1 Lelo, Boasi nakaluta honhu ha nhing'hano, ako kuli lwizi lwa muji nakekalisa hanyi. Hamba yula mng'holoze wa habehi ng'hatu wa Elimeleki, yawele Boasi yamtajile, nakakola habehi na aho. Boasi nakamchema, nakalonga, “Uye, wikalise hano mng'holozangu.” Lelo ayo munhu nakoya na kikalisa aho. 2 Boasi nakawachema wasekulu kumi wa muji, nakawalanda wekalise aho. Nawekalisa. 3 Boasi nakamlonjela yula mng'holoze, “Lelo Naomi, yahiluche kulawa Moabu, kangugana kuguza honhu hawele nahali ha mng'holozetu Elimeleki. 4 Lelo heni mbona fola ndikulonjele mbuli ayi. Lelo wone kwangugana honhu aho, ulavye sendi kwa kuhagombola hali wasekulu wa wanhu wa heni. Wone kwangugana ama hambe ugane ulonje, kwa vila mumhu wa kuhagombola ndo wa hegwe, heni nda wa keli.” Yula mng'holoze nakedichila, “Heni ndohagombola.”

5 Boasi nakalonga, “Inoga, wone uhagombole honhu aho kulawa kwa Naomi, lelo umhole kahi Luti Mmoabu, yafililwe na mlume wa heye, leka itagwa lya yabagame na uhalizi wa heye vipone kuli ivyazi lya heye.” 6 Lelo yula nakedichila, “Wone iwe ahyo, siweza kuhagombola honhu aho, kwa vila wana wa heni hawohalila. Fola hachi ya heni ya kuhagombola ndikupe hegwe, mina heni siweza kuhagombola.” 7 Mazuwa gala, kuli Isilaeli, wone wanhu nawali wogana kugombola ama kiholela vinhu, nachali chihendo kwa wanhu kulajila ulajilo kwa kuvula ikwamba lya heye na kumha yunji. Kwa ulajilo awo Waisilaeli nawalajila kota mbuli nazitawizwa.

8 Lelo, munhu ayo navyoyamlonjele Boasi, “Uhagombole hegwe honhu aho,” hamba nakavula ikwamba lya heye kwa chiwalo cha kumha. 9 Naye Boasi nakawalonjela wala wasekulu na wanhu weng'ha, “Lehano hemwe ndo mwa walolezi wa heni. Mona kota ngombola kulawila kwa Naomi, vyeng'ha viwele vya Elimeleki na vya Kilioni na vya Maloni. 10 Mzidi wa ago, ndimgombola Luti Mmoabu yafililwe na Maloni, leka yawe mchewangu. Kikundiza aku kodita uhalizi wa ayo yabagame upone kuli ivyazi lya heye na itagwa lya heye lilutilile kuli lukolo lwa heye na muji wa heye. Hemwe mwa walolezi.”

11 Lelo wasekulu wawele hali lwizi na wanhu weng'ha wawele aho nawedichila, “Ena, hetwe twa walolezi. Mkulu Nguluwi yamdite mchewako yawe kota Laheli na Lea, wawele weng'ha weli nawampondela wana wenji Yakobo. Nagwe uwe na lufufu kuli wanhu wa Efulata, uwe uzeleche kuli Betelehemu. 12 Kwa kukolela wana wawele Mkulu Nguluwi kokupa, kulawa kwa mdala ayu, ivyazi lya hegwe liwhane na ivyazi lya Pelesi, liwele Tamali nakampondela Yuda.”

13 Ahyo, Boasi nakamhola Luti, nakawa mchewake na kawasa na heye. Mkulu Nguluwi nakamtambichiza Luti nakawa na himila, nakaponda mwana mlume. 14 Wadala wa muji awo nawamlonjela Naomi, “Yatogoligwe Mkulu Nguluwi yawele hakulechile lehano ne kuwa na mzukulu wa kukulolela hegwe, naye yawe yazeleche ng'hatu kuli Isilaeli. 15 Heye kokuhilusila ukomu wa hegwe na kukulolela mbaka kuli kulala kwa hegwe. Mina mkweyo yalingukugana na yawele mtanzi wa hegwe ng'hatu kusinda wana walume saba, ndo yampondile.” 16 Lelo Naomi nakamhola ayo mwana nakamuwika mmahaza ga heye na kumlolela.

17 Wadala wawele habehi nawamchema mwana ayo Obedi wolonga, “Mwana nakapondigwa kwa chiwalo cha Naomi.” Aho ndo Obedi nakawa mhaza wa Yese, yawele mhaza wa Daudi.

18 Hino ndo vyoluwele lulelo lwa Pelesi. Pelesi nakamponda Hesiloni. 19 Hesiloni nakawa mhaza wa Lami, Lami nakawa mhaza wa Aminadabu, 20 Aminadabu nakawa mhaza wa Nahishoni, Nashoni nakawa mhaza wa Salimoni, 21 Salimoni nakawa mhaza wa Boasi, Boasi nakawa mhaza wa Obedi, 22 Obedi nakawa mhaza wa Yese, Yese nakawa mhaza wa Daudi.

<- Luti 3