1 Lwizi lwa kwinjilila kuli muji wa Yeliko nalwali luhindigwe nzinzili kuwalemeza Waisilaeli waleche kwinjila. Kuduhuli munhu yoweza kwinjila ne kulawa kuli muji awo. 2 Mkulu Nguluwi nakamlonjela Yoshua, “Ulole! Heni ndouwika mmoko wa hegwe muji wa Yeliko hamwe na mndewa wa heye na wamizi wake wawele na mong'ho. 3 Hegwe na wala wamizi weng'ha mouzunguluta awo muji mala imwe chila zuwa kwa mazuwa sita. 4 Watambika saba, chila yumwe yawele yaholile mhalamhanda ya heye ya mbalati ya ing'holo ilume, wolongola kumwando kwa isanduku lya ilagano. Kuli zuwa lya saba mouzunguluta muji awo mala saba, aku watambika wopemba mhalamhanda. 5 Vyowopemba mhalamhanda azo kwa kulandula lizi kwa kulutilila na baho du vyomhulika alyo lizi, wanhu weng'ha wotowa iyowe, alo lukanzi lwa muji logwa. Aho ndo wanhu wouvaba muji chila yumwe kulawa honhu hoyemile.”

6 Lelo Yoshua, mwana wa Nuni, nakawachema watambika, nakawalonjela, “Mlipiche isanduku lya ilagano lya Mkulu Nguluwi na watambika saba wahole mbalati saba za ming'holo milume, walongole kumwando kwa isanduku alyo.” 7 Yoshua nakawalonjela wanhu, “Mlute kumwando, muuzungulute muji na awo wanhu wawichigwe goya kitowa ngondo walute kumwando kwa isanduku lya ilagano lya Mkulu Nguluwi.”

8 Kwa ilajizo lya Yoshua, wala watambika saba wawele na mbalati saba za ming'holo milume hali Mkulu Nguluwi, nawaluta kumwando kuno wopemba mhalamhanda wowinzwa na lila isanduku lya ilagano lya Mkulu Nguluwi. 9 Wala wanhu wawichigwe goya kitowa ngondo nawawalongola wala watambika aku wopemba mhalamhanda, wamizi wanji wowinza kumbele kwa isanduku lya ilagano aku mhalamhanda zipembigwa kwa kulutilila. 10 Ila Yoshua nakawalonjela wanhu, “Mleche kutowa iyowe ama kulavya lizi ne ulonzi woneche uleche kulawila kuli mlomo wa hemwe, mbaka zuwa alyo hondiwalonjelani mtowe iyowe, mhela awo ndo vyomtowa iyowe.” 11 Lelo Yoshua nakawadita awo wanhu wauzungulute wula muji mala imwe wawele wapichile isanduku lya ilagano lya Mkulu Nguluwi na kuhiluka kuli kambi kuwasa nechilo.

12 Lufuku Yoshua nakalilimka, watambika nawalipika lila isanduku lya ilagano lya Mkulu Nguluwi. 13 Wala watambika saba wawele na mbalati saba za ming'holo milume nawajenda kumwando kwa isanduku lya ilagano aku wopemba mhalamhanda kwa kulutilila. Wanhu wawichigwe goya kitowa ngondo nawalilongola isanduku lya Mkulu Nguluwi na wamizi wanji kumbele kwa heye. Mhalamhanda nazilutilila kupembigwa. 14 Zuwa lya keli nawauzunguluta awo muji mala imwe na kuhiluka kahi kuli kambi ya hewo. Nawadita ahyo kwa mhela wa mazuwa sita. 15 Zuwa lya saba nawenuka kung'hali lufuku, nawauzunguluta muji awo mala saba kota hihila mwaluko. Nalyali zuwa lilyo hela ndo nawauzunguluta muji awo mala saba. 16 Loifichile mala ya saba, mhela watambika lowapembile mhalamhanda, Yoshua nakawalonjela wanhu, “Mtowe iyowe, kwa vila Mkulu Nguluwi mina nakawapa awo muji! 17 Muji awo wodumigwa ng'hatu na chila chinhu chiwele amo kwa vila uwichigwa chiuyeng'ha kwa Mkulu Nguluwi, ila Lahabu, yula mng'hondwa, ndo yopona hamwe na wala wawele mumo mgati mwa ng'handa ya heye kwa vila nakawavisa wapugajizi wa hetwe. 18 Ila mleche kuhola choneche chiwichigwe chiuyeng'ha leka chidumigwe. Wone mhole chinhu choneche chiwichigwe chiuyeng'ha mochigala nongwa na kudumigwa kwa kambi ya Waisilaeli. 19 Ila sendi zeng'ha na zahabu na visaye vya shaba na chuma ndo vyelile kwa Mkulu Nguluwi, ahyo vyowichigwa kuli ng'hano ya Mkulu Nguluwi.”

20 Lelo wanhu nawatowa iyowe aku mhalamhanda zipembigwa. Wanhu vyowahuliche lizi lya mhalamhanda nawatowa iyowe kwa kulandula lizi, na lukanzi lwa muji nalugwa, luu. Chila yumwe kulawila honhu hoyemile, nawauvaba baho du na kuuhola muji ula. 21 Hamba nawadumya chila chinhu kuli awo muji na kuwakopola kwa ipanga, walume na wadala na wana na wasekulu na misenga na ming'holo na midogowi.

22 Yoshua nakawalonjela awo wapugajizi weli waipugajize isi ayo, “Mlute kuli ng'handa ya ayo mng'hondwa, mkawegale yula mdala na wala weng'ha wawele wang'holoze kota vyomilahile.” 23 Lelo wala walume wapugajizi nawaluta, nawawegala Lahabu na mhaza wa heye na maiwake na wakalumbu wa heye na wanhu weng'ha wa ivyazi lya heye, nawawawika kunze kuli kambi ya Isilaeli. 24 Kulawila aho, nawaulakaza kwa chiluli muji wa Yeliko na chila chinhu chiwele amo, ila nawaleka sendi na zahabu na vinhu vya shaba na vya chuma, avyo naviwichigwa kwa chiwalo cha ng'hano ya ng'handa ya Mkulu Nguluwi. 25 Ila Lahabu hamwe na wanhu weng'ha wa ng'handa ya mhaza wa heye na weng'ha wawele wochikala na heye, nawaloholigwa na Yoshua. Lahabu kangulutilila kikala hali Waisilaeli mbaka lehano, kwa vila nakawavisa wapugajizi walajizwe na Yoshua kuluta kuupugajiza muji wa Yeliko.

26 Mhela awo Yoshua nakalonga chilaho achi hali wanhu yolonga,