Dora Nama Lukde Feiaga

Dora agfereaga

Sige dora nama Lukde feiaga baba kegewenan baba, Jisas nu Israel ferewar tugu eib ferewar tugu igaingegi fere. Jisas nugeab fünai siradgaberegi sese gam, ferefinabur menüm wangeaga, Jisasde kogiwab ferewar gam Keriabüb dora nama pitoiebüregar, Etob Kedebüde nugeab kob siradgabereaga (Luk 4.18 baba kegewane). Baba kürüna kainana, budi meme gam, ferefinabur kub adab adab kemegigirawedi, Jisas nugede ferefinaburure kororabgüdi nini gam nama kabia geaga babaure, Lukde epürafanam dora mangarge.

Jisas nugede kabia kabia geaga babade gar, Jisas nugeab gin nugeure kürüna ebebearwegin. Mariade Jisas sinoyeaga sese gam, ferefinabur ebebearwegin (1.42-48 baba gam tugu 2.10 baba gam tugu kegewane), boro kenegegi gamba, Jisas nuge fib nama gam komeaga sese gam nini namana ebebearwegin (24.52 baba kegewane).

Jisas nugeab büregi kabia kabia baba, Lukde gürena doramangeaga. Baba kabia kabiab doraman baba, budi gürekoi gam bürarge. Jisas kübüdim gam taideaga sese gam, daba daba tataigeaga baba, Lukde gürena daba daba epürafanamure doramangeaga. Samaria ferede, fere güre erekobo gam darab dar kegeudi saguweaga babab komina dora, Jisasde pitoiaga baba, Lukde gürena feiaga. Baba tugu nono eme ebgadüdi uguna uguna urikasaweaga babab komina dora tugu, Jisasüb komina dora güre güre tugu Lukde gürena feiaga. Sakius, fere kegeam düfaigeaga baba fere gam kabia taideaga babab doraman tugu Lukde gürena feiaga.

Daba güre güreure tugu, Luk nu dora epürage tugu, güre baba sogsogi sibdibwegib kabiaure tugu dorageaga, Etob Kedebüb saruaure tugu dorageaga, Keriabüde ferefinaburüngab menmen unaigegi kabiaure tugu dorageaga. Baba tugu finaburde kabia kabia gen babaure tugu dorageaga, Luk nu dora epürage tugu.

Luküb dora baba budi meme gam gürena kenegarge. Kene. Sige dora turewegiwarüngab fünaigüdi yanbafaigena baba budi, Lukde gürena feiaga. Baba budi, Jisas kekia fib nama gam komeaga sese gam, dora turewegiwarde kabiagegin babaure doramangeaga.

1 [a]Eregeam Tiofilus, na ede. Egime Keriabüde daba daba gürenakuti sin kodigo taiberar taideaga babaure, fere epürade nugengab kube fururugüdi doraman feien. 2 [b]Ferewar nugengab egede daba daba omogamnana tataigar kegewenwaib, baba ferewarüngab dora daiwen. Baba ferewar Keriabüb dorab saina ferewar sibe bürüdi, doraman baba, wasigen. 3 [c]Bangar ye tugu, doraman meme feiebüregün, bangüdi na gam sugurur ogureregeaga. Ye baba daba daba gürenakutib ginimure egimenana fünaiudi idadau totogünwaib. Mügar ye baba daba daba tataigen baba sibenana surur fein. 4 Dora sarigabürünen baba, baba gürenakuti kainana. Na ninaidiba, idadau sibamgeregün.

5 [d]Herot Judiawarüngab erekokayau büreaga sese gam Keriabüb kobegegi fere güre büreaga, yanim nub Sekaraia. Nu Abiyab gingamnab, Keriabüb kobegegi fere. Nub fia Aronüb gingamnab, finegeb yanim baba Elisabet. 6 [e]Nugeküre Keriabüb ege gam idadau büren. Bangar nugeküre Erekokaib kabia gürenakuti tugu dora gürenakuti tugu daiwafaigen, bangar nugeküre ege nub gam menmen kene büren. 7 Bangeagako, nugeküre mogoi kene, amure, Elisabet nu kedemai. Bangar nugeküre goyam abüdigen.

