Okyɔɔkyɔ 2

Obaaba mgbi Onodzi Osaan

1 Ngwi egbe iPɛntikɔsu[a] wa gyɔ nɛ, ama duu kwakye mbonyi. 2 Vla nɛta adu kyɛ esho dafi onikyawo wa yaokɛ ozu ngwi a sɔto mani. 3 A di ungwɔ ndzɛ dafi amoola ganya wa dɔkɛ ikye mgbi ama duu. 4 Ama duu si mbwo yi Onodzi Osaan man wita le gbɔ ondudzɛ angbeka dafi Onodzi kye ma teyi mani.

5 Mi onɔ na, emi iJuda ama ndzɛ yi imio mgbi Imgbasho kyɛ mi ayɛsɛ duu wa kwakye mi iJerosalin. 6 Onɔ ngwi a fwo adu nɛ nɛ, ibyi inggisɛ kwakye. Nghaduu i kwulu ma ewo, ikyekyɛ ali inggisɛ fwo ma le gbɔ ondudzɛ mgbi ongwu. 7 I kwulu ma ewo kpakpa, a si byita gbɛɛ, <<Inggisɛ ama nle gbɔdzɛ ntonɛ duu li emi iGalalia baa? 8 Ma i kyɔsinɛse ngwi eyi fwo ama duu le gbɔ ondudzɛ mgbi eyi? 9 Emi iPatia, iMede yi Elami; iMesopotamia, iJudia bɛyi iKapadosia, iPontu yi Asia, 10 iFrijia yi iPamfyilia, Igyibiti bɛyi ayɛ mgbi iLibyia kwɛkwɛ yi iSereni, ingyoga mgbi iRoma 11 (yi emi iJuda bɛyi ama ngwu kyatitukwu yɛ le sunu Imgbasho mgbi emi iJuda duu), emi iKrete bɛyi emi Arabia, eyi fwo ma le gbɔ ungwɔ okwulewo mgbi Imgbasho mi ondudzɛ mgbi eyi!>> 12 I kwulu ma ewo a di wɛndɛ, a si byi ewoma gbɛɛ, <<Ungwɔnɛ tso sinɛ?>> 13 Angbeka gbɔ ibwa nya ama onoyɛyɛ ntona gbɛɛ, <<A wa ɛbyɛ le fya.>>

IPyita gbɔdzɛ yi ibyi inggisɛ

14 Nɛ iPyita kyato dzɛkunto yi iwyodonyi ntonani, kyile ela mgban gbɔdzɛ yi ibyi inggisɛ ntona gbɛɛ: <<Emidani emi iJuda bɛyi ema ama nto iJerosalin duu, detse nin gbɔfwɛ odzɛ nɛ nya ema; gadɔ saan mi odzɛ ngwi ani le nya ema nɛni. 15 Inggisɛ ntonɛ le fya ɛbyɛ, dafi ema tsɛwɛ na ba. Kwa li obyi egyanɛ mi egbegbe ta aani! 16 Ei, ungwɔnɛ li ungwɔ ngwi oyegbɔ iJowɛ tsekise gbɔn dzɛ esɛ gbɛɛ:

17 << <Imgbasho gbɛɛ, mi egbe ongwi olɛlɛ,

ani ka kye Onodzi mgbi ani yaokɛ mbi ali inggisɛ duu.

Engwɛ ema engyulɔ yi engyaa kale yegbɔ,

ɛngbɛ mmafa mgbi ema kale di inɛ odiidi,

engyukwo mgbi ema kale woowo elela.

18 Mbi engbidɔ mgbi ani kpaa,

engyulɔ yi engyaa duu,

n ka kye Onodzi mgbi ani yaokɛ

mboma mi egbe ntonani,

man a ka yegbɔ.

19 N ka kyɔ ambɛ okwulewo mi esho

mbyoo bɛyi ungwɔ ama okwulewo mi iteesɛ,

otso gbɛɛ di ani dzɛ yi mfye.

N ka tiika mi ɛsɛ adzi ni inggisɛ ngwɔ ewoma,

ola dika gbimbe sɔ yi iwu.

20 A ka kyata onɔ yɛɛ iyifu,

di kyata ofyia yɛɛ eyi duuse ni egbe oshewo

bɛyi okwɔkwɔ mgbi Otsɛ no ba.

21 Nghanɛ ali inggisɛ nkwu mi iyi mgbi Otsɛ

duu ka tu owatɔ.>

22 <<Emi Israi, gadɔ mi odzɛ nɛ na; iYesu ongwi iNadzareti nose li inggisɛ ngwu Imgbasho gbela yan di kyɔ ambɛ okwulewo mbi ema nyɛ mbon, dafi ema abuema ye mani. 23 Inggisɛ nɛ a kyon wo ema abɔ mi owitukwu mgbi Imgbasho bɛyi oye-ye mgban; ma ema noofɛ ni emi imbali, gbokwon ngwɔn mi ekwatsi. 24 Nghaduu Imgbasho kyilon mi ikwu, dulun tɔ mi owulewo mgbi ikwongye, lubana li kyɛmɛ-kyɛmɛ ni ikwongye bwan adi ba. 25 IDevedi gbɔdzɛ mgban gbɛɛ:

<< <Ani di Otsɛ dzɛ yi ani alonɔ duu.

Ikyegbɛɛ o dzɛ abugye mgbi ani nɛ,

ani ka teeyi ba.

26 Nghanɛ itukwu mgbi ani shɛta

idɛ mgbi ani di dzɛ yi atsa;

ikpewo mgbi ani kpaa ka dzɛ mi ɛwɛ ogbebyi,

27 lubana abu ka dzita ani mi endzi ba,

hona abu ka dzita

Ongwabu Osaan no bwa ba.

28 Abu nu ani ye ofɛ oshishe;

abu ka mbwo ani yi atsa mi

ifafɔ mgbi abu.>

29 <<Emi ongwunani, ani ka nya ema yi abɔ otsigɛgɛ gbɛɛ iDevedi nli ikye mgbi ema na kwulu a kyon ndzi, ma endzi mgban dzɛ mmɛnɛ nghataa ba inɛ. 30 Kpaa ongwu nose li oyegbɔ di ye dafi Imgbasho zondu yan kpɔklɔɔ gbɛɛ ongwu ka wa kye ongwiba mgban oka sɔkɛ itsuutɔ mgban mani. 31 Ngwi iDevedi di ungwɔ ndzɛ iyayi nɛ, o gbɔdzɛ okyɛɛ-kyɛɛ mi ikwu mgbi iMedzaya nani, gbɛɛ a dzanta mi endzi ba, naadi ikwɔ mgban bwa ba. 32 Imgbasho teyi kyile iYesu nɛ luba oshishe, ma eyi duu li obwɛndɛ mgbi otsitsi nɛni. 33 A kyilon esho sɔkɛ abugye mgbi Imgbasho, o gbɛ Onodzi Osaan ngwi Otsɔn zondu mani di kye ungwɔ ngwi ema le di diyɛ fwo onɛnɛ nɛ yaokɛ. 34 Lubana li iDevedi nose lu esho ba, nghaduu o gbɛɛ,

<< <Otsɛ Imgbasho gbɔ yi Otsɛ mgbi ani gbɛɛ:

<<Sɔkɛ abugye mgbi ani

35 nghatakata ni Ani nu engyikyili mgbi abu yɛɛ

itse mgbi abu ogbe afɔ dɔ ele.>> >

36 <<Ikyenghanɛ emi Israi duu nu ma ye ungwɔnɛni: Imgbasho nu iYesu, ngwu ema gbokwon mi ekwatsi nɛ, yɛɛ Otsɛ bɛyi iKrestu.>>

37 Ngwi inggisɛ ntonɛ fwo odzɛ nɛ nɛ, eka dzɛ loma ta a byi iPyita bɛyi ama ogbikye iYesu angbeka ntona gbɛɛ, <<Emi ongwuneyi, eyi ka kyɔsinɛ?>>

38 IPyita nu uka gbɛɛ, <<Kyatitukwu nu ma kyɔ ema iBatisima, mi iyi mgbi iYesu iKrestu mi ikye odzita ema yi ali ibwubwe. Ta ema ka gbɛ umba mgbi Onodzi Osaan. 39 Ondu odzɛɛdzɛ nɛ dzɛ ikye ema yi emi ongwɛ ema bɛyi ama nto mbombo ikye ama ngwu Otsɛ Imgbasho mgbi eyi ka kwu ma ela duu mani.>>

40 O di kwo ma adɔ yi elodzɛ angbeka kwuba; di tɛkyɛ nu ma gbɛɛ, <<Dulu ewema tasɛ mi ungwɔ nka wa kyɔ etɔ obube nɛni.>> 41 Ama ngbɛ esɔ mgban ma a kyɔ ma iBatisima, i mɛ inggisɛ idubu eta mbwokɛ mbwo mgbi ama mi egbe nani.

Okwakye mgbi ama onoyɛyɛ

42 A kye ewoma tswokɛ mi otsootso mgbi ama ogbikye iYesu bɛyi okwakye, ungwogye ogyeegye yi ewoma, ibredi oghaagha bɛyi ibɔ obɔɔbɔ. 43 I kwulu ali inggisɛ duu ewo, ama ogbikye iYesu ntona di kyɔ ambɛ ama okwulewo gwuba. 44 Ama onoyɛyɛ duu to yi eka di li kyɔ alungwɔ duu ungwonyi. 45 A kye ungwɔ ngwi ama dzɛyan bɛyi okye duu gya, di gha nu ali inggisɛ duu dafi okakewo mgbi otsungwɔn dzɛ mani. 46 Alegbe a li kiyayi okwakye yi ewoma mi ifyudɛ ozu okwukwo osunu Imgbasho mi iJerosalin. A li gha ibredi mi udɛ mgbi ama di li gye yi ewoma mi atsa yi itukwu onyi, 47 le tsɛ Imgbasho dile tu mgbede mbi inggisɛ duu. Nɛ Otsɛ Imgbasho sile mbwo ama ngwu o dulu ma watɔ ma mmbwo alegbe-alegbe.

<- Okyɔɔkyɔ 1 Okyɔɔkyɔ 3 ->