1 Kuli mwaka wa kumi na mbili wa ulongozi wa Ahasi, mndewa wa Yuda, Hosheya, mwana wa Ela, nakawa mndewa wa Isilaeli ako Samaliya. Nakalongoza ako kwa miyaka tisa. 2 Nakadita gehile hali Mkulu Nguluwi, ila haiwele kota wandewa wanji wa Isilaeli, wamlongole. 3 Shalimanesa, mndewa wa Ashulu nakamtowa mndewa Hosheya. Hamba Hosheya nakawa chitumagwa wa Shalimanesa na kumlavila kodi. 4 Ila mndewa wa Ashulu nakavizela kota Hosheya nakabelenhuka, kwa vila nayali yawalajize wasenga kwa So, mndewa wa Misili na halutilile kulipa kodi kota vyoyawele yodita kuli chila mwaka. Ahyo, Shalimanesa nakamibata na kumuwika mchinweng'ho.

5 Hamba mndewa wa Ashulu nakaitowa isi yeng'ha, naketowa na wamizi wa muji wa Samaliya na kuuzunguluta kwa wamizi wa mhela wa miyaka jidatu. 6 Kuli mwaka wa tisa wa ulongozi wa Hosheya, mndewa wa Ashulu nakauhola muji wa Samaliya na kuwahola wanhu wa Isilaeli na kuwahilika Ashulu. Nakawawika ako kuli muji wa Hala na wamwenga nakawawika habehi na lwanda lwa Haboli kuli mkowa wa Gosani na kuli miji ja Wamedi.

7 Aga geng'ha nagalawila kwa vila Waisilaeli nawadita gehile hali Mkulu Nguluwi, Nguluwi wa hewo, yawele nakawalavya kulawa Misili hali ulongozi wa ludali lwa Falao, mndewa wa Misili, ila nawajifugamila milungu 8 na kuwinza vihendo vya wanhu wa isi zinji wawele Mkulu Nguluwi nayali yawawinjile hali hewo, hamwe na vihendo viwele wandewa wa Isilaeli nawali wavigalile. 9 Wanhu wa Isilaeli nawajeza kudita mbuli kwa uviso leka kumvisa Mkulu Nguluwi, Nguluwi wa hewo, mbuli ziwele haziwele goya. Nawezenjela honhu ha kufugamila milungu kuli vijiji vya hewo mbaka kuli miji jiwele na ngome. 10 Nawawika maganga ga kufugamilwa na mizengo ja Ashela mchanya mwa chila chidunda chiwele ng'wemang'wema na hasi ha chila igodi liwele na mahamba madodi. 11 Nawafunyiza ubani kuli chila honhu ha kulavila nhambiko, kota vyowaditile wala wanhu wa isi zinji wawele Mkulu Nguluwi nayali yawawinjile hali hewo. Nawadita mbuli zihile ziwele nazimzudiza Mkulu Nguluwi. 12 Nawajifugamila jimalukolo, hanga Mkulu Nguluwi nayali yalonjile, “Mleche kudita mbuli azo.” 13 Mkulu Nguluwi nakawalajiza waloli na walingulola wa heye weng'ha leka waikanye Isilaeli na Yuda, yolonga, “Mzileche nzila za hemwe zihile, mibatilile mizilo ja heni na malajizo ga heni na kuwinza malajizo gondiwapele wasekulu wa hemwe kwa kukolela vitumagwa wa heni waloli.”

14 Ila hawahulichize, nawali na nhumbula zigagadale kota wasekulu wa hewo, wawele hawamkundile Mkulu Nguluwi, Nguluwi wa hewo. 15 Nawajilema mizilo ja heye na ilagano yaliditile na wasekulu wa hewo na makanyo goyawapele. Nawajifugamila jimalukolo jilihela utanzi mbaka nawo nawali walihela utanzi kahi. Nawawinza vihendo vya wanhu wa isi wawele habehi na hewo, hanga Mkulu Nguluwi nayali yawakanyile kwa kuwalonjela, “Mleche kudita kota vyowalingudita.” 16 Nawagaleka malajizo geng'ha ga Mkulu Nguluwi, Nguluwi wa hewo na kigongomanyila jimalukolo mili kwa kiwhana na ilogota na izengo lya Ashela. Nawavifugamila vinhu vyeng'ha vya kuli ulanga na kumkolela mijito Baali. 17 Nawawalavya wana wa hewo walume na wadala kota nhambiko kuli chiluli. Nawalagula na kuhawila na kiguza hewo wawo kuli kudita wihe hali Mkulu Nguluwi na kumzudiza.

18 Lelo Mkulu Nguluwi nakawa na ng'halazi ng'hatu na wanhu wa Isilaeli na kuwawinga hali heye. Nhanzi ya Yuda iliyeka ndo iponile. 19 Ila wanhu wa Yuda nawo hawajiwinzile mizilo ja Mkulu Nguluwi, Nguluwi wa hewo. Nawawinza vihendo vigaligwe na Waisilaeli. 20 Ahyo Mkulu Nguluwi nakawalema Waisilaeli weng'ha, nakawagaza na kuwaleka mmoko mwa wang'honyo wang'ang'ale, hamba nakawawinga hali heye.

