1 Mkulu Nguluwi nakawaleka wanhu wa isi azo zipone leka kuwajeza Waisilaeli wawele hawetowile ngondo kuli isi ya Kanaani. 2 Nakadita ahyo leka kululangusa lulelo lweng'ha lwa Waisilaeli kitowa ngondo, wala hambe waizele ngondo ung'hali mhela wula. 3 Nakawaleka wakulu wahano wa Wafilisti na Wakanaani weng'ha na Wasidoni na Wahivi wowawele wochikala kuli vidunda vya Lebanoni, kulawa kuli chidunda cha Baali-helimoni mbaka kwinjila Hamati. 4 Heye nakawaleka leka yawajeze Waisilaeli, leka yavizele kota wohulichiza malajizo ga Mkulu Nguluwi, goyawalajize wasekulu wa hewo, kwa kukolela Musa. 5 Lelo Waisilaeli nawekala hali Wakanaani na Wahiti na Waamoli na Wapelisi na Wahivi na Wayebusi. 6 Wasongolo wa Waisilaeli nawawahesa wahinza wa isi zinji na wahinza wa Waisilaeli nawawaleka wahesigwe na wasongolo wa isi zinji. Kwa chiwalo acho, Waisilaeli nawaluka kujifugamila milungu ja chiujenzi.

7 Waisilaeli nawadita wihe hali Mkulu Nguluwi na kumsemwa Mkulu Nguluwi, Nguluwi wa hewo na kujifugamila Mibaali na Maashela. 8 Ahyo Mkulu Nguluwi nakawazudila ng'hatu Waisilaeli na kuwawika mmoko mwa Kushani-lishataimu, mndewa wa Alamu-nahalaimu, nawo Waisilaeli nawamkolela mijito ayo Kushani-lishataimu kwa mhela wa miyaka nane. 9 Hamba Waisilaeli nalowamlilile Mkulu Nguluwi, Mkulu Nguluwi nakawegalila Waisilaeli mlohozi, yawele ndo Otinieli, mwana mlume wa Kenasi, mdodowe Kalebu. 10 Muhe wa Mkulu Nguluwi naumuyila mchanya mwa heye, naye nakawa mtagusa kwa Waisilaeli. Otinieli nakaluta kuli ngondo, Mkulu Nguluwi nakamuwika ayo mndewa wa Mesopotamiya mmoko mwa heye na nakamsumya. 11 Isi naiwa na kikala goya kwa mhela wa miyaka makumi gane. Hamba Otinieli nakabagama.

12 Lelo Waisilaeli nawadita wihe kahi hali Mkulu Nguluwi, naye Mkulu Nguluwi nakamha mong'ho Eguloni, mndewa wa Moabu mchanya mwa Waisilaeli, kwa vila nawadita wihe hali Mkulu Nguluwi. 13 Ayo Eguloni nakawating'haniza Waamoni na Waamaleki, nakaluta kuwatowa Waisilaeli na kuuhola muji wula wa michikichi, mina ndo Yeliko. 14 Waisilaeli nawamkolela mijito Eguloni, mndewa wa Moabu kwa mhela wa miyaka kumi na nane. 15 Ila Waisilaeli lowamlilile Mkulu Nguluwi, nakawegalila mlohozi yawele ndo Ehudi, mwana mlume wa Gela wa nhanzi ya Benjamini, munhu yalingukola mijito kwa moko wa kumoso. Waisilaeli nawamlajiza Ehudi yahiliche ndolendole kwa Eguloni, mndewa wa Moabu. 16 Ehudi nakegongomanyila ipanga lya heye liwele na kunoleche kuno na kuno, ulefu wa ipanga alyo nawali kota sentimita makumi gahano. Nakaliwopa alyo ipanga mgati mwa nguwo ya heye na hagati ha ihaza lya heye lya kudilo. 17 Hamba Ehudi nakamhilichila ndolendole ayo Eguloni, mndewa wa Moabu. Eguloni nayali munhu yanenehe lukami. 18 Loyasindile kulavya ndolendole, nakawakundiza wala wanhu wapapile ndolendole azo woche. 19 Ila heye yuye nakahinduka kulawa kula kuli jimalukolo jiwele habehi na Giligali, nakamhiluchila Eguloni, nakalonga, “Heni ndina usenga wa chinyele kwa hegwe, gwa mndewa.” Eguloni nakalonga, “Mtuleche.” Weng'ha wawele wemile habehi na heye nawawaleka.

20 Lelo Ehudi nakamlutila mndewa, naye mndewa nayali yekalise yaliyeka kuli chihengo cha heye cha kuchanya chiwele na chipute. Ehudi nakalonga, “Ndina usenga wa hegwe kulawa kwa Nguluwi.” Lelo mndewa nakema kulawa kuli chila chigoda cha heye. 21 Ehudi nakagolola moko wa heye wa kumoso, nakebata alyo ipanga leka yalavye kulawa hala kuli ihaza lya heye lya kudilo, nakamhoma mndewa kuli lida lya heye. 22 Alyo ipanga nalinjila mgati hamwe na chaka chake. Mafuta nagagubika mchanya mwa alyo ipanga, kwa vila halilavile alyo ipanga kuli lida. Alyo ipanga nalilawila kwa kumbele. 23 Aho Ehudi nakalawa kuli chihengo cha kuchanya, nakamhindila lwizi lwa chihengo kwa kufuli. 24 Lelo loyawele kunze, vitumagwa wa heye nawahiluka. Nalowawene kota lwizi lwa chihengo najali jihindigwe kwa kufuli, nawo nawali wochilonjela, “Ne majesa nakaluta kucholo kuli chihengo cha heye cha kuchanya.” 25 Nawabeteza mbaka nawaluka kuwa na lunhwinhwi. Lelo vyowawene hambe yachumule, nawahola funguo na kuchumula lwizi. Nawamona mndewa wa hewo nayali yagwile hanyi, nakabagama. 26 Nalowawele wobeteza, Ehudi nakoka ne kibatigwa nakakolela kuli jimalukolo ja maganga, nakaluta Seila. 27 Naloyafichile kuli isi ya vidunda vya Efulaimu, nakapemba mhalamhanda, Waisilaeli nawedulika hamwe na heye kulawa ako kuli vidunda, naye nakawalongoza.

28 Nakawalonjela, “Mmbinze, kwa vila Mkulu Nguluwi nakawawika wang'honyo wa hemwe Wamoabu mmoko mwa hemwe.” Lelo nawedulika na kumuwinza, nawebata honhu heng'ha ha kuloka lwanda lwa Yolodani, hawele Wamoabu nawalokaga, nawalemeza munhu yoneche kuloka. 29 Mhela awo nawawakopola Wamoabu walume elufu kumi (10,000), wawele weng'ha nawali na mong'ho na wazidahe, haponile munhu ne yumwe. 30 Lelo Wamoabu zuwa alyo nawalemwela kwa Waisilaeli. Isi nayali na kikala goya kwa mhela wa miyaka makumi nane.

31 Mtagusa yawinzile hamba nayali Shamugali, mwana mlume wa Anati, yawele nakawakopola Wafilisti miya sita kwa ng'hweku ya kudimila misenga na kuwalohola Waisilaeli.

<- Watagusa 2Watagusa 4 ->