—Jun ntsꞌia̱ —kitsure—, an ña̱ jngu fariseo ꞌba nde xichana̱ nchja fariseo kuán. Tjiñaꞌan=na̱ kjua ngatꞌa tekuyaa̱ nga kjuaꞌaya nganire xuta ngajinre mikꞌen.

7 Kionga ꞌba kitsu Pablo, nchja fariseo ko nchja saduceo ꞌetutsꞌinre nga josiko xinkjin. Yakjanya yojore nchja xi kio kuañajan. 8 Ngatꞌa nchja saduceo tsu nga bi nde kjuaꞌayanire xuta ngajinre mikꞌen ꞌba nga bi tjin ankjele ninga isennixtjin. ꞌBa tunga nchja fariseo makjain yejere ngatꞌare kibiu. 9 ꞌBa ngatsiꞌi ꞌñu kiskiꞌndaya. ꞌBa ꞌbatsaꞌen yakꞌa nchja chjine kjuatexuma xi mako nchja fariseo tsisetjen ꞌba ꞌñu kinchja:

—Tumé xi chꞌo tjin tisakuni̱ ngatꞌare xutabi —kitsu—. ¿ꞌBaá ku̱an tsa jngu isennixtjin asa jngu ankje jako?

10 Kionga je ngisa ꞌñu josiko xinkjin nchjabiu, kitsakjun xi ngakure chasoldadu romano tsa nchjabiu sixi Pablo. Kui kjuañu ꞌexani nga chasoldadu kꞌuaxjejinni Pablo ngajinre nchjabiu ꞌba kueko ngani ña ꞌbendu chasoldadu.

11 ꞌBa nistjen nga kuanyujun Naꞌenna Jesús kuatsejenre Pablo.

—Ngatꞌetsjare takuin —kitsure—. Ngatꞌa jofatsaꞌen tenikixiye ngatꞌana̱ ngaꞌe naxinanda Jerusalén, ꞌba fa nde tsaꞌen tjinnere nga kꞌuinikjaꞌaxtiuye ngatꞌana̱ naxinanda Roma.

12 Nga kuanyujun yakꞌa nchja judío joyare ꞌba ꞌendako kjua xinkjin ꞌba kitsja tsꞌa nga Naꞌenchana ngatatsjare kjuanaꞌen tsa skine niñu asa kꞌui nanda tsa kje tsikꞌenjín Pablo. 13 Maru tsꞌaxtiu yachan nchja xi ꞌbatsaꞌen joyataꞌen Pablo. 14 ꞌBa ꞌbatsaꞌen nchjabiu jaꞌekun nchja ngakure naꞌmiu ko nchja chingare naxinando ꞌba ꞌbi kitsure:

—Kikꞌendakue̱ kjua xingii̱ ꞌba kikaꞌee̱ ndsuꞌbai̱ nga Naꞌenchana ngatatsjani̱ kjuanaꞌen tsa xinee̱ niñu asa sꞌii̱ nanda tsa kje nikꞌenjíi̱n Pablo. 15 Kui kjuañu ngandaꞌe jun ko nchjaxa xi yakꞌa chjaꞌani_ru xi ngakure chasoldadu nga ngatjaꞌeko Pablo nyujunni, ngaꞌe ngixkún. Tꞌin_ru nga mejénnú ngisa nda xio kjuare. ꞌBa ji̱n kuetsubandai̱ nga sikꞌen kionga kje faꞌejíi̱n —kitsu nchjabiu.

16 Tunga kiꞌndire ndichja Pablo kjintꞌe en xi joyaꞌmore nchjabiu. ꞌBa ꞌbatsaꞌen jaꞌasꞌen ña ꞌbendu chasoldadu nga kikeꞌere nijmi Pablo. 17 ꞌBa Pablo kinchjare jngu chasoldadu xi kio tsikuenda ꞌba kitsure:

—Tꞌiko_ri chiꞌndibi xi ngakunu, ngatꞌa tjin= en xi kuetsure.

18 Kui kjuañu chasoldadu kikoni chiꞌndibiu ña tijña xi ngakure.

—Xuta xi tijña nduya xi Pablo ꞌmi kinchjana̱ ꞌba tsiꞌana̱ nga kjuaꞌekua̱ ngaꞌe ngixkuin kui chiꞌndibi —kitsu chasoldadubiu—. Tjinxu jngu en xi kuetsuri.

