2
Kulanda kwa Yona
1 Lelo Yona loyawele mgati mwa lida lya somba ayo, nayali yomlanda Mkulu Nguluwi, Nguluwi wa heye, 2 yolonga,
“Kuli magazo ga heni nandimchema Mkulu Nguluwi,
nagwe nakanyhulichiza,
kulawa mgati mwa chilaga nandanda utanzi,
nagwe nakuhulika kulila kwa heni.
3 Kwa vila nakunhoza mgati ng'hatu mwa bahali,
hagati ha bahali,
mazi naganzunguluta chila ubanzi,
nhigu nazikola mchanya mwa heni.
4 Nandali ndijesa kota nambikwa kutali na meho ga hegwe,
ila ndolola kahi kulutila kuli ng'handa ya hegwe yelile.
5 Mazi naganzunguluta,
mgati ng'hatu mwa bahali nakunzunguluta chila ubanzi.
Mahamba ga mbahali nagangubika kumutwi.
6 Nandulika kuli misisi ja vidunda,
kuli isi iwele lwizi jake najihindigwa mazuwa gose.
Ila hegwe, gwa Mkulu Nguluwi, Nguluwi wa heni,
nakunyhilusila ukomu kulawa ako kuli ikulubila.
7 Muhe wa heni lowaluche kundeka,
nandikulanda, gwa Mkulu Nguluwi,
kulanda kwa heni nakukufichila,
kuli ng'handa ya hegwe yelile.
8 Wanhu walingujifugamila milungu,
wangulitoza kutali igano lya kwimilila lya hegwe kwa hewo.
9 Ila heni kwa lwimbo lwa kulonga malumbo,
ndokulavila nhambiko,
na kweneza chilaho cha heni.
Ulohozi wangulawa kwa Mkulu Nguluwi.”