1 Ho natukweyao, hida yaku nuwanuwa agaimiya gaꞋetoladina be keke dewa koyona wanafaisewani faꞋina. Tu kaꞋi tamo hakwadi agaideya unakoyo digo, ada Toveluga gimimiyami, Bana Yesu Keliso Toyegayegana-moꞋa, ada tova moyaꞋaina yana gahe againe Tamada matane gilulugolegoleda. 2 E, Bana Tauna giꞋalika higa yada koyona ana laufata Bana giyawelina be Yaubada yana ilaꞋa ginahavaina faꞋina, tu keke ideꞋeyaogaga yada koyona ana laufata au tomiyababi moyaꞋaida yada koyona ana laufata faꞋina giꞋalika.

3 Atu kaꞋi Yaubada yana vehimeya kaꞋitaꞋitaveꞋavina o, ide adafaiweya kanagahe kanagayo, “Wona velemona Yaubada gahalamanena.” 4 Hai kaliva hidedemi ugahe, vaita o Yaubada uhalamanena tu yana vehimeya udibudibutoyogena, au oꞋeni tofwaya, nuwanuwa velemoꞋena keke aseꞋaseniya gidadauda. 5 Tu hai kaliva Yaubada bonana uꞋabiꞋabina, medema ya nuwanuwa Yaubada againe use-Ꞌowona. Ide Yaubada buye kaveꞋatutamoꞋaida ma gavaiyaꞋamine kanahalamaneni velemoꞋena? KaꞋi Bana bonana kaꞋabiꞋabina o, ide Yaubada againe kamiyaveꞋavina. 6 E, hai kaliva gigahe gigayo, “Iya Yaubada buye aveꞋatutamoꞋaima,” medema gilubodana be Yesu Keliso gihuluva amine, kadu gidahuluhuluva. [a] [b]

7 Tobohiyakweyao, keke vehimeya ivaguna faꞋina gadaꞋetoladi, keke. Au vehimeya tuwaina faꞋina gaꞋetoladi, medema boi tuwaina wavebutu wavetumagana ana toveya wavaina. E, vehimeya tuwaina mena bana higa venuwaꞋata tuwaina ahe wanogalina. 8 Tu hida vehimeyai-nadi ma vaita ivaguna, faꞋina mahalina velemoꞋena gilakalakata be gitutuvemahalida againe uyuyu ana tova gihavahavaina. Ada vehimeya ivaguna bana au velemoꞋena ma Keliso giseyemaunena, kadu omi yami huluva againe waseyemaunena.

9 Hai kaliva gigayo, “Iya mahalina againe gamimiyami,” tu tobohiyana saꞋeyana againe ginuwanuwakoyo, au medema aimo uyuyu againe gimimiyami. 10 Hai kaliva tobohiyana faꞋina ginuwanuwa lakahina medema mahalina againe gimimiyami, ada keke tamo gavadi aseꞋasene gidadauda-yo ginatutumadumadu-yo koyona againe ginabeꞋu, faꞋina mahalina bana yana eda gitutuvemahalina. 11 Tu hai kaliva tobohiyana againe ginuwanuwakoyo, medema uyuyu againe gimimiyami kadu uyuyu againe ginunudadana, ada eda tunutunugina ginufaniyena faꞋina matana giꞋuyuyuna.

12 Natukweyao, omi tovetumagana ma agaimiya gaꞋetoladi, faꞋina Yesu Keliso yana alika againe Yaubada yami koyona giyawelina. 13 Kadu kamakweyao, omi agaimiya gaꞋetoladi faꞋina BanaꞋe boi tuwai-moꞋena babi ana abaveꞋinuba againe gimiyamiya-vagata ma wahalamanena. Kadu kaikweyao, omi agaimiya gaꞋetoladi faꞋina kaliva koyona Setani againe walugaviya be wafaiwalahegehegena. 14 Kadu natukweyao, omi agaimiya ahe gaꞋetoladi faꞋina Tamada wahalamanena. Kadu kamakweyao, omi agaimiya a gaꞋetoladi faꞋina BanaꞋe boi tuwai-moꞋena babi ana abaveꞋinuba againe gimiyamiya-vagata amanadi wahalamanena. Kadu kaikweyao, omi agaimiya a gaꞋetoladi faꞋina aseꞋasemiya wafifaiwala, ada Yaubada bonana aseꞋasemiya gidadauda, ada Setani againe walugaviya be wafaiwalahegehegena. [c] [d]

15 Tu keke wanahawahegemi be hida babi ana nuwanuwa againe nuwami wanaseni. Kadu keke babi ana kikaiwabu againe nuwami wanaseni. KaꞋi babi ana nuwanuwa nuwami givaina digo, keke yami nuwanuwa Tamada againe wadaseni. 16 WaꞋita, gavadi gavadi moyaꞋaina babi againe hiveꞋinuba, medema inubadi keke Tamada againe, higa kaliva dibudi koyona ana nuwanuwa itaꞋitaluvadigana, kadu gavadi gavadi faꞋidiya matadi itadawadawanina kadu gavadi moyaꞋaina faꞋina taudiyao adi egana hikikilakahina. Mena gaitomai-dina inubadi ma keke Tamada againe, au hida babi againe hiveꞋinuba. 17 Kadu hida babi ana nuwanuwa gihavahavaina, kadu gaitoma moyaꞋaina tomiyababi hiꞋitaꞋitaluvadigena-ma gihavahavaina tu hai kaliva Yaubada yana nuwanuwa gidibudibumuhigena, medema ginamiyamiya-vagata. [e]

18 Natukweyao, hida tova ana lauyabu giluvedaꞋufo-moꞋa. Hidema tovai-nadi Keliso Nibaina Lakahina ginalakayemu ma ahe wanogalina, ada au Keliso nibaineyao higa kelisofwayafwaya moyaꞋaidi ahe hilakayemu. Badi nibaineyao ahe hilakayemu faꞋina, hida tova ana lauyabu giluvedaꞋufo ma kahalamanena. 19 Hida kalivai-dina keke velemoꞋena ide tovetumagana yada yoꞋo kalivadi, ada hidema faꞋina himaduvehaileda. KaꞋi badi velemoꞋena yada yoꞋo kalivadi digo, badi ide buye aimo kadamiyami. Tu badi a hina, faꞋina ide kahalamane-hagihagiyena badi moyaꞋaidi keke yada yoꞋo kalivadi.

20 Tu Kaliva Mahamahalina higa Keliso Bana AluꞋaluwa Mahalina omi agaimiya gihawahegena be givemagami, ada hidema faꞋina omi moyaꞋaimi nuwanuwa velemoꞋena wahalamanena. 21 Tu hida leta ma keke vaita nuwanuwa velemoꞋena wadafaniyeni faꞋina gadaꞋetoladini, keke. GaꞋetoladi faꞋina makewa omi nuwanuwa velemoꞋena wahalamanena, kadu keke tamo fwaya Yaubada yana nuwanuwa velemoꞋena againe gidaveꞋinuba ma wahalamanena. 22 Tu hakwaꞋadi ma tofwaya? Hai kaliva saꞋeyana yoꞋo hinafadiya Yesu faꞋine ginagahe ginagayo, “Yesu keke Keliso Yaubada yana Tovegida amanadi,” medema kalivai-nadi tofwaya, ada bana hidevama ana egana Keliso Nibaina Lakahina. E, Tamada kadu Natuna buye inubadi gikilowena higa vaita Yesu Keliso Tamana mali kaliva, keke Yaubada. 23 Gaveyao Yaubada Natuna inubana hikilowena, medema agaidiya keke Tamada gidamiyami. Tu gaveyao hinagahe hinagayo, “Yesu Bana Yaubada Natuna,” medema agaidiya Tamada gimimiyami. [f] [g]

24 Tu omiꞋiyao ma wanaꞋitaveꞋavimi be bona boi tuwaina wavebutu wavetumagana againe wanogalina amanadi nuwahinagemiya ginaduva-vagata. KaꞋi mena bonai-nadi boi tuwaina wanogalina-ma aseꞋasemiya ginadauda, au Tamada againe kadu Natuna againe wanamiyamiyaveꞋavina tova moyaꞋaina. 25 Ada Keliso Tauna ide agaideya giwonadabadaba gigayo, “Yawai-vagahimi ganavelemi.”

26 Au hida Keliso nibaineyao yadi vehawala faꞋina gaꞋetoladi be badi nuwanuwadi yadi fwaya againe hinanuwaꞋabiyemi amanadi yadi dewa faꞋina ganavenuwaꞋatami. 27 Tu omiꞋiyao ma Keliso AluꞋaluwa Mahalina agaimiya gihawahegena be givemagami, ada Tauna nuwahinagemiya gimimiyami tova moyaꞋaina. Au ami vehawala faꞋina keke mali kaliva gidalubodami. Bana anakaibe ami tovehawala velemoꞋena, nuwanuwa moyaꞋaina givehavehawalemi, ada yana vehawala keke fwaya, au velemoꞋena. Ada au AluꞋaluwa Mahalina givehawalemi amine, Keliso againe wanamiyaveꞋavina.

28 E, natukweyao, Bana againe wanamiyaveꞋavina be higa ginayewaꞋela ana toveya keke kanamatauta faꞋina, kadu keke yada wawowomumu kanaveuyeni. 29 Au Keliso Bana yegayega-moꞋena ma wahalamanena. Kadu anafaiweya gaveyao yadi dewa yegayegana, medema Yaubada natuneyao. Au hidedemi amifaiweya wanahalamanena. [h]

<- 1 YONI 11 YONI 3 ->