profeta kui.

18 Tunga xuta judío bi kuakjainre tsa kui xutabiu xi ka kuánꞌin tsakaiñu, ꞌba tsa kui xi je matsejen nganire. Kui kjuañu kinchjanire xichare 19 ꞌba tsiningiyare:

—¿A kui kiꞌndinu kibi xi ꞌmi_ru nga ka nga kitsin? ꞌBa ¿jótsaꞌen nga je kuatsejenre nde?

20 ꞌBa xichare kitsingojore:

—ꞌYa=ni̱ nga kui xi kiꞌndini̱ ꞌba nga ka nga kitsin. 21 Tunga bi ꞌyee̱ jótsaꞌen kuatsejen nganire, ꞌba bi ꞌyee̱ ꞌyá xi kakjexꞌangi tuxkun. Tusa kui chjaningiya_ru. Je chinga. Ku̱an kui kueꞌesubanu nijmi ngatꞌa tseꞌe.

22 ꞌBi kitsu xichare xutabiu ngatꞌa tsakjunke xuta judío. Ngatꞌa xuta judío jaꞌba je ꞌendakokjua xinkjin tsa tjin xi sikixiya nga Jesús= xi Cristo, kui= xi kjuiꞌnaxje niꞌya sinagoga. 23 Kui kjuañu xichare xutabiu kitsuni: “Chjaningiya_ru. Je chinga.”

24 ꞌBa ꞌbatsaꞌen xuta judío kinchja nganire xi majóni ndiya xuta xi je kuatsejenre ꞌba kitsure:

—Tikixiye nga Naꞌenchana xi tjinre kjuaje. Ji̱n ꞌya=ni nga kui xutabiu jngu xuta xi tjinre je.

25 ꞌBa xutabiu kitsingojo:

—Tsa jngu xuta xi tjinre je kui, bi ꞌbia̱. Tu kui sani xi ꞌbia̱, nga an xi kaꞌia̱n tsakaiñu, tunga ngandaꞌe je matsejen nganina̱.

26 ꞌBa nchjabiu kitsu nganire:

—¿Jó katsikori? ¿Jótsaꞌen kakjexꞌangi tuxkuin?

27 ꞌBa kui kitsingojore:

—Je yeꞌe_nuu̱ nijmi, tunga bi tebatesinnuu̱. ¿Ánñu mejénninu nga ꞌba xin ngani_nuu̱? ¿A mejénnú kuon xutare xutabiu ngayeje?

28 ꞌBa nchjabiu jatiko ꞌba kitsure:

—Ji xi xutare xutabiu kuáin. Tunga ji̱n xutare Moisés kuái̱n. 29 ꞌYa=ni̱ nga Moisés kinchja en xi Naꞌenchana kitsuyare, tunga bi ꞌyee̱ ñá= jendibani xutabiu.

30 ꞌBa xutabiu kitsingojore:

—Ngu, tu ꞌba= mana̱ nga bi ꞌyo ñá jendibani xutabiu, tunga kiskjeꞌingi tuxkuaa̱n an. 31 ꞌYaña nga Naꞌenchana bi basen ñojonre xuta xi tjinre je. Tu kui sani xi bekun ꞌba tsaꞌen mé= xi mejénre Naꞌenchana, kui= xi basen ñojonre. 32 Nisañajanni nuꞌyare tsa tjin xi kjexꞌangi tuxkun xuta xi ka ꞌndani nga kitsin. 33 Tsa bi Naꞌenchana kitsikasen xutabiu, tumé ku̱an saꞌen.

34 ꞌBa nchjabiu kitsure:

—Ji= xi ngajinre je kitsin. ¿A ji kuakuyanii̱?

ꞌBa tsꞌaxje niꞌya sinagoga.

35 ꞌBa ꞌbatsaꞌen Jesús kjintꞌe nga kjiꞌnaxje xutabiu, ꞌba kionga kisatejin ngani ꞌbi kitsure:

—¿A makjainri ji ngatꞌare Kiꞌndire Xuta xiꞌiun?

36 ꞌBa xutabiu kitsingojore:

—Naꞌen, ¿ꞌyá= niñu, tuxi ku̱akjainnina̱ ngatꞌare?

37 ꞌBa Jesús kitsure:

—Je= kjiꞌye. Kui= ña̱ an xi techuba nijmikue.

38 ꞌBa ꞌbatsaꞌen xutabiu tsakasenkunchꞌintꞌare Jesús ꞌba kitsure:

—Makjainna̱, Naꞌen.

39 ꞌBa ꞌbatsaꞌen Jesús kitsu:

—An jaꞌe=ña̱ ngasunꞌndebi tuxi ku̱anni kjua, ꞌba tuxi ku̱atsejennire xi ka ꞌba nga ku̱aka xi matsejenre.

40 ꞌBa yakꞌa xuta fariseo xi inyako Jesús kjintꞌe enbi ꞌba tsiningiyare:

—¿A ko ji̱n xi kai̱?

41 ꞌBa Jesús kitsingojore:

—Tsa jun xi ko, bi sꞌe̱nu je. Tunga jun teꞌminuu̱ nga matsejennu. Kui= kjuañu tjinninu je.

<- SAN JUAN 8SAN JUAN 10 ->