1 IPol yi iBanabasi ka kaka ozu okwakye mgbi emi iJuda mi iKonu dafi a teyi li kyɔ mani. Mi ele ma a gbeesɔ saan ta mmbwo inggisɛ kwuba mi iJuda bɛyi Udzengye onoyɛyɛ. 2 Kpaa emi iJuda ama nfwa onoyɛyɛ ntona kwo Udzengye ntona wo nu ma kyitingga yi iPol bɛyi iBanabasi. 3 Nghanɛ iPol yi iBanabasi kye onɔ kpakpa mi ele, le gbɔdzɛ mgbi Otsɛ mi ododa. Otsɛ tso gbɛɛ esɔ mgbi elela mgban na li otsitsi mi onu ma mfye okyungwɔ bɛyi ambɛ ama okwulewo. 4 Emi ogalu na gheefa, angbeka yɛ agya mgbi emi iJuda, angbeka yɛ agya mgbi ama ogbikye iYesu. 5 Ta Udzengye yi emi iJuda bɛyi engyukwo mgbi ama duu, wibu onu iPol bɛyi iBanabasi adzɛ di tsɛ ma akwutsɛ. 6 Nghaduu ngwi a wa ye odzɛ ele nɛ a tsinya lu iLikonia igeli mgbi iListra bɛyi iDebe bɛyi ɛsɛ ama nkpakɛkɛ won, 7 dika gbeesɔ osuse mi imbe ntonani.

8 Inggisɛ oka dzɛ iListra waawaa afɔ, tummya kyɛ ifu di kyikyɛ ye ba. 9 O kye adɔ ge le fwo iPol dafi o le gbɔdzɛ mani. IPol kye inɛ byin yɛyɛ, difwi gbɛɛ o dzɛ yi oyɛyɛ onuunu ongyɛlun ootse, 10 si kwu ela tɔ gbɛɛ, <<Kyato dzɛkunto mi afɔ mgbi abu!>> Mi elodzɛ nɛ, inggisɛ na ta lu esho si wita okyikyɛ.

11 Onɔ ngwi ibyi ntona di ungwɔ ngwi iPol kyɔ nɛ, a wulu mi ondu iLikonia gbɛɛ, <<Imgbasho gbeka ba mbi eyi mi odzɛɛdzɛ mgbi inggisɛ owamyɛ wa!>> 12 IBanabasi a kwun gbɛɛ iDzeu, a di kwu iPol gbɛɛ iHɛmɛ[a] ikyesinɛ o li inggisɛ oteyi odzɛ ogbɔɔgbɔ. 13 Ta inggisɛ ofifɛ mgbi imgbasho mgbi iDzeu, ngwu ozu ofifɛ mgban dzɛ kyila yi igeli okwukwo nani, ba yi engyulumnda bɛyi ofumbu wa to onufɛ ogalu igeli ikyesinɛ ongwu bɛyi ibyi inggisɛ ntona mina ofifɛ nu iPol bɛyi iBanabasi.

14 Nghaduu ngwi iPol yi iBanabasi fwo ungwɔnɛ nɛ, a fawa angwuto mgbi ama tsinya kaka idzidzɛ ibyi inggisɛ, le weela gbɛɛ: 15 <<Engyulɔ, kyɔsinɛ ngwi ema le kyungwɔnɛ nghaa? Eyi kpaa li inggisɛ owamyɛ ta dafi ema mani. Eyi kye esɔ osuse nɛ le wa nu ema, le nya ema gbɛɛ ni ema kyata mi ayayi ungwɔ ntonɛni luba mbi Imgbasho oshishe, ongwu nta esho yi esɛ bɛyi ekyoo okwukwo bɛyi alungwɔ ama nto efu duu nani. 16 Tugbe ma, Imgbasho li nu ali ɛsɛ duu kyɔ owitukwu mgbi ama. 17 Nghaduu o li nya okye ewon tso ma ba. O tso ema mse mgban mi onu ema mmbwo di nu etɔ ungwogye she mi onɔ mgban; o nu ema ungwogye kpakpa di mbwo ema yi atsa mi itukwu.>> 18 Yi elodzɛ ntonɛ duu kpaa, i fyi ma mfye okwɔ ibyi inggisɛ ntona ofifɛ nu ma.

19 Ta emi iJuda angbeka kyɛ mi Antiɔku bɛyi iKonu wa kwolu ibyi inggisɛ luba agya mgbi ama. Nɛ a tsɛ iPol akwutsɛ di kwon tasɛ mi ogalu nani, le tsɛwɛ gbɛɛ o kwulu. 20 Kpaa ngwi engwafɔ wa kpakɛkɛ won nɛ, o kyato diyɛ lu ogalu nani. Tegblifan ma ongwu bɛyi iBanabasi dzata imbe na lu iDebe.

21 A gbeesɔ osuse mi igeli okwukwo nani di tu inggisɛ ama onoyɛyɛ kwuba. Man a yɛ lu iListra, iKonu bɛyi Antiɔku, 22 a yile engwafɔ dzɛ ofɛ di kwu ma ɛwɛwo gbɛɛ nu ma noyɛyɛ mi otsitsi. A di nya ma gbɛɛ, <<Eyi ka nyɛ mi adzɛ kpakpa ikye okaka esutɔ mgbi Imgbasho.>> 23 IPol bɛyi iBanabasi dulu engyukwo nu ma mi ali okwakye mgbi emi iKrestu duu, yi ibɔ obɔɔbɔ bɛyi ondu otukwu-tukwu, a kye ma dubɔ Otsɛ, ongwu a kye oyɛyɛ onuunu mgbi ama byi mbon nani. 24 A nyɛ ongwi iPisidia, a wa kaka iPamfyilia, 25 ngwi a gbeesɔ mi iPega ngyɛ nɛ, a kye ikye dɔ lu Atalia.

26 Mi Atalia ma a dzɛkyo mi uwaa yidɔ lu Antiɔku, imbe ngwi a kye ma dubɔ elela mgbi Imgbasho mi ikye idɔ ngwi a kyɔ ngyɛ nani. 27 Ngwi a kaka imbe na ma, a gbe emi iKrestu kwakye mbonyi di nya ma alungwɔ ngwi Imgbasho kyɔ nyɛ mbi ama, dafi o di kwulu ofɛ mgbi oyɛyɛ onuunu mbi Udzengye kpaa mani. 28 A si dzɛ yi engwafɔ mi imbe na onɔ tunto.

<- Okyɔɔkyɔ 13Okyɔɔkyɔ 15 ->