MATYU 6

Jisas wari kadapmang ka aming yotangkayap ning waraga' togu'

1 Ka sidi kadapmang kareng ka Anutu wari titiga' nakita' u tonga wa kabaksi' guk beng sini' kufara tinting. Sidi sasuk usingsa' ka kadapmang kareng ka amingning dasi'ganang sireng tinga aming wari kareng ning sasap waraga' guk mo' sura tinting. Mokngang, sidi sasuk ka waraga' tanga tinting wa sidining babangsi' Anutu ka kunimganang ikita' adi kadapmang ka u kareng ning kanga waraga' to kareng kura'bu sansam ning guk mokngang. 2 Wara' gu aming ka mambong guk mokngang tatafak waraga' ai'dap tanga kafakafa tangama mambong ni amonga wa gu aming fam ning dasi'ganang sireng amiinga aming wari karengsa' gagap waraga' mo' sura totang. Kadapmang usingsa' ka ningwara' wa aming midi buburap tutugusi wari siring yak girii ganang a aming bak ganangsa' yangara kuma' tanga fiareting. Adi kadapmang ka wa tatafak aming ga' bibiri' beng guk mo' naknga titing, mokngang adi sasuk ka aming wari kareng ning iyap waraga'sa' sura sige titing. Beng guk sini' torik adisining kadapmang kareng waraga' mesisiringa wa aming warisa' titing, a Anutu adi waraga' wa kareng naknga mesisiringa guk mo' tita', mokngang sini'. 3 Ka gu tatafak aming beng sini' yotangkayap ga' sura wa gu aming ni guk mo' gabinga kapmo' tafaferanga amotang wa giri. 4 Ning tinga babangga girii Anutu ka nasi' nasi' aming wari kapmo' titing u kuma' yapsasu'neta' warisa' gapma napa' beng guk ning kanga kaba kareng naknga napa' kareng kura'bu gamota'.

Jisas wari arantagimni u ibang tutugu ning kadapmang didimeng waraga' yanggu'

Luk 11:2-4

5 Ka Anutuga' ibang tutugu waraga' undu' ningsa' toutik, sidi babangsi' Anutuga' ibang tounga wa sidi kadapmang ka aming arantagim ka midi buburap adi' wari tonga fiareting ning mo' tinting. Adi ibang tounga wa adi kadapmang usingsa' tanga aming wari aming kareng ning yapma adisining wap bema ara waraga'sa' sura siring yak ganang a kama bingking ka aming wari bak titing wara'gangangsa' adenga tonga fiareting. Ka beng sini' sanirik adisining kadapmang u kareng ning kanga mesisiringa wa aming kamaganangni warisa' yapma titing, a Anutu adi kadapmang u kareng ning kanga waraga' mesisiringa kabi'guk mo' tita' wara' adi nakiam guk mo' tita', mokngang sini'. 6 A gu Anutuga' ibang beng sini' tounga wa gu ganing yak iyung bane ganang amanga faba isefinga gapmo' kapmo'sa' mera tongamotang. Ka beng sini' gu babangga Anutu wa kaga guk mo' tanga mera toutang de ka Anutu adi nasi' nasi' kapmo' yapsasu'na tuang wara' adi kuma' gapma guning ibang ning kadapmang wa kareng ning kanga waraga' mesisiringa tanga napa' kareng kura'bu kuma'sa' gamota'.

7 Ka sidi ibang tounga wa sidi midi ki guk mokngang ka paramu'sini' sige guk mo' tonga anting. Kadapmang ka paramu' sini' sige tonga au ningwara' wa aming ka anasining muraksi' nua'niga' sura tuguting wari muraksi' wari nakiam ga' ning tonga tuguting. 8 Ka sidi ibang paramu' sini' tonga au ka adi u titing ning mo' tinting, mokngang. Sidining babangsi' Anutu adi nasi' ka sidi nafera anini ga' suking wa ko mo' aniinga ganang timinggi' kuma'sa' kata'. 9 Wara' sidi adita' ibang tangamonga wa ibang ning kadapmang didimeng nua'ni ka naga i sanggerotik i yaranga toyanting. Wa ning,

o sibengni' girii kunimganang ikitang aming indi guning wap girii wa kareng naro'sa' ning kantam.

10 Iik didimeng kareng ka guning bining ganang iikning unggungsa' tipkadofinimotang. Kunim aming wari guning midi nakam sa' titing ningsa' ka aming kamaganangni indindu' ai'sa' tagamtam.

11 Gusa' nana a nasi' kamining didimengsa' nimotang.

12 Aming wari indita' kadagang tinimging u kuma' tipdidimem ka sibeng gu indining kadagang u suknakubenim totang.

13 Gu napa' ka kadaga titiga' kigineng sini' indiramik ning wa kagabi sa' mo' tinga indiramikota'. Gu yotangkanip tinga kadagang wari mo' indifikadauta'. Gusa' napa dabiksa' u niptatoretang. Tangkunang a wap girii kigineng guk wa gupmo'sa' fikifiki ningsa' beng sini' ikitang, beng.

14 Ka beng sini' torik, aming nua'ni wari kadagang giramikinga gu adining kadagang waraga' sasuk mimeng mo' tanga urapsa' suknakubeutang wa babangga Anutu adindu' guning kadagang waraga' suknakube tota'. 15 A gu aming nua'ni wari kadagang tagamota' ka gu waraga' suknakube guk mo' totang wa babangga Anutu adindu' guning kadagang u suknakube guk mo' tota', mokngang sini'.

Jisas wari ibang ka nana tapni guk tanga tuguting waraga' togu'

16 Ka kadapmang ka ibang ka nana tapni guk tanga tuguting waraga' undu' ning sanotik, sidi napa' girii ni titiga' sura ibang nana tapni guk tanga tounga wa sidi kadapmang usingsa' ka aming fam wari tanga nondaksi' guk kadagainga aming wari beng sini' titining da'ning yapma adisining wap bema areting ning mo' tinting. Beng sini' aming ka wara'sining kadapmang waraga' mesisiringa wa Anutu wari mo' tita', aming warisa' titing. 17 Ka sidi Anutuga' ibang ka nana tapni guk kuma' tanga tonga aming ning dasi'ganang undu' aming wari sapkeda guk mo' titi waraga' tafafera tanga nondaksi' tipgadabanga mesisiringa sa' tanga tonting wa karengsa'. 18 Ning tinga sidining babangsi' Anutu ka kapmo' ikinga kaga guk mo' titing warisa' ibang kapmo' tonting u kuma' sapma naksam sa' tota'.

Jisas wari mambong ka fikifiki ningsa' iikning mo' u bak mo' manggara kuguk waraga' togu'

Luk 12:33-34

19 Ka sidi napa' mambong karesi ka kamaganangni sa' u manggara kukna waraga' sasuk mimeng sini' mo' tinting, mokngang. Napa' kamaganangni wa tangkunang ningsa' iikning guk mokngang. Napa' mambong kamaganangni ka wa ging wari nana a bubuyap titi a bataga tanga kadaga abanga kubu aming wari yak ibaramara anga iromanggakniap ning tanga bibi' titining guk. 20 A Anutuning napa' kigineng ka iik kareng titi wara'ning wa napa' ka ging a bataga a aming wari kubuna ning titining guk mokngang sini', tangkunang fikifiki ningsa' iik wara'ning. Wara' sidi sidining mambong kigineng ning wa waraga'sa' naknga manggara kuknganting. 21 Ka sidi Anutuning napa' kiginesi ka ningsa' iikning u manggakna ga'sa' nakanting wa sidining sasuksi' wa napa' wara'ning tuang Anutuganang kuma' ita'.

Aming ka sasuk kareng guk wa aming de kareng ningda'ning wara'ning midi

Luk 11:34-36

22 Ka sidi kuma'sa' naking, aming ning deni wa sasukni wara'ning kamang diok ning ikita' wara' aming ka de kareng wa sasuk ka kaba ganang undu' sangang sa' tanga ikita'. 23 A de wari kadaga tota' wa mokngang, adi napa' fam guk mo' yapma sasuk didimeng guk mo' tanga ira kaba ganang wa kangkam guk ikita'. Ka aming ning sasuk undu' de wari degareta' ningda'ning wara' aming ka sasuk ka napa' kadagang sa' fatota' wa adining iikni undu' kangkam ning ira kadaga tota'.

Kane aming wari aming girisi fama' ning kane titining guk mokngang

Luk 16:13

24 Abanga nua'ni ka ning, kane aming nua'ni wari aming girii nua'ni ning kane tangamota' undu' unggungsa' tota'. Adi kane ka u tanga anga aming girii nua'ni ning kane wara'guk mo' tota' mokngang. Adi fama' guk dabik tiamotik ning tonga tota' wa girini nua'niga' wa kaba guk naknga kafakafa tangamota' a nua'niga' wa kaba sini' mo' kufara kane kafakafa guk mo' tangamota'. Ka sidindu' ningsa', sasuksi' wari napa' girisi kamaganangni moni a mambong karesi fam waraga'sa' tinting wa wari sidining girisi' ningda'ning ira saptatoreinga sidi wara'ning kapmik ikanting. Ning tinga sidi sasuk mimeng ka waraga'sa' tanga ira Anutuning kane ga' wa kabaksi' sini' mo' kufara tinting.

Jisas wari aming wari nana a kwi'ga' sasuk mimeng mo' titi waraga' togu'

Luk 12:22-31

25 Ka Jisas wari adining arantagimni u nua'bu ning yanggu', ka sidi napa' fuksi' yotangka ning waraga' sura ai, nana wa nasi' nantam a kwi' wa indining tanga manggaknantam ning tonga sasuk mimeng tanga kabaksi' mamareng mo' nakanting. Napa' ka nana a kwi' mambong wa aming wari damdang naknga gi' iik wara'ning ki mo' mokngang. 26 Ka sidi yang ning iiksi'ga' sukanting, yang adi nasi' nantam ning tonga sasuk mimeng tanga feng kane tangkunang tanga ifakadofiinga manggara yak ganang didasi ning guk mo' titing. Abanga Anutu adi yang wa napa' kababi' sini' sigening ning yabita' unggung ka adi kafakafa yaptatoreinga damdang sa' ikiting. Ka aming sidi Anutuning de ganang wa napa' kabasi' mo', napa' girii sini' ning iking wara' sidining babangsi' Anutu ka kunimganang ikita' adi sidi yotangkasap ga' wa nakube kabi'guk mo' tota', mokngang adi kuma'sa yotangkasabota'. 27 Ka beng sini' aming adi adining iikni wa ananing tang ganangsa' guk mo' tiparamundota' wara' adi ananing iikni waraga' sasuk mimeng tonga, mokngang.

28 Abanga kwi' tasase ga' mimeng titining undu' ningsa', sidi ai kwi' guk mokngang, ya fukni' bi'sa' ba yangakantam ning tonga waraga' kabaksi' mamareng naknga sasuk mimeng mo' tinting mokngang. Sidi napa' daberim karesi ka base ganang kadofiting waraga' sukanting, napa' karesi ka u yabitam wa anasining tang ganang kane girii mo' tanga kadofiting mokngang, Anutuning tanga ganangsa' kadofiting. 29 Beng guk sini' sanirik aming girii king Solomon ka tim itarugu' adi aming kangasi sini' ira adining kwi'ni tasase wa inga'ni karesi sini' tanga wara'ning wap guk itarugu'. Ka napa' daberim karesi baseni ka u torik wa karesi sini' ka wa aming kafasi' wari mo' tinga ikiting, wara' daberim wari kuni' sini' ira Solomon ning kwi' kareng ka aming kafasi' wari muntofiging u tarafikiting. 30 Ka daberim u torik undu' napa' tangkunang ka fikifiki ningsa' iikning mo', wa adi kabi' ningsa' adeia' tubobu urapsa' kaforanga mangfuinga kudip seinga wadigi' kuma' dasasu'neting. A aming sidi wa Anutu wari napa' girii sini' ning sabita' wara' sidi ning nakedanting, aming ka naktangka kabi'sini' titisi sidi wa Anutu adi kuma'sa' yotangkasap ning. 31 Ka sidi naning midi u naknga sasuk mimeng ka ai indi nasi' nantam, a nasi' tasasentam ning titing wa kagabi tinting. 32 Sasuk mimeng ka ningwara' wa aming ka Anutu girii beng guk wara'ning wap guk mo' nakiting wari tanga ikiting. Ka sidining babangsi' girii kunimganang ikita' adi sidi napa' ka nana titining a tasase ning waraga' nafek tinting wa kuma' sabara' wara' adi kuma'sa' yotangkasamota'. 33 Wara' naktangka aming sidi napa' kigineng ka sidi fikifiki sura iikning wa Anutuning bining ning kadapmang didimeng waraga'sa' sura ikanting. Ning tinga Anutu adi napa' fam ka nana a tasase ning undu' kuma'sa samota'. 34 Ka sidi midi kigineng ka waraga' sura ning tanga sasuk ka napa' inga' kagadofi ning waraga' tanga kabaksi' mamareng naknga ai inga' wa nafek ba tok wa ma napa' mamareng fam ba kadofinamo' ning mo' tonting, mokngang, Sidi napa' ka kama kubanik ganang kaga' kuma' ting waraga'sa' sukanting. A napa' ka inga' titining wa Anutu warisa' katatorara' wara' anasa' kuma' sangtintingnota'.

<- MATYU 5 MATYU 7 ->