1 Kuli muji wa Samaliya nakwali na wana makumi saba wa Ahabu. Ahyo Yehu nakandika baluwa na kulajiza baluwa ayo ihilikwe Samaliya kwa wakulu wa muji na kwa vilongozi na kwa walolezi wa wana wa Ahabu. Nakalonga, 2-3 “Hala du baluwa ayi hoifika kwa hegwe, mhagule munhu yawele na ludali ng'hatu hali wana wa mkulu wa hegwe na umuwiche kuli chigoda cha undewa cha mhaza wa heye, kwa vila hemwe mwanajo mituka ja ngondo na falasi na muji uwele na ngome na vinhu vya kitowela ngondo. Hamba ulute kitowa kwa chiwalo cha ivyazi lya mkulu wa hegwe.”

4 Ila wakulu wa Samaliya nawadumba ng'hatu na kulonga, “Wone wandewa weli nawalemwela kitowa na Yehu, hetwe toweza ndaze?” 5 Lelo mlolezi wa ng'handa ya chiundewa na chilongozi wa muji na wasekulu na walingulolela wana nawalajiza usenga awu kwa Yehu, “Hetwe twa vitumagwa wa hegwe na todita choneche choulonga. Ila hatumhagula munhu yoneche leka yawe mndewa. Udite lyoulyona linoga.”

6 Hamba Yehu nakawandichila baluwa ya keli, yolonga, “Wone hemwe mwa ubanzi wa heni na mwangunyhulichiza, mhole vitwi vya wana wa mkulu wa hemwe na muye kwa heni aku Yesileeli mitondo mhela kota awu.” Mhela awo wala wana makumi saba wa mndewa nawali wochikala hamwe na vilongozi wa muji wa Samaliya, wawele nawali wowalolela. 7 Baluwa ayo loiwafichile, wanhu wala nawawahola wala makumi saba wa mndewa na kuwadumula singo weng'ha. Nawawika vitwi vya hewo mgati mwa vidoto na kumhilichila Yehu ako Yesileeli.

8 Msenga loyafichile nakamlonjela Yehu, “Nawegala vitwi vya wana wa mndewa.” Aho ndo Yehu nakalonga, “Mviwiche kuli vilundo vili hali lwizi lwa muji, mvileche vikale kuko mbaka hamitondo.” 9 Hamitondo Yehu nakalawa mgati na kwima hali wanhu weng'ha na kulonga, “Mwahela nongwa. Heni ndo ndavile majesa gehile kumuwala mkulu wa heni na kumkopola, ila ndo whaani yawakopole awa weng'ha? 10 Mvizele kota haduhu ulonzi uwele Mkulu Nguluwi nakalonga kuwala ivyazi lya Ahabu na hawenele. Mkulu Nguluwi nakadita mbuli yila yoyalagane kwa kukolela chitumagwa wa heye Eliya.” 11 Ahyo Yehu nakamkopola chila yumwe wa ivyazi lya Ahabu ako Yesileeli yawele nakasigala, hamwe na wakulu wa heye na goloko wa heye wa habehi na watambika wa heye. Hamlechile yoneche yawele mkomu.

12 Hamba Yehu nakoka Yesileeli na kuluta Samaliya. Loyawele mnzila habehi na ng'handa ya kutemela milaika ja ming'holo, iwele ndo Beti-ekedi ya wadima ming'holo, 13 Yehu naketing'hana na wanhu wa ivyazi lya Ahasiya, mndewa wa Yuda, nakauza, “Hemwe mwa whaani?” Nawamwidichila, “Hetwe twa ivyazi lya Ahasiya. Natuya kulilamsa ivyazi lya mndewa na lya mamo wa mndewa.”

14 Hamba Yehu nakalajiza, “Muwebate kuno wawele wakomu.” Ahyo nawawahola wanhu makumi gane na weli na kuwadumula singo hafungo ha ideho lya Beti-ekedi. Hamlechile yoneche yawele mkomu. 15 Yehu nakalawa hala na loyafichile mnzila naketing'hana na Yehonadabu, mwana wa Lekabu, yawele nayali yoluta kumbochela. Yehu nakamlamsa na kulonga, “Ndaze, nhumbula ya hegwe naigoloka kwa heni kota nhumbula ya heni vyoigoloche kwa hegwe?” Yehonadabu nakedichila, “Ena.” Yehu nakalonga, “Wone ndo ahyo, umhe heni moko wa hegwe.” Nakamha moko na Yehu nakamkwiniza kuli mutuka wa heye wa ngondo. 16 Yehu nakalonga, “Tulutase leka ukalole maya ga heni kwa Mkulu Nguluwi.” Ahyo nawaluta hamwe kwa mutuka wa heye.

17 Lowafichile Samaliya, Yehu nakalikopola ivyazi lyeng'ha lya Ahabu liwele nalisigala, nakawadumya kwa kiwhana na ulonzi wa Mkulu Nguluwi woyaulonjile kukolela Eliya.

18 Hamba Yehu nakawakungajiza wanhu weng'ha wa Samaliya na kuwalonjela, “Ahabu nakamkolela mijito Baali hado. Ila Yehu komkolela mijito mzidi. 19 Lelo muwacheme waloli weng'ha wa Baali na vitumagwa wa heye weng'ha na watambika wa heye weng'ha. Mlolele leka chila munhu yawe aho, kwa vila ndangugana kumlavila Baali nhambiko ng'hulu lukami. Yoneche yawele kolemwela kuya, holutilila kikala.” Ila Yehu nakadita ahyo kwa chiwalo cha majesa ga usugu leka yawadumye vitumagwa weng'ha wa Baali. 20 Yehu nakalonga, “Muwiche nhing'hano ng'hulu kwa lutogo lwa Baali.” 21 Hamba Yehu nakegala usenga kuli isi yeng'ha ya Isilaeli na vitumagwa weng'ha wa Baali nawoya, haduhu ne yumwe yawele hafichile. Nawamema mgati mwa ng'handa ya Baali kulawa hali lwizi mbaka kuli kuduma kwa ng'handa. 22 Yehu nakamlonjela yula yawele nayali yololela chihengo cha nguwo, “Wigale mikanzu kwa chiwalo cha vitumagwa weng'ha wa Baali.” Yula munhu nakegala mikanzu.

23 Hamba Yehu na Yehonadabu, mwana wa Lekabu, nawenjila mgati mwa ng'handa ya Baali. Yehu nakawalonjela vitumagwa wa Baali, “Mlole chila honhu leka haleche kuwa na chitumagwa wa Mkulu Nguluwi hamwe na hemwe, ila ndo vitumagwa wa Baali hela.” 24 Ahyo nawenjila mgati leka kulavya nhambiko ya kulakazwa. Mhela awu, Yehu nayali yawegale hanze wanhu wa heye makumi nane kuno yawakanyile kwa kulonga, “Wone yumwe wa hemwe komleka yasulupuche munhu yoneche yondilingumuwika mmoko mwa heye, kolipa kwa ukomu wa heye.”

25 Yehu loyasindile kulavya nhambiko ya kulakazwa, nakawalajiza wamizi na vilongozi, “Mwinjile leka muwakopole weng'ha. Yaleche kusulupuka ne yumwe.” Lelo nawawakopola kwa ipanga. Wamizi na vilongozi nawazitoza kunze zila ng'huli, hamba nawenjila hali honhu ha izengo lya kufugamilwa lya Baali. 26 Nawalihilika kunze mwa yila ng'handa ya Baali lila izengo na kulilakaza kwa chiluli. 27 Nawalibomola lila izengo lya kufugamilwa lya Baali hamwe na ng'handa ya Baali, wanhu nawaidita ng'handa ayo kuwa cholo kulawa mhela wula.

28 Ahyo Yehu nakadumya kufugamilwa kwa Baali kuli isi ya Isilaeli. 29 Ila nakawinza gehile ga Yeloboamu, mwana wa Nebati, yawele nakawambuza Waisilaeli kudita gehile, gawele ndo kujifugamila jimalukolo ja milogota ja zahabu ako Beteli na Dani. 30 Mkulu Nguluwi nakamlonjela Yehu, “Kwa vila nakweneza gagoloche hali heni na nakuliditila ivyazi lya Ahabu gala geng'ha gonganile kudita, walelwa wa hegwe wochikalisa kuli chigoda cha undewa cha Isilaeli mbaka lulelo lwa kane.” 31 Ila Yehu habatilile malajizo ga Mkulu Nguluwi, Nguluwi wa Isilaeli, kwa nhumbula ya heye yeng'ha. Halechile kudita gehile goyaditile Yeloboamu, yawele nakawambuza Waisilaeli kudita gehile.

32 Mhela awo Mkulu Nguluwi nakaluka kupunguza honhu ha isi ya Isilaeli. Hasaeli, mndewa wa Alamu, nakawasumya Waisilaeli hali honhu heng'ha ha isi ya hewo 33 kulawila ubanzi wa kolilawilaga isanya mwa lwanda lwa Yolodani, kuli isi yeng'ha ya Gileadi, hawele ndo honhu ha Gadi na Lubeni na Manase na kulawila Aloeli habehi na ibindi lya Alinoni kukolela Gileadi mbaka Bashani.

34 Madito ganji geng'ha ga ulongozi wa Yehu na geng'ha goyaditile na mbuli za heye za kusumya, nazandichigwa kuli chitabu cha kukumbuchila kwa wandewa wa Isilaeli. 35 Yehu nakabagama na kutiligwa ako Samaliya. Yehoahasi mwanage, nakalongoza honhu ha heye. 36 Yehu nakalongoza Isilaeli yawele Samaliya kwa miyaka makumi meli na nane.

<- 2 Wandewa 92 Wandewa 11 ->