1 Mkulu Nguluwi Yawele na Mong'ho kanguwalonjela hino watambika, “Lelo malajizo aga ndo kwa chiwalo cha hemwe watambika. 2 Mwanguganigwa kuleka kulibeza itagwa lya heni, wone hamnyhulichiza, ndowapanjila, ndoupanjila utambichizo wa hemwe. Ena, nandiupanjila kwa vila hamlingugawinza malajizo ga heni. 3 Lole, ndowagaza wana wa hemwe na kubakaliza midohe ja migongolo ja hemwe ja nhambiko kumeho kwa hemwe. Ndowawinga leka muwe kutali na heni. 4 Ahyo movizela kota nandiwapa hemwe mzilo awu leka ilagano lya heni na nhanzi ya Lawi likale mhela winji. Heni Mkulu Nguluwi Mbele na Mong'ho, nandonga.

5 “Kuli ilagano alyo, nandilagana na hewo kota wowa na ukomu na kikala goya, nani nandiwapa geng'ha, leka wandumbe na kunyhulichiza, nawo nawandumba na kulidumba itagwa lya heni. 6 Malanguso ga hewo nagali ga kukomya na hawalanguse udesi. Heni na hewo natikala kwa kikala goya. Haiwele kota nawadita hachi hela, ila nawawalangusa wanji kuleka kudita gehile. 7 Watambika wanguganigwa kuwalangusa wanhu uwanzi wa kukomya kuwala Nguluwi. Wanhu walutilile kilangusa gondilingugana kwa hewo, kwa vila watambika ndo wasenga wa Mkulu Nguluwi Yawele na Mong'ho.

8 “Ila hemwe watambika namgalamka na kuileka nzila ya hachi. Malanguso ga hemwe nagawalongoza wanhu wenji kuli kudita gehile. Namlibena ilagano lyondiliditile na hemwe. Heni Mkulu Nguluwi Mbele na Mong'ho, nandonga. 9 Lelo nandiwambuza mbezigwe na kuditigwa mdeule hali wanhu weng'ha, kwa vila hamziwinzile nzila za heni, ila namlajila uganililo kuli mbuli za malajizo.”

10 Ndaze, hetwe tweng'ha hatuwele wana wa mhaza yumwe? Ndaze, hetwe tweng'ha hatulumbigwe na Nguluwi yumwe? Lekachoni lelo twangihada twetwe kwa kulibeza ilagano lya Mkulu Nguluwi lyoyaliditile na wasekulu wa hetwe? 11 Wanhu wa Yuda wahela makundo kwa Nguluwi na kudita izudizo kuli Isilaeli na kuli muji wa Yelusalemu. Nawaidita ng'handa ya Mkulu Nguluwi yalinguigana ibezigwe. Kahi nawawahesa wadala walingujifugamila milungu. 12 Mkulu Nguluwi yawose kulawa kuli walelwa wa Yakobo wanhu walingudita mbuli ayo. Iwe kota ahyo mbaka howowa wolavya nhambiko hali Mkulu Nguluwi Yawele na Mong'ho.

13 Mzidi wa ago geng'ha, mwanguhagubika honhu ha kulavila nhambiko ha Mkulu Nguluwi kwa mahozi ga hemwe, mwangulila na kulombocheza kwa vila halinguzigana kahi nhambiko zomlingumlavila. 14 Mwanguuza, “Lekachoni halinguzikunda?” Mkulu Nguluwi halinguzikunda kwa vila kanguvizela hazelu kota nakulibena ilagano lya hegwe kwa mche wa usongolo wa hegwe. Hauwele wa kukundigwa kwa heye hanga nakulagana hali Nguluwi kota wahawele wa kukundigwa kwa heye. 15 Ndaze, Nguluwi hawaditile mweng'ha weli muwe lukuli lumwe na muhe yumwe? Ndaze, nayali yonuwila choni vyoyagaditile ago? Ndikomya nayali yonuwila hemwe mponde wana wawele womdumba heye. Ahyo milolele leka hawe haduhu ne yumwe hali hemwe yawele kowa kahela makundo kwa mche wake. 16 Mkulu Nguluwi, Nguluwi wa Isilaeli kangulonga, “Ndanguizudila kalatasi ya luleko. Ndanguzudila wone yumwe wa hemwe kangumditila vibi mche wake. Milolele leka hawe haduhu ne yumwe hali hemwe yawele kowa kahela makundo kwa mche wake. Heni Mkulu Nguluwi Mbele na Mong'ho, nandonga.”

17 Namumtunya Mkulu Nguluwi kwa ulonzi wa hemwe. Namwe mwanguuza, “Natumtunya ndaze?” Namumtunya vyomlonjile, “Mkulu Nguluwi kanguwona kota wanhu walingudita gehile ndo wanoga na kanguwagana.” Ama homuuza, “Ka kohi yula Nguluwi yawele na hachi?”

<- Malachi 1Malachi 3 ->