1 Mndewa Adoni-sedeki wa Yelusalemu nakahulika mbuli ilinguwala vila Yoshua vyoyaubochile muji wa Ayi na kuudumya muji awo na mndewa wake kota vyoyauditile muji wa Yeliko na mndewa wake. Kahi nakahulika kota wanhu wa Gibeoni nawali waditile ilagano lya kikala goya na Waisilaeli na kota sambi wangikala hali hewo. 2 Mbuli azo nazambuza kudumba kukulu ako Yelusalemu kwa vila muji wa Gibeoni nawali utogoligwe hali miji ja mndewa. Kahi muji awo nawali uzeleche kusinda Ayi, walume weng'ha nawali wamizi. 3 Lelo mndewa Adoni-sedeki wa Yelusalemu, nakahilika usenga kwa mndewa Hohamu wa Hebuloni na mndewa Pilamu wa Yalimuti na mndewa Yafiya wa Lakishi na mndewa Debili wa Eguloni, nakawalonjela, 4 “Muye mnhanze tuwadumye Wagibeoni, mina nawadita ilagano lya kikala goya na Yoshua hamwe na Waisilaeli.” 5 Hamba wandewa awo wahano wa Waamoli, mndewa wa Yelusalemu na mndewa wa Hebuloni na mndewa wa Yalimuti na mndewa wa Lakishi na mndewa wa Eguloni, nawakungajiza wamizi wa hewo, nawaluta nawo mbaka Gibeoni, nawawika kambi kuuzunguluta muji awo, nawautowa.

6 Wagibeoni nawahilika usenga kwa Yoshua ako kuli kambi ya Giligali, nawamlonjela, “Dedede, uleche kututaga hetwe vitumagwa wa hegwe, uye himahima ututanze na kutulohola kwa vila wandewa weng'ha wa Waamoli kulawa kuli isi ya vidunda nawoya kututowa.”

7 Lelo Yoshua hamwe na wamizi wa heye weng'ha na wazidahe ng'hatu nawoka Giligali. 8 Mkulu Nguluwi nakamlonjela Yoshua, “Uleche kuwadumba ne hado mina nandiwawika mmoko mwa hegwe, kuduhuli ne yumwe yoweza kwima hali hegwe.” 9 Vyowajendile kulawa Giligali nechilo yeng'ha, Yoshua nakawalawila baho du. 10 Mkulu Nguluwi nakawadita Waamoli weng'ha wawe wodumba ng'hatu hali Waisilaeli wawele nawawatowa ako Gibeoni. Nawawabilimisa kuli nzila ya ibindi lya Beti-holoni na kuwakopola mnzila mbaka Aseka na Makeda. 11 Navyonawali wowabilima Waisilaeli kuli ibindi lya Beti-holoni, Mkulu Nguluwi nakawatowela nhonya ya maganga makulu wawele mnzila mbaka Aseka na wala wabagame kwa maganga ago nawali wenji kusinda wabagame kwa mipanga ja Waisilaeli.

12 Mhela Mkulu Nguluwi vyoyawawichile Waamoli mmoko mwa Waisilaeli, Yoshua nakamlanda Mkulu Nguluwi hali Waisilaeli weng'ha, nakalonga,

16 Wala wandewa wahano nawabilima na kuza kivisa kuli mhalika ya Makeda. 17 Yoshua nakahulika kota wandewa awo nawazeleka kowevisile kuli mhalika ya Makeda. 18 Yoshua nakalonga, “Muwiche maganga makulu hali lwizi lwa mhalika na kuwika wamizi aho, 19 ila hemwe mleche kikala ako. Muwawinze wang'honyo wa hemwe na muwatowe kulawa ubanzi wa kumbele na mleche kuwaleka wenjile kuli muji wa hewo, mina Mkulu Nguluwi, Nguluwi wa hemwe, nakawawika mmoko wa hemwe.” 20 Yoshua hamwe na Waisilaeli nawawatowa na kuwakopola wenji, wamwe wa hewo waponile nawabilimila kuli miji ja hewo jiwele na ngome. 21 Vyogalawile ago Waisilaeli weng'ha nawahiluka kwa kikala goya kwa Yoshua ako kuli kambi ya Makeda, kuduhuli kahi munhu yajezile kulonga choneche chihile kwa Waisilaeli.