21 Hamwande Mkulu Nguluwi loyawabagule wanhu wa Isilaeli kulawa kuli ivyazi lya Daudi, nawamdita Yeloboamu, mwana wa Nebati, yawe mndewa wa hewo. Yeloboamu nakawadita wanhu wa Isilaeli wamleche Mkulu Nguluwi na kudita gehile ng'hatu. 22 Waisilaeli nawadita gehile kota goyaditile Yeloboamu, mwana wa Nebati, hawagalechile, 23 mbaka Mkulu Nguluwi nakawawinga hali heye, kota vila vyoyawakanyile kwa kukolela vitumagwa wa heye weng'ha, wawele ndo waloli. Ahyo wanhu wa Isilaeli nawaholigwa kulawa kuli isi ya hewo wawo na kuhilikwa kuli isi ya Ashulu, kuwele wangikala ako kulawa mhela awo.

24 Hamba mndewa wa Ashulu nakawegala wanhu kulawa Babuloni na Kuta na Ava na Hamati na Sefalivaimu na kuwawika kuli miji ja Samaliya honhu ha wanhu wa Isilaeli. Nawaihola Samaliya na kikala kuli miji jake. 25 Mhela lowaluche kikala amo, hawamdumbile Mkulu Nguluwi, ahyo Mkulu Nguluwi nakalajiza misimba hali hewo, misimba ajo najiwakopola wamwe wa hewo. 26 Hamba wanhu nawamlonjela mndewa wa Ashulu, “Wanhu wawele nakuwahola kula na kuwawika kuli miji ja Samaliya, hawavizelele choyalinguchigana mlungu wa isi ayo. Ahyo mlungu yula nakalajiza misimba hali hewo, misimba ajo najiwakopola.” 27 Mndewa wa Ashulu nakalajiza, “Mumhole mtambika yumwe hali wala tuwaholile kulawa Samaliya, mumhiluse leka yekale ako na kuwalangusa wanhu malajizo ga mlungu wa isi ayo.” 28 Ahyo yumwe wa wala watambika waholigwe kulawa Samaliya nakaluta kikala Beteli na kuwalangusa wanhu vyoilinguganigwa kumdumba Mkulu Nguluwi.

29 Ila wanhu wa isi zinji wegaligwe Samaliya, nawegongomanyila milungu ja hewo kuli miji jimwenga hali honhu howalingikala na kujiwika kuli honhu ha kufugamila milungu jiwele wanhu wa Samaliya nawali wajigongomanye. 30 Wanhu wa Babuloni nawagongomanya limalukolo lya Sukoti-benoti leka liwe ndo mlungu wa hewo. Wanhu kulawa Kuti nawagongomanya limalukolo lya Neligali na wanhu kulawa Hamati nawagongomanya limalukolo lya Ashima 31 na Waavi nawagongomanya jimalukolo ja Nibuhasi na Talitaki. Wasefalivaimu nawawalavya wana wa hewo walume na wadala leka wawe nhambiko za kulakazwa na chiluli kwa Adilameleki na Anameleki, milungu ja Sefalivaimu. 32 Wanhu wano kahi nawamfugamila Mkulu Nguluwi, ila nawawahagula wanhu wa hewo leka wawe watambika hali honhu ha kufugamila milungu ja hewo. 33 Ahyo nawamfugamila Mkulu Nguluwi, ila kahi nawajikolela mijito milungu ja hewo kwa kiwhana na vihendo vya wanhu wa isi yowalawile.

34 Wang'hali wanguwinza vihendo vya hewo vya katali kulawa mhela wula. Hawalingumfugamila Mkulu Nguluwi ne kibatilila nhaguso ne malajizo ga heye ne malajizo ganji ne mizilo jiwele Mkulu Nguluwi nayali yawapele wanhu wa lulelo lwa Yakobo, yawele nakamchema Isilaeli. 35 Mhela Mkulu Nguluwi loyaditile ilagano na Waisilaeli, nakawalajiza yolonga, “Mleche kujifugamila milungu ne kujikolela mijito ne kujilavila nhambiko. 36 Ila mofugamila heni Mkulu Nguluwi, ndiwalavile kulawa Misili kwa ludali na mong'ho ng'hatu. Mofugamila heni na kundavila nhambiko. 37 Mhela weng'ha moganigwa kilolela leka mibatilile malajizo na mizilo ja heni viwele nanyandika kwa chiwalo cha hemwe. Mleche kujifugamila milungu. 38 Mleche kusemwa ilagano lyondiliditile na hemwe, mleche kujifugamila milungu. 39 Ila mofugamila heni Mkulu Nguluwi, Nguluwi wa hemwe, mbele ndowalohola kulawa mmoko mwa wang'honyo wa hemwe weng'ha.” 40 Ila wanhu awo hawahulichize, nawalutilila kudita kota vyowaditile aho hamwande.

41 Kulawa mhela wula, wanhu kulawa zila isi zinji nawalutilila kujifugamila jimalukolo ja hewo, hanga nawali womfugamila Mkulu Nguluwi. Wana na wazukulu wa hewo wangulutilila kudita kota wasekulu wa hewo vyowaditile.

<- 2 Wandewa 162 Wandewa 18 ->