13 ತುಮೆ ಧರ್ತಿನ[a] ಮೀಟ್‌ ಹುಯಿರ‍್ಹಾಸ್‌. ಮೀಟಸ್‌ ಫಿಕ್ಕು ಹುಯಿಗುತೊ, ಇನ ಬಿಜು಼ ಶನೇಥಿ ರುಚ಼್‍ ದ್ಯವಾನ ಉಶೆ? ಅದ್ಮಿಖ್ಹಾರು ಇನ ಭಾರ್‌ ನಾಖಿನ್ ವಾಟ್‌ಪರ್ ಚಾ಼ಲವಾಳು ಇನ ಖುಂದ್ಲಾನ ಲ್ಹಾಯಕ್‌ ಪಣ್ಕಿ ಬಿಜ಼ ಖೆವ ಕಾಮ್ನಾಬಿ ಕೋಆವಾನಿ.

14 “ತುಮೆ ಹಿಡಿ ಜಗತ್ನ ಉಜಾ಼ಳು ಹುಯಿರ‍್ಹಾಸ್‌. ಪಹಾಡ್‌ಪರ್ ಭಂದೈರ‍್ಹುತೆ ಗಾಮ್‍ ಲಪಿರ‍್ಹೆಯಿಕೊಯ್ನಿ. 15 ಅಜು಼ ಕೋಣ್‌ಬಿ ದೀವೊ ಲಗಾಡಿನ್, ಕೋಳ್ಗಾನಹೇಟ್ ಮ್ಹೇಲಾಕೊಯ್ನಿ; ಅನಬದಲ್ ಘರ್‌ಮ ಛಾ಼ತೆ ಹರೇಕ್ನ ಉಜಾ಼ಳು ದ್ಯವಾನಿತರ ದೀವೊ ಮ್ಹೇಲಾನಿ ಖಂಬಾಪರ್‌ ಮ್ಹೇಲಾಸ್. 16 ಅಮ್ಮಸ್ ತುಮಾರು ಉಜಾ಼ಳು ಅದ್ಮಿನ ಖ್ಹಾಮ್ಣೆ ಉಜಾ಼ಖ್ಹ್‌ ಹುವಾದೆ, ಅನೇಥಿ ತುಮೆ ಕರಾತೆ ಅಛ್ಛು಼ಕಾಮ್ನ ಇವ್ಣೆ ದೇಖಿನ್‌, ಸೊರ್ಗಾಮ ಛಾ಼ತೆ ತುಮಾರ ಬಾನ ಖ್ಹರಾವ್‌ಶೆ.

21 “ಅದ್ಮಿನ ಖೂನಿ ನಾ ಕರ್ನು, ಇಮ್‌ ಖೂನಿಕರವಾಳನ ನ್ಯಾವ್‍ನಿ ತೀರ್ಪ್‌ನ ಭೀರಾಕ್‌ಶೆ’ ಕರಿ ತುಮಾರು ಶಾಣುಖ್ಹಾರು ಬೋಲಿರಾಖ್ಯುಸ್ತೆ ತುಮೆ ಖ್ಹಮ್‌ಜಿರಾಖ್ಯಾಸ್‌. 22 ಕತೋಬಿ ಮೇ ತುಮೂನ ಶಾತ್‌ ಬೋಲಸ್‍ಕತೊ, ತುಮೆ ತುಮಾರ ಭೈಪರ್ ಖೀಜ಼್ ಖಾವಾಳೊ ಹರೇಕ್ ಜ಼ಣೋಬಿ ತುಮೆ ನ್ಯಾವ್‍ನಿ ತೀರ್ಪ್‌ಮ ಪಡ್‍ಶು, ಅಜು಼ ತುಮೆ ತುಮಾರ ಭೈನ, ‘ಏ ಬಿಣ್‍ಅಕ್ಲಿ’ ಕರಿ ಬೋಲ್ಯಾತೊ, ತುಮೂನ ನ್ಯಾವ್‍ನಿ ಸಭೆನಖ್ಹಾಮ್ಣೆ ಭೀರಾಕ್‌ಶೆ, ಅಜು಼, ‘ಏ ಫಾಲ್ತು’ ಕರಿ ಬೋಲವಾಳೊ, ನರಕ್‌ನಿ ಆಗ್‌ಮ ಪಡ್‌ಶೆ. 23 ಇನಖ್ಹಾಜೇಸ್ ತೂ ತಾರಿ ಕಾಣ್ಕೆನ ಚಾ಼ಚ಼ರ್‌ನ ಖ್ಹಾಮ್ಣೆ ಲಾಯೊತೆ, ತಾರ ಭೈನ ದಿಲ್ಮ ತಾರಪರ್ ಶಾತ್‌ತೋಬಿ ವಹೇರ್‌ ಛಾ಼ ಕರಿ ತಾರಿ ಯಾದ್ಮ ಆಯುತೊ, 24 ತು ತಾರಿ ಕಾಣ್ಕೆನ ಚಾ಼ಚ಼ರ್‌ನ ಖ್ಹಾಮ್ಣೆಸ್ ಮ್ಹೆಂದಿನ್, ಪಹಿಲೆ ಜೈ಼ನ್‌, ತಾರ ಭೈನ ಜೋ಼ಡೆ ಏಕ್‌ಹೂ. ಇನ ಬಾದ್‌ಮ ಐನ್, ತಾರಿ ಕಾಣ್ಕೆನ ದೇವ್ನ ದೇ.

25 “ತಾರೊ ವಿರೋದಿ ತುನ ನ್ಯಾವ್ನಖ್ಹಾಜೆ ನ್ಯಾಯದೀಶಕನ ಖೇಚಿಲೀಜಾ಼ವನ ಅಗಾಡಿಸ್ ತೂ ವಾಟ್‌ಪರಸ್ ಹೇಳ್‍ಮೇಳ್‍ ಹುಯಿಜಾ಼. ನತರ್‌ಕಿ ತಾರೊ ವಿರೋದಿ ತುನ ನೈಯಾಕನ ಖೇಚಿಲಿಜಾ಼ಶೆ. ಯೋ ನಯ್ಯೊ ಜೇಲ್‌ನ ಶಿಪಾಯಿನ ಹಾತ್ಮ ದಿಶೆ ಅಜು಼ ತೂ ಜೇಲ್‌ಮ ಫೆಕೈಜೀಶ್. 26 ತೂ ಏಕ್‍ ಕಾಖ್ಹ್‌ಬಿ ಬಚೈಶ್‍ಕೊಂತೆ ತಾರಾಮ ಛಾ಼ತೆ ಅಖ್ಖು ಪೈಶು ಫೇಡಾವಲಗೂಬಿ ಹಿಜ್ಜಾ಼ಥೊ ಆವಾನ ಉಶೇಸ್‍ ಕೊಯ್ನಿ ಕರಿ ಮೇ ಖ್ಹಾಚಮಾಬಿ ಬೋಲುಸ್.

31 ಇನಿ ಬಾವಣ್ಣ ಮ್ಹೇಲಿದ್ಯವಾಳೊ, ಇನ ತಲಾಕ್‌ನು ಕಾಗತ್‌ ಲೀಖಿದೀನ್‌ ಮ್ಹೇಲ್ನು ಕರಿ ಬೋಲೈರ‍್ಹುಸ್ ಎತ್ರೇಸ್. 32 ಕತೋಬಿ ಮೇ ತುಮೂನ ಬೋಲುಸ್ಕಿ, ವ್ಯಬಿಚಾರ‍್ನಿ ಕಾರಣ್‌ ಕೊಂತೆಸ್ ಇನಿ ಬಾವಣ್ಣ ಮ್ಹೇಲಿದ್ಯವಾಳೊ ಯೋಸ್ ಇನಿ ಬಾವಣ್ಣ ವ್ಯಬಿಚಾರ್‌ಮ ಪಡಾನ ಜಿಮ್ಮೇದಾರಿ ಉಶೆ. ನಾಹುಯಿನ್ ಬಾವ್ರಿ ಮ್ಹೇಲಿಹುಯಿನ ವ್ಯಹಾ ಕರಿಲ್ಯವಳೋಬಿ ವ್ಯಬಿಚಾರಿ ಹುಯಿಜಾ಼ಸ್.

38 “ಡೋಳಾನ ಬದಲ್ ಡೋಳೊ, ದಾತ್ನ ಬದಲ್ ದಾತ್‌’ ಕಡಾವ್ಣು ಕರಿ ಬೋಲಿರಾಖ್ಯುಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌ ಎತ್ರೇಸ್. 39 ಕತೋಬಿ ಮೇ ತುಮೂನ ಬೋಲಾನು ಶಾತ್‍ಕತೊ, ಕೋಣ್‌ತೋಬಿ ತುನ ಖರಾಬ್ ಕರ‍್ಯುತೊ, ಯೋ ಅದ್ಮಿನ ಬದ್‌ಲಾ ನಕೊ ಲೀಶ್‌. ಕೋಣ್‌ತೋಬಿ ಏಕ್‌ಜ಼ಣು ತಾರ ಖಾವಕಲ್ಲಪರ್ ಮಾರ‍್ಯುತೊ, ಇನ ಬಿಜೇಕ್ ಕಲ್ಲು ವತಾಳ್. 40 ಅಜು಼ ಕೋಣ್‌ತೋಬಿ ತಾರ ಜೋ಼ಡೆ ಝಂಝಟ್‍ ಕರೀನ್, ತಾರ ಮಹಿನಲುಂಗ್ಡಾನ ಛೀನೈಲೇವ್ಣುಕರಿ ತೀರ್ಮಾನ್‌ ಕರವಾಳಾನ, ಉಪ್ಪರ್ ಪೇರ‍್ಹಿರಾಖ್ಯೋತೆ ಝ಼ಗ್ಗಾನಾಬಿ ಮ್ಹೆಂದೆ. 41 ಏಕ್‌ ಜ಼ಣೊ ತುನ ಏಕ್‌ ಮೈಲ್ ದೂರ್ ಆವ್‌ಕರಿ ಜು಼ಲಮ್‌ ಕರ‍್ಯುತೊ ಇನಜೋ಼ಡೆ ಬೇ ಮೈಲ್ ದೂರ್ ಜಾ಼. 42 ಕೋಣ್‌ತೋಬಿ ತಾರಕನ ಶಾತ್ತೋಬಿ ಮಾಂಗ್ಯುತೊ, ಇನ ದೇ; ತಾರಕನ ಕರಜ಼್ ಮಾಂಗವಾಳನ ಮ್ಹೋಡು ನಕೊ ಫರೈಲೀಶ್‌.

43 “ತಾರ ಭೀಡೆವಾಳಾನ ಪ್ಯಾರ್ ಕರ್‌ ಅಜು಼ ತಾರ ದುಶ್‌ಮನ್ನ ವಹೇರ್‌ ಕರ‍್ನು’ ಕರಿ ಬೋಲಿರಾಖ್ಯುಸ್ತೆ ಇನ ತುಮೆ ಖ್ಹಮ್‌ಜಿರಾಖ್ಯಾಸ್‌ ಎತ್ರೇಸ್. 44 ಕತೋಬಿ ಮೇ ತುಮೂನ ಬೋಲಾನು ಶಾತ್‌ಕತೊ, ತುಮಾರ ದುಶ್‌ಮನ್ನ ಪ್ಯಾರ್ ಕರೊ; ತುಮೂನ ಖ್ಹತಾವವಾಳನಟೇಕೆ ದೇವ್ನ ಪ್ರಾರ್ಥನೆ ಕರೊ. 45 ಅಮ್ ಕರ‍್ಯಾತೊ, ಪರ್‌ಲೋಕ್‌ಮ ಛಾ಼ತೆ ತುಮಾರ ಬಾನ ತುಮೆ ಲಡ್ಕಾಉಶು. ಯೋ ಖರಾಬ್ನ ಉಪ್ಪರ್‌ಬಿ ಅಛ್ಛಾ಼ನ ಉಪ್ಪರ್‌ಬಿ ಇನೊ ಚಾ಼ಂದ್ನು ಉಜಾ಼ಳು ಪಡಾನಿಘೋಣಿ ಕರಾಸ್, ನೀತಿವಾಳಾನ ಉಪ್ಪರ್‌ಬಿ ಅನೀತಿವಾಳಾನ ಉಪ್ಪರ್‌ಬಿ ಪಾಣಿ ವರ್ಖ್ಹಾವಸ್‌. 46 ತುಮೂನ ಪ್ಯಾರ್ ಕರಾವಾಳನಾಸ್‌ ತುಮೆ ಪ್ಯಾರ್ ವತಾಳ್ಯಾತೊ ದೇವ್ ತುಮೂನ ಶನ ಇನಾಮ್ ದಿಶೆ? ಶುಂಕವಶೂಲ್‍ ಕರವಾಳುಬಿ ಅಮ್ಮಸ್ ಕರಾಸ್ನಿ! 47 ತುಮೆ ಖಲಿ ತುಮಾರ ದೋಸ್ತಿ ಖ್ಹಾರಾನಾಸ್ ಮಾನ್-ಮರ‍್ಯಾದಿ ವತಾಳ್ಯಾತೊ, ಇನಾಮ ಶಾತ್‌ ಬಡೈಮಾರಿಲೆವಾನು ಛಾ಼? ದೇವ್ನ ಪರ್‌ಖ್ಯುಕೊಂತೆ ಅದ್ಮಿ ಖ್ಹಾರುಬಿ ಇಮ್ಮಸ್ ಕರಾಸ್ನಿ! 48 ಇನಖ್ಹಾಜೇಸ್, ಪರಲೋಕ್‍ಮ ಛಾ಼ತೆ ತುಮಾರೊ ಬಾ ಖೆವಿಸ್ ಗಲ್ತಿಕೊಂತೆ ಛಾ಼ತೆ ಇಮ್‌, ತುಮೇಬಿ ಗಲ್ತಿಕೊಂತೆ ಇಮ್‌ ರ‍್ಹವೊ.