8 [f]Sese güre gam Sekaraiab gin, Keriabüb fata gam kobegebüre kümünen, bangar Sekaraia tugu Keriabüb ege gam kobe fünaiweaga. 9 [g]Bangar nini Erekokaib kobegegi fere wonide, kumaub bai kebur kuri nama tugu ferebeaga, baba fere fitawebüre ai magi epürawen. Bangar nini baba epüra gamde Sekaraia kaiwen, bangar nu bai ferebüre iruweaga. 10 [h]Baba bai fereg sese gam, ferefinabur epüra kedeb fata obgoime gurudi bürüdi sibdibwa büren. 11 Bana bangar Erekokai Keriabüb dora dugurewegi fere güre Sekaraia gam taideaga. Bangüdi kumaub kebur kuri nama tugub, bai feregib kurub kube namayau biboudi büreaga. 12 [i]Sekaraia Keriabüb dora dugurewegi fere kegeudi, tergüdi kimigeaga. 13 Bangeagako, Keriabüb dora dugurewegi ferede menüm waweaga, “Sekaraia, na kimigegena. Keriab nab sibdib edfotuweaga. Fian Elisabet nono sinoyeregeaga. Bangar na nub yanim Jon yanübaue. 14 Bangar nab kob nama bürar nag ebebearweregün. Bangar ferefinabur epüra nono baba taidegi gam ebebearweregen. 15 [j]Amure, nu Erekokaib ege gam yanim erekokai deregeaga. Nu wain mum, kida yag tugu neregarge. Nu anab sibim gam büreaga baba sese gam, Etob Kedebüde korobaweaga. 16 [k]Nude bangar Israel ferefinabur epüra kob pirudi, nugengab Erekokai Keriab gam kümüneregen. 17 [l]Nu Elaijab kabia tugu, sogi tugu düdi, nuge kese agfürüdi kümüneregeaga, bangarie Erekokai kuri daiweregeaga. Nude emnügmana tugu mogoi toi tugu kob gürena gam difürüngeregeaga. Bangüdi dora biregawaigen baba ferewarüngab ututun idabereregeaga, bangar fere namab ututun sibe büreregen. Bangar ferewar ekotagaberar, Erekokai ogureregeaga baba, momoudi büreregen.”

18 [m]Bangar Sekaraiade Keriabüb dora dugurewegi fere menüm waweaga, “Ye aranüm nab dora baba kainanagüdi sibamgüi? Ye goyamügafotün, fiai tugu nu abüdigeaga.”

19 [n]Bangar Keriabüb dora dugurewegi ferede dora menüm toweaga, “Ye Gebriel, ye Keriabüb ege gam bibougafaigün. Keriab nugede suguryar ye wanebüre oguran. Bangar dora nama fanam meme dünebüre na gam oguran. 20 [o]Bana ede. Na yeb dora kob kainanagabge babaure, mügar nab sube gütügar dorageregabge, kümüna baba daba daba gürenakuti taifotuwarie. Dora yeb meme nugeab sese gamie taideregeaga.”

21 Kedeb fata gam amdag daba taidar, Sekaraia bata büreaga. Bangar ferefinabur dagodaiudi, ututun toitoiudi büren. 22 Bangar kuri füraboudi, nini gam doragegi dirugweaga. Bangar nini sibamgen, Keriabüb fatagoime daba aranümdag kegeweaga. Nugeab kube gamde gürena nini keab dorageaga. Amure, nugeab sube baba gütüweaga. 23 [p]Kuri, Sekaraia nugeab fünaiwegi sese kenegarbere, nugeab fib gam maigüdi kümüneaga. 24 Bangar kuri fia Elisabet mube kub tugu gar, edina taba tugu iwagüdi büreaga. Elisabet menüm wageaga, 25 [q]“Egime ye mogoi kene gar maiagün. Bangeagako, Erekokaide ye nirarayeaga. Babaure, mügar ye mube kub tugu, bangar babade yeb maia, ferefinaburüngab ege gam kenegafotuweregeaga.”

26 Elisabet mube kub tugub edina kubete gam, Keriabüde nugeab dora dugurewegi fere Gebriel sugurwar, Nasaret kümüneaga. Nasaret nu Galili distrik büreaga. 27 [r]Momugo güre Devitüb gingamnab fere güre debüre dora idafotuwenwaib baba gam kümüneaga, yanim nub Josep. Momugo babab yanim Maria. 28 [s]Bana Gebriel nu gam kümünadi menüm waweaga, “Momugo, na büründe? Erekