1 Odzɛ ngwi ani le gbɔ ma li ongwu aani, dafi alungwɔ duu li mgbi ongye gyokwudɛ nɛ kpaa ngwi o ka li ongbɛ jo, idzidza mgban yi ofyɛɛ dzɛma ba. 2 O ka byidzɛ abɔ ama odi mbon yi ama ongyon nghataa ba onɔ ngwi otsɔn kye dzɛ mani. 3 Li ngha ngwi i dzɛ yi eyi kpaa aali, onɔ ngwi eyi ka li ɛngbɛ mmafa ma, eyi wodzɛ adi mgbi ungwɔ ongwi ɛsɛ nɛni. 4 Kpaa ngwi onɔ wa gyɔ yɛyɛ nɛ, Imgbasho kye Ongwan dɛsɔ ni ongyaa wa mban, a mban mi abɔ ola mgbi iMose, 5 owa dulu ama nto mi abɔ ola na tɔ, ikye ni eyi tu ofɛ saan oyɛɛ engwɛ Imgbasho. 6 Ikyegbɛɛ ema li engwɛ nɛ, Imgbasho kye Onodzi mgbi Ongwan dɛsɔ wa kaka itukwu mgbi eyi, Onodzi nkwu ela gbɛɛ, <<Otsɔ, Otsani nani.>> 7 Nghanɛ abu li ofyɛɛ wuba, kpaa ongwɛ; ma dafi abu li ongwɛ nɛ, Imgbasho nu abu kpaa yɛɛ ongye gyokwudɛ.

8 Tugbe ngwi ema ye Imgbasho waba ma, ema li ofyɛɛ mgbi onodzi emi otsitsi ba ntonani. 9 Nghaduu onɛnɛ ngwi ema wa ye Imgbasho, ngwi Imgbasho kpaa di ye ema nɛ, i kyɔnɛ ngwi ema dile kyata lu mbi onodzi ama oshɛshɛ ongwi ɛsɛ nɛ? Ema mina odi yɛɛ ofyan naadi? 10 Ema le nghao gbɛwɛdzɛ egbe yi ofyia bɛyi iyɛ ungwɔ yi onova! 11 Imio wo ani yi ema, i dzɛ dafi ofyaafya mgbi ani ikye ema duu weeni mani.

12 Emi ongwunani, n tɛkyɛ nu ema, yɛɛ dafi ani na, bana ani yɛɛ dafi ema. Ema kyɔ ani obube onyonyi ba. 13 Dafi ema ye ma, ani dzɛ mi ootse onɔ ngwi ani gbɔ Esɔ Osuse nya ema ababɔ mani. 14 Ootse mgbi ani nose li undo mbi ema, nghaduu, ema di ani tsiidza hona fwa ani ba. Kpaa, ema gbɛ ani dafi ema kika gbɛ ongyesɔ mgbi Imgbasho mani; ema gbɛ ani dafi ani li iYesu iKrestu abuon. 15 Atsa ndzɛ ema nose ma kɔ onɛnɛ? N ka kyɔ obwɛndɛ gbɛɛ ni ema ki kyɔ ngha yɔ, ema kika todulu inɛ mgbi ema gbe nu ani. 16 Ani yɛɛ ongyikyili mgbi ema onɛnɛ ikyegbɛɛ di ani nya ema otsitsii?

17 Inggisɛ ntona dzɛ yi oweka ogbe ema luba agya mboma, kpaa li mi mse ba. Ungwɔ ngwi a mina li ogha ema bɛyi eyi, ikyegbɛɛ ni ema kye itukwu byi mboma. 18 I tishi ofyumfye itukwu ni itɔdzɛ ma li osuse yɔ, odi dzɛ ngha alonɔ duu, no ka li onɔ ngwi ani dzɛ yi ema ta ba. 19 Emi ongwani osuse, dafi imba li wulu onɔngwɛ nɛ, li ngha ngwi i le wulu ani ikye ema aani, nghataa sede odzɛɛdzɛ mgbi iKrestu na ka gyutɔ mbi ema. 20 I dzɛ ani gbɛɛ ani ki dzɛ yi ema onɛnɛ di kyata ali yi ema, ikyekyɛ i kaka ani ewo mi odzɛ mgbi ema saan!

21 Nya ani na, ema ama nmina odzɛ abɔ ola mgbi iMose mani, ema ye ungwɔ ngwi ola na gbɔ lo? 22 Bana a lɔ gbɛɛ Abrahan nose dzɛ yi engwengyulɔ efa, onyi mbi ongyaa nli ofyɛɛ, oka ma li mbi ongyaa nli owan yɛyɛ mani. 23 Ongwan mbi ofyɛɛ ma, a mban dafi ali inggisɛ mani; kpaa ongwan mbi owan yɛyɛ na, a mban mi ondu odzɛɛdzɛ mgbi Imgbasho.

24 Ungwɔntonɛ li otso ambɛ ta, engyaa ntonɛ gbikye ondu odzɛɛdzɛ nghi efa. Ondu odzɛɛdzɛ oka kyɛ mi Unggwɔ mgbi iSinai imbe ngwi a kye ola mgbi iMose nu nani, emi ongwan duu li ofyɛɛ. Nana li ondu odzɛɛdzɛ mgbi iHaga joaali. 25 Nghanɛ iHaga dzɛ dafi Unggwɔ mgbi iSinai mi Arabia mani, o gbikye ogalu iJerosalin ongwi onɛnɛni, ikyekyɛ iJerosalin dzɛ mi ofyɛɛ yi ɛngbɛ mgban duu. 26 Nghaduu iJerosalin ongwi esho li ofyɛɛ ba, di li onɔ eyi aali. 27 Bana a lɔ mi Afɛ gbɛɛ: