1 Daudi loyawele habehi kubagama, nakamchema Solomoni mwanage na kumlonjela, 2 “Mwanangu, kota vyoilinguzeleka, vilumbigwe vyeng'ha vyobagama, mazuwa ga heni nagamala. Wime nzinzili na uwe uzidahe. 3 Weneze malajizo ga Mkulu Nguluwi, Nguluwi wa hegwe, uwinze nzila za heye na kibatilila mizilo ja heye na malajizo ga heye na nhaguso za heye na ulolezi wa heye, kota vyoyandichigwe kuli malajizo ga Musa, leka mbuli za hegwe zilutilile goya koneche kouluta, 4 leka Mkulu Nguluwi yeneze kulagana kwa heye, loyandonjele, ‘Wone walelwa wa hegwe wobatilila mizilo ja heni na kung'holela mijito kwa kukundigwa na kwa nhumbula yeng'ha, kowa na munhu hali hemwe yawele kochikalisa kuli chigoda cha undewa cha Isilaeli.’

5 “Mzidi wa ago, kwangugazela gala goyanditile Yoabu, mwana wa Seluiya, vila vyoyawaditile wakulu wa wamizi weli wa Isilaeli, wawele ndo Abuneli, mwana wa Neli na Amasa, mwana wa Yeteli. Nakawakopola, nakabohola danda ya hewo mhela wa kikala goya kota vila kuli ngondo, kahi nayali na nongwa kwa vila nakaibakaliza danda yila kuli isali liwele kuli chuno cha heye na makwamba gawele goyavalile. 6 Umditile vyoulinguweza kwa luhala lwa hegwe, ila uleche kumleka yabagame kwa kikala goya.

7 “Ila uwalajile igano lya kwimilila wana wa Balisilayi, Mgileadi na uwakundize wawe hali wala walingulya kuli chisaga cha hegwe, kwa vila nawanditila igano lya kwimilila mhela lombele ndibilima kwa chiwalo cha mng'holozo Abusalomu. 8 Kabaho kahi Shimeyi, mwana wa Gela, Mbenjamini wa Bahulimu, yawele nakamhanjila lukami londutile Mahanaimu. Vyoyoyile kunhing'haniza kuli lwanda lwa Yolodani nandimlahila kwa itagwa lya Mkulu Nguluwi ndimlonjela, ‘Sikukopola kwa ipanga.’ 9 Ila lelo, uleche kijesa kota kahela nongwa. Hegwe kuna luhala kovizela choumditila, uleche kumleka yabagame kwa kikala goya.”

10 Hamba Daudi nakabagama, nakatiligwa Yelusalemu, kuli muji wa heye. 11 Mhela Daudi woyalongoze Isilaeli nawali miyaka makumi gane. Ako Hebuloni nakalongoza kwa miyaka saba na Yelusalemu nakalongoza kwa miyaka makumi gadatu na jidatu. 12 Lelo Solomoni nakekalisa kuli chigoda cha undewa honhu ha Daudi, mhaza wa heye na undewa wa heye nawima nzinzili.

13 Hamba Adoniya, mwana wa Hagiti, nakaluta kwa Batisheba, mayake Solomoni. Batisheba nakamuuza, “Ndaze, kwanguya kwa kikala goya?” Adoniya nakamwidichila, “Ena, ndanguya kwa kikala goya.” 14 Hamba nakalonga, “Ndina mbuli imwe hela ya kukulonjela.” Batisheba nakamlonjela, “Ulonje.” 15 Adoniya nakamlonjela, “Kota vyoulinguvizela, undewa nawali wa heni. Waisilaeli weng'ha nawali wondola kota ndo mndewa wa hewo. Ila mbuli nazigaluka, undewa nauluta kwa mng'holozangu, Mkulu Nguluwi nakagana mbuli ayi iwe kota vyoilawile. 16 Lelo ndangukulanda chinhu chimwe, ndangukudedeza uleche kundemela.” Batisheba nakamlonjela, “Longa.” 17 Nakalonga, “Dedede ndangukulanda umlande mndewa Solomoni, yamhe heni Abishagi, Mshunami, yawe mche wangu, howeza kulema.” 18 Batisheba nakamlonjela, “Goya, ndolongasa na mndewa honhu ha hegwe.”

19 Lelo Batisheba nakaluta kulongasa na mndewa Solomoni kwa chiwalo cha Adoniya. Mndewa nakenuka nakaluta kumbochela mayake, nakafugama, hamba nakekalisa kuli chigoda cha heye cha undewa. Nakalajiza chigoda cha undewa chigaligwe kwa heye kwa chiwalo cha mayake, naye mayake nakekalisa kuli moko wa kudilo wa mndewa. 20 Batisheba nakamlonjela mndewa, “Ndina mbuli nyindo ndangukulanda, dedede uleche kundemela.” Mndewa nakamlonjela, “Longa mayangu, sikulemela.” 21 Mayake nakalonga, “Mkundize mng'holozo Adoniya yamhole Abishagi, Mshunami leka yawe mche wake.” 22 Mndewa Solomoni nakamuuza mayake, “Lekachoni kwangumlanda Abishagi, Mshunami, kwa chiwalo cha Adoniya? Mbuli ayi naiwhana ng'hatu na kumganila undewa wa heni, kwa vila heye ndo mkulu kwa heni na kwa vila Yoabu, mwana wa Seluiya na mtambika Abiatali wa hamwe na heye.”

23 Aho mndewa Solomoni nakelaha kwa itagwa lya Mkulu Nguluwi yolonga, “Nguluwi yang'hopole ne kumbonela isungu, wone Adoniya hobagama kwa chiwalo cha kulanda aku! 24 Lelo, ndangilaha kwa itagwa lya Mkulu Nguluwi yawele mkomu, yawele nakambika na kunyimiza nzinzili kuli undewa wa mhaza wa heni Daudi na yawele nakeneza kulagana kwa heye kwa kumha undewa heni na lulelo lwa heni, ndikomya, Adoniya kobagama!” 25 Aho ndo mndewa Solomoni nakamlajiza Benaya, mwana wa Yehoyada, naye Benaya nakaluta kwa Adoniya na kumkopola.

26 Mndewa Solomoni nakamlonjela mtambika Abiatali, “Ulute ako Anatoti kuli migunda ja hegwe. Kwangulapigwa kubagama, ila sikukopola sambi kwa vila nakulihola isanduku lya ilagano lya Mkulu Nguluwi hali mhaza wa heni Daudi na kugazigwa hamwe na heye.” 27 Ahyo mndewa Solomoni nakamuwinga Abiatali kuli utambika wa Mkulu Nguluwi, yokweneza ulonzi wa Mkulu Nguluwi woyalonjile ako Shilo, galingumuwala Eli na lukolo lwa heye.

28 Yoabu loyahuliche mbuli azo, nakabilimila kuli ihema lya Mkulu Nguluwi na kibatilila mbalati za honhu ha kulavila nhambiko, kwa chiwalo cha kikala goya. Nakadita ahyo kwa vila nayali yelumbile na Adoniya, ila hawele na Abusalomu. 29 Mndewa Solomoni loyahuliche kota Yoabu ka kuli ihema lya Mkulu Nguluwi na nayali yemile habehi na honhu ha kulavila nhambiko, nakamlajiza Benaya, mwana wa Yehoyada, yolonga, “Ulute ukamtowe.” 30 Benaya nakaluta kuli ihema lya Mkulu Nguluwi, nakamlonjela Yoabu, “Mndewa kangukulonjela, ‘Ulawe amo.’ ” Yoabu nakedichila, “Hebu, ndobagama bahano.” Benaya nakahiluka kwa mndewa na kumlonjela vyoyalonjile Yoabu. 31 Mndewa Solomoni nakamlonjela Benaya, “Udite kota vyoyalonjile. Umtowe na kumtila, leka kusa gehile kulawa kwa heni na ivyazi lya mhaza wa heni, gehile ga danda ilihela nongwa iwele naiboholigwa na Yoabu. 32 Mkulu Nguluwi komgaza Yoabu kwa kukopola ako koyaditile ne mhaza wa heni Daudi kuvizela. Nakawakopola kwa ipanga wanhu weli wawele watanganiche kusinda heye na nawali wanojile kusinda heye. Nakawakopola Abuneli, mwana wa Neli, mkulu wa wamizi wa Isilaeli na Amasa, mwana wa Yeteli, yawele nayali mkulu wa wamizi wa Yuda. 33 Nongwa ya kubohola danda iwe kwa Yoabu na walelwa wa heye mazuwa gose. Ila kwa Daudi na walelwa wa heye na ivyazi lya heye na chigoda cha heye cha undewa, wawe na kikala goya kwa Mkulu Nguluwi mazuwa gose.”

34 Lelo Benaya, mwana wa Yehoyada, nakaluta kuli ihema nakamtowa Yoabu na kumkopola, nakatiligwa kuli mgunda wa heye kuchiwala. 35 Mndewa nakamuwika Benaya, mwana wa Yehoyada, yawe mkulu wa wamizi honhu ha Yoabu na Sadoki yawe mtambika honhu ha Abiatali.

36 Hamba mndewa nakalajiza usenga kwa Shimeyi na kumlonjela, “Wizenjele ng'handa amu Yelusalemu, wikale aha ila uleche kuluta honhu hanji. 37 Zuwa loukuka na kuloka ibindi lya Kidiloni, ndangukulonjela ndikomya kota kobagama kwa kiyambuza gwegwe baho.” 38 Shimeyi nakamwidichila mndewa, “Goya mndewa. Ndodita kota mkulu wa heni, mndewa vyoulonjile.” Lelo nakekala Yelusalemu kwa mhela winji.

39 Ila kuli kuduma kwa mwaka wa kadatu, wapogozi weli wa Shimeyi nawasulupuka na kuluta kwa Akishi, mwana wa Maaka, mndewa wa Gati. Shimeyi loyahuliche kota wapogozi wa ako Gati, 40 nakakwina idogowi lya heye nakaluta kuwapala ako Gati kwa mndewa Akishi. Lelo, nakawafika ako na nakawahilula kaye. 41 Mndewa Solomoni loyahuliche kota Shimeyi nayali yochile Yelusalemu, nakaluta Gati na kuhiluka, 42 mndewa nakamchema Shimeyi na kumuuza, “Ndaze, hundahile kwa itagwa lya Mkulu Nguluwi kota hulawa Yelusalemu, nani sikukanyile kota kobagama wone kojeza kuluta kunze? Nagwe nakukunda na kundonjela, ‘Goya, ndohulichiza.’ 43 Lekachoni lelo nakubena chilaho chowilahile kwa Mkulu Nguluwi na kubena mzilo wondikupele?” 44 Mndewa nakalutilila kumlonjela Shimeyi, “Kwangugazela gehile goumditile mhaza wa heni Daudi, lelo kwa chiwalo cha ago, Mkulu Nguluwi kokugaza. 45 Ila heni Solomoni ndotambichizwa na chigoda cha undewa cha Daudi chokwimizwa nzinzili hali Mkulu Nguluwi mazuwa gose.” 46 Hamba, mndewa nakamlajiza Benaya, mwana wa Yehoyada, naye nakalawa na kumtowa Shimeyi na kumkopola. Lelo, undewa wa Solomoni nawali wimile nzinzili.

<- 1 Wandewa 11 Wandewa 3 ->