22 Hamba Yoshua nakalonga, “Mchumule lwizi lwa mhalika mingalile wala wandewa wahano kulawa amo.” 23 Nawadita ahyo, nawamigalila Yoshua wala wandewa wahano kulawa kuli mhalika, wawele ndo mndewa wa Yelusalemu na mndewa wa Hebuloni na mndewa wa Yalimuti na mndewa wa Lakishi na mndewa wa Eguloni. 24 Wandewa awo vyowegaligwe, Yoshua nakawachema Waisilaeli weng'ha na wakulu wa wamizi walutile na heye kuli ngondo, nakawalonjela, “Muye habehi muwabije wandewa awa kuli singo za hewo.” Nawo nawahejela na kuwabiga kuli singo za hewo. 25 Yoshua nakawalonjela “Mleche kudumba ne kuwa na lunhwinhwi, mwime nzinzili na msindamale, mina ahyo ndo Mkulu Nguluwi vyoyowaditila wang'honyo wa hemwe wawele mochitowa na hewo.” 26 Hamba Yoshua nakawakopola na kuwaniniza kuli migodi jihano na kujileka mitufi ajo mbaka matinazo. 27 Mhela wa kuzibila kwa isanya, Yoshua nakawalonjela wose mitufi ajo kuli migodi kojiwele jininizwe na kujitaga kuli mhalika konawali wevisile. Hamba nawawika maganga makulu kuli lwizi lwa mhalika. Maganga ago ga kuko mbaka lehano.

28 Zuwa alyo Yoshua vyoyauholile muji wa Makeda, nakamkopola mndewa wake na wanhu wa heye weng'ha ne kumleka munhu wa heye ne yumwe. Nakamditila mndewa wa Makeda kota vila vyoyamditile mndewa wa Yeliko.

29 Kulawa Makeda, Yoshua hamwe na Waisilaeli weng'ha nawaluta kuli muji wa Libuna kuutowa. 30 Mkulu Nguluwi nakauwika muji awo hamwe na mndewa wake mmoko mwa Waisilaeli, nawawakopola wanhu wake ne kumleka ne yumwe. Nawamditila mndewa wa Libuna kota vyowamditile mndewa wa Yeliko.

31 Hamba Yoshua na Waisilaeli weng'ha nawalawa Libuna nawaluta Lakishi, nawauzunguluta muji awo na kuutowa. 32 Naye Mkulu Nguluwi nakauwika muji awo mmoko mwa Waisilaeli, nawauhola lolifichile zuwa lya keli. Nawawakopola wanhu weng'ha wa muji awo wa Lakishi kota vyowaditile kula Libuna.

33 Aho, mndewa Holamu wa Geseli nakoya kuwatanza wanhu wa Lakishi. Ila Yoshua nakamkopola hamwe na wanhu wa heye weng'ha, nahamlechile ne munhu yumwe.

34 Hamba kulawa Lakishi, Yoshua na Waisilaeli weng'ha nawaluta mbaka muji wa Eguloni, nawauzunguluta na kuutowa. 35 Nawauhola zuwa lilyo na nakuwakopola wanhu wake weng'ha kota vyoyaditile kula Lakishi.

36 Hamba kulawa Eguloni, Yoshua na Waisilaeli weng'ha nawaluta mbaka muji wa Hebuloni na kuutowa muji awo na kuuhola. 37 Nawawakopola wanhu wake weng'ha hamwe na mndewa wa hewo, nawajiwifya ng'hatu miji jiyage jizungulute, nawawakopola wanhu wake weng'ha ne kumleka munhu ne yumwe kota vyowaditile kula Eguloni.

38 Hamba Yoshua na Waisilaeli weng'ha nawahinduka kuza kuli muji wa Debili na kuutowa. 39 Nawauhola muji awo na mndewa wake hamwe na miji jiyage jeng'ha jizungulute na kuwakopola weng'ha wawele ako Debili ne kumleka munhu ne yumwe. Nawauditila muji awo kota vyowauditile muji wa Hebuloni na muji wa Libuna na wandewa wake.

40 Lelo Yoshua nakaihola isi yeng'ha, nakaitowa isi ya vidunda na honhu ha Negebu na honhu ha isi iwele kuli mibindi na mibalalika na wandewa wake weng'ha. Hamlechile munhu ne yumwe ila nakakopola chila munhu kota Mkulu Nguluwi, Nguluwi wa Isilaeli, vyoyawalajize. 41 Yoshua nakawasumya wanhu weng'ha kulawa Kadeshi-balineya mbaka Gasa na kulawa isi ya Gosheni mbaka Gibeoni. 42 Yoshua nakaweza kuihola isi ayi yeng'ha na wandewa wake kwa mhela umwe kwa vila Mkulu Nguluwi, Nguluwi wa Isilaeli, naketowa kwa chiwalo cha Waisilaeli. 43 Lelo Yoshua nakahiluka mbaka kuli kambi ako Giligali hamwe na Waisilaeli weng'ha.

<- Yoshua 9Yoshua 11 ->