19 ꞌBa ꞌbatsaꞌen xi ngakure chasoldadu kiskjebe ntsja chiꞌndibiu ꞌba tsiningiyatꞌaxinre:

—¿Mé= en xi mejénri kꞌuinnaa̱? —kitsure.

20 ꞌBa chiꞌindibiu kitsure:

—Nchja judío je joyare nga skuiꞌari nga kꞌuikue Pablo nyujunni ngixkun nchjaxo. Kuetsuxuri nga ngisa nda mejénre skue kjuare Pablo. 21 Tunga bi ngatamakjainri kibiu, ngatꞌa inyakuyaꞌmo tsꞌaxtiu yachan nchja xi mejénre sikꞌen Pablo. ꞌBa je kitsja tsꞌa nga Naꞌenchana ngatatsjare kjuanaꞌen tsa skinexu niñu asa kꞌuixu nanda tsa kje tsikꞌenjín Pablo. Je tjindunda ngandaꞌe nga inyakuyare mé= xi sji ji —kitsu.

22 ꞌBa ꞌbatsaꞌen xi ngakure chasoldadu kitsikixantꞌa chiꞌindibiu.

—Tuꞌyá ꞌbe_ri nijmi mé= xi kikꞌinnaa̱ —kitsure.

23 ꞌBa ꞌbatsaꞌen xi ngakure chasoldadu kinchjare jó chasoldadu xi batexumare jngu jngu sientu ꞌba kitsure:

—Tꞌendundo jó sientu chasoldadu xi kuaje ndsaku=ni, yachute ko kan xi kꞌuendukjare chakabayu ꞌba jó sientu xi kuaꞌa lanza, tuxi kuajeni naxinanda Cesarea chu̱ba̱ ñajan ngajñu. 24 ꞌBa nde tinyando chakabayu xi kꞌuejñakjare Pablo. Tanginko tuxi nda kjuechuni ngixkun xuta titjun Félix.

25 ꞌBa ꞌbatsaꞌen xi ngakure chasoldadu kitsinda jngu xujun ꞌba ꞌbitsaꞌen kitsiꞌindu:

26 “Claudio Lisias titsikasenri kjuateꞌnda xuta titjun Félix. 27 Kui xutabi xi tetsikasenra̱ ngaꞌe, kui xi nchja judío kitsuba ꞌba kuamejénre kitsikꞌen. Tunga kionga kjintꞌia̱ nga xuta romano= nini, ꞌba tsaꞌen kikua̱ chasoldaduna̱ ꞌba tsꞌaxjejia̱n ngajinre nchjabiu. 28 ꞌBa kitsikasia̱n xutabi ngixkun xutaxa judío, ngatꞌa kuamejénna̱ skuia̱ mé= kjuañu inyabangini. 29 ꞌBa tsaꞌbia̱ nga inyabangi ngatꞌare mé= xi kuaꞌindutꞌa kjuatexumare nchjabiu ꞌba tumé xi kichaninejere xutabi bakinre nga kueya ꞌba ninga tsa nduya kꞌuejña. 30 Tunga kjintꞌia̱ en nga nchja judío joyaꞌmore nga sikꞌen. Kui kjuañu taꞌa kitsikasennira̱. ꞌBa nde je kixin_ra̱ nchja xi inyabangi nga tjinnere nga ngixkuin kuetsu mé= xi tjinkore xutabi.”

31 ꞌBa ꞌbatsaꞌen chasoldadu kiko Pablo ngajñu naxinanda xi Antípatris ꞌmi jotsaꞌen kisꞌexare. 32 Nga kuanyujun chasoldadu xi kiji ndsaku=ni jaꞌe ngani ña ꞌbendu. Tu kui xi tjindukjare chakabayu kiko ngisa Pablo. 33 Kionga echu naxinanda Cesarea, kitsjare xujunbiu xuta titjun ꞌba nde kitsingantsja Pablo ngayeje. 34 Kionga je ꞌexkiya xujunbiu, xuta titjunbiu tsiningiyare Pablo ñá=ñu jendibani. ꞌBa kionga kjintꞌe nga nangi Cilicia tseꞌe, 35 ꞌbi kitsure:

—Kionga kjuaꞌe nchja xi inyabangiri, kuasen ñojonra̱.

ꞌBa jaskan ꞌexa nga ku̱akuenda Pablo niꞌya masenre Herodes.

<- HECHOS 22HECHOS 24 ->