8 Ning tanga anganga kama wari kibirida sini' tinga aming girii feng tuang wari adining aming ka kane aming fam yaptatora wara'ning u katingana ning anota', gu kane aming arantagim u katiana abanga uningkim mambong toyapma yare'. Aming ka kibiri sini' ari' abinging wara'ganang yodanga ima anganga aming ka kamindapking tim munumung sini' abinging wa ari' imotang. 9 Ning aniinga adi tim wa aming ka kibiri sini' yangkarota' u toyabota'. Adi kibiri sini' anga kane mimeng guk mo' tinting de ka aming uningkim toyabota' adi kamindapking sini' dabiksa' anga titining da'ning didimeng dabiksa' toyabota'. 10 Ka aming wari uningkim u ima arayarota' ganang ka aming ka kamindapking sini' anga tinting wari aming ka mandang inga' sini' anting wari uningkim dandameng da' bemting u yapma ning sura adenting, a indi kamindapking sini' abangam wara' indi dandameng sini' unda' bemtam ning sura adenga arakafanting. Ka mokngang aming uningkim toyapma yarota' adi namba kubaniksa' ka aming ka inga' anting wara'siga' imota' wara'guk dabik ningsa' imota'. 11 Ka adi uningkim u bema dabik ningsa' imota' u kanga aming girisi ka kane imota' waraga' kabaksi' kadagang nakngama arokngam tanga ning aninting, 12 ai indining, gu aming ka kibiri inga'sini' abanga kane kabi'sa' tinging wara'guk dabik ningsa' ba nimarang. Indi kamindap gaa' sini' fabang kuknibinga tanga anganga mayam kagaya girii fukni' ganangsa' amara', ka gu naga' tanga ning guk indaramatang ning tonting. 13 Ka aming girii feng tuang wari midi ka u naknga aming nua'ni ka aming ka goi tinting wara'sining nua'ni u nagira tonga ning anota', amina ning ganotik na kadapmang ka u tirik wa kadagang mo' giramatik. Na tim kane i tanaam waraga' munumung sini' anga ginagarak ganang wa na uningkim ka ning u ganggam ga' ganinga gundu' aigasa' tinga tabanga gipmingak wara' na uningkim ka u didimengsa' togabirik. 14 Ka gu uningkim kuma' gamarik u bemnanga yakangga' gi'sa' maya'. 15 Na feng a uningkim wara'ning tuang wara' na kane aming toyabonga wa naganing sasuksa' tanga tosabotik. Aming ka tim abinging sidi a aming ka mandang ari'sini' abinging wara'guk dabiksa' tosabotik ning tonga undu' naganing sasuk ganangsa' tanga tosabotik. Ka gu naga ai' dapning kadapmang kareng tanga dabiksa' samarik waraga' kabaka kadagang ba naknamarang ning anota' ning yanggu'. 16 Ka Jisas wari midi tipfara u tanga ina biinga ning tanga ning yanggu', beng guk sini' urang torik aming ka kami yara'ganang sigening ningda'ning mandang sini' iking adi inga' wa tim ikni'ga'. Ning tinga aming ka girisi ira tim iking adibu mandang ikni'ga' ning yanggu'.
17 Ka Jisas guk ka arantagimni guk wari Jerusalem yong girii ga' areging. Araranga kadapmang bining ganang Jisas wari ananing arantagimni 12 unggungsa' inagira fonga sasa'ning u kukyapma ning yanggu', 18 beng sini' sireng ning sanotik, kami ya Jerusalem yong girii ga' urang arem. Indi yong girii u aranga kadofintam ganang wa aming fam wari Amingning Tim Iyak naga bemnapma tonga pris girisi arantagim a Juda ning sasuk aming girisi wara'ganang nipmiinga adibu nugumak titi waraga' midi kadapmang nua'ni totangkani'ga'. 19 Ning tanga bema tonga aming arantagim nua'nining kafasi'ganang nipmiinga wari midi kadagasi kuni' kuni' nangkigenga fefinap tanga bema firi ganang ugarinapni'ga'. Ning tinga kama fama' ibinga famineng wara'ganang wa tubobu marakok ga' ning yanggu' Jisas wari.
20 Ka Sebedi ning tamni wari mindine fama' Jems ya Jon ya u inagira abanga Jisas wari napa' ni tangam ga' ning tonga sura Jisas ning kayong ganang u manda upma mera anigu'. 21 Ka Jisas wari taming u kanga ning anigu', nasi' tagam ga' ning tonga torang. Ka taming wari ning anigu', ma' girii gu beng sini' toya' inga' gu king girii ira marere' ganang wa gu naganing sabane fama' i tim iyak ning yapma manggara ni ka kafaga kareng ganang tara' a ni ka kafaga kesini ganang tara' ning kukyapma tanga marekni'. 22 Ka Jisas wari taming guk ka mindine fama' wara'guk u ning yanggu', a sidi midi ka wara'ning ki kafakafa guk mo' nakdidimanga abanga toing. Ning ina ning tanga iguyangguk u ning yanggu', ma' sidi mamareng ka naga bemonga fatirik wa sidindu' bimbem ning ba. Ka adibu ning togumu', a girii indindu' girisa' bimbem ning yang. 23 Ka Jisas wari ning yanggu', beng sini' sidindu' naganing mamareng dibing u kuma'sa' bemtamu'. A sidi nua'ni ka kafana kareng ganang a nua'ni ka kafana kesini ganang ning marek ga' toyamu' waraga' wa ning sanotik, nagasa' manggara sipmiinga marek ning guk mokngang. Naganing sibeng warisa' aming ka tare ka wara'ganang marek waraga' kuma' ifikasiringa ibigu' wara' adining sasuk ganangsa' manggara ipmiinga marek wara'ning ning yanggu'.
24 Ka Jisas ning arantagim fam wari aming fama' iguyangguk wari midi ka Jisas u girii iikga' anigagumu' wara'ning u naknga kabaksi' kadagang nakiamging. 25 Ka Jisas wari u yapma arantagimni dabik u katiana fong kukyapma ning yanggu', sidi aming arantagim nua'ni kingsi' guk wara'sining kadapmang kuma'sa' yabiting. Adi ning titing, adi aming girisi kigineng guk wara' adi nasi' kane kagaya wa kane aming ga'sa' ima adi yaptatora sa' tanga marekiting. 26 A sidi wa ning u titining guk mokngang. Sidi Anutuning de ganang wap girii guk iikga' naknga wa sidi kadapmang ka aming fam ning midi u nakiam sa' tanga adisining kane u tiam ning tinting wa giri. 27 Abanga sidi tim iyak aming ning ironga wa sidi kabaksi' bema afanga kane aming sige slev ning kadapmang u yaranga tanga ikanting. 28 Ka Amingning Tim Iyak nandu' ningsa'. Na kamaganang yaraga' afuguk wa na aming wari naganing kane tanam waraga' mo' afuguk, mokngang na adi yotangkayapma adisining kane tiama ning tanga kadagang wari tofiapma iking u udaim wara'ning toni ka naganing fukna ingging kabiaminga nukinga tubobu manggara fabanga gi' kukyap waraga' sura afuguk ning yanggu'.
29 Ka Jisas guk ka arantagimni guk wari Jeriko yong u kabinga aramugoging. Ka yong wara'ning aming arantagim kabi'mo' wari Jisas wari napa' fam tiam waraga' sura marara mandang yaranga aging. 30 Ka kadapmang gaga ganang wa aming dasi' kadagasi fama' wari merafagumu'. Ka Jisas wari anga irafiku' u naknga ku bang sini' ning katigumu', o girii, Devit ning iri gu nipbubure tanga yotankanip te'. 31 Ka aming kabi'mo' ka Jisas u yaranga aging wari aming fama' wari ku katigumu' u yapma yangsefi tiging. Ka aming dasi' kadagasi fama' adi aming wari yangsefi tiging wara'guk mo' nakumu'. Adi ku bang mimeng sini' katinga ning togumu', ai girii, Devit ning iri gu nipbubure tanga kafakafa tinibe'. 32 Ka Jisas adi aming fama' wari ku mimeng sini' katigumu' u naknga anga ade tugu'. Adenga faranga yapma ning yanggu', nasi' tasamotik. 33 Ka aming dasi' kadagasi fama' wari ning anigumu', o girii indi gu dani' i tubobu ifakarendanim ga' nakiamuk. 34 Ning tuguinga Jisas wari bibiri' yapma anga dasi' u suroiminga dasi' wari tubobu kaga'sa' karendainga karengsa' ubu degaregumu'. Degaranga ning tanga Jisas wari mugoinga adi Jisas u yaranga ning tanga Jisas se' guk kubap mugoging.
<- MATYU 19MATYU 21 ->