1 Abiyamu nakaluka kulongoza ako Yuda kuli mwaka wa kumi na nane wa ulongozi wa mndewa Yeloboamu wa Isilaeli, mwana wa Nebati. 2 Naye nakalongoza ako Yelusalemu kwa miyaka jidatu. Mayake nayali yochemigwa Maaka, mhinza wa Abishalomu. 3 Abiyamu nakadita gehile kota gagala goyaditile mhaza wa heye. Hawele kota Daudi, yawele nayali na nhumbula ya kukundigwa hali Mkulu Nguluwi, Nguluwi wa heye. 4 Ila, kwa chiwalo cha Daudi, Mkulu Nguluwi, Nguluwi wa heye, nakamha Abiyamu mwana msongolo wa kulongoza kuli Yelusalemu, kwa kuidita Yelusalemu iwe nzinzili. 5 Kwa vila Daudi nakadita ganojile hali Mkulu Nguluwi na halemwele kibatilila malajizo geng'ha ga Mkulu Nguluwi mazuwa geng'ha ga ukomu wa heye, ila kwa mbuli ya Uliya, Mhiti hela. 6 Nakwali na ngondo hali Lehoboamu na Yeloboamu kuli mhela weng'ha wa ukomu wa Abiyamu.

7 Madito ganji ga Abiyamu na geng'ha goyaditile, nagandichigwa kuli chitabu cha kukumbuchila cha wandewa wa Yuda. Nakwali na ngondo hali Abiyamu na Yeloboamu. 8 Hamba Abiyamu nakabagama na kutiligwa kuli muji wa Daudi. Asa mwanage, nakalongoza honhu ha heye.

9 Kuli mwaka wa makumi meli wa ulongozi Yeloboamu, mndewa wa Isilaeli, Asa nakawa mndewa wa Yuda. 10 Nakalongoza kuli Yelusalemu kwa mhela wa miyaka makumi gane na umwe. Mayake nayali Maaka, mhinza wa Abishalomu. 11 Mndewa Asa nakadita ganojile hali Mkulu Nguluwi kota vyoyaditile Daudi, sekulu wa heye. 12 Nakawawinga kuli isi wala walume wang'hondwa wawele hala hali honhu ha kufugamila, nakosa jimalukolo jeng'ha jowajigongomanye wasekulu wa heye. 13 Nakamusa Maaka, mayake, kuli ulongozi wa heye kota mamo mndewa mdala, kwa vila nakagongomanya limalukolo lya kuzudiza kwa Ashela, mlungu wa chidala. Asa nakajibenanga na kujilakaza ajo jimalukolo kuli ibindi lya Kidiloni. 14 Hanga nayali hahosile honhu ha kufugamila, nhumbula ya Asa nayali yiwichile ng'hatu kwa Mkulu Nguluwi kuli kikala kwa heye kweng'ha. 15 Nakahilusa mgati mwa ng'handa ya Mkulu Nguluwi sendi na zahabu na vila vinhu viwele heye na mhaza wa heye nawali waviwichile chiuyeng'ha.

16 Nakwali na ngondo hali Asa na Baasha, mndewa wa Isilaeli, kuli mazuwa geng'ha ga ulongozi wa hewo. 17 Baasha, mndewa wa Isilaeli, nakaitowa isi ya Yuda na kwaluka kuzenga ngome kuli muji wa Lama, leka yamlemeze munhu yoneche yaleche kulawa ne kwinjila kuli isi ya Asa, mndewa wa Yuda. 18 Hamba, mndewa Asa nakahola sendi na zahabu yeng'ha isigale kuli ng'hano za ng'handa ya Mkulu Nguluwi na kuli ng'hano za ng'handa ya mndewa, nakawapa vitumagwa wa heye na kuwalajiza walute kwa Beni-hadadi, mwana wa Tabulimoni, mzukulu wa Hesioni, mndewa wa Alamu, yawele nayali yochikala ako Damasiko, nakalonga, 19 “Tuwiche ilagano hali heni na hegwe, kota vyowaditile mhaza wa heni na mhaza wa hegwe. Ulole, nandikugalila ndolendole ya sendi na zahabu, lelo ulute ukabene ilagano lya hegwe na Baasha, mndewa wa Isilaeli, leka yaleche kitowa na heni.” 20 Mndewa Beni-hadadi nakakunda kuwinza ulonzi wa mndewa Asa, nakalajiza wakulu wa wamizi wa heye na wamizi wa heye kuluta kujitowa miji ja Isilaeli. Nawo nawajihola miji ja Iyoni na Dani na Abeli-beti-maaka na Kineleti yeng'ha, hamwe na isi yeng'ha ya Nafutali. 21 Mndewa Baasha loyahuliche mbuli ayo, nakaleka kuuzenga muji wa Lama na kuluta kikala Tilisa. 22 Hamba mndewa Asa nakalajiza kwa Wayuda weng'ha ne kumbagula ne yumwe, wahole maganga na mbawo kulawa Lama, vinhu viwele Baasha nayali yotumiya ako kwa kuzenjela. Mndewa Asa nakatumiya mbawo azo kuzenjela Misipa na Geba iwele ako Benjamini. 23 Madito ganji geng'ha ga mndewa Asa na ludali lwa heye lweng'ha na geng'ha goyaditile na miji jeng'ha joyajizenjile, nagandichigwa kuli chitabu cha kukumbuchila kwa wandewa wa Yuda. Ila nakafichigwa na utamwa kuli magulu ga heye kuli mhela wa usekulu wa heye. 24 Hamba Asa nakabagama, nakatiligwa kuli vilaga vya chiundewa, kuli muji wa Daudi, sekulu wa heye. Yehoshafati mwanage, nakalongoza honhu ha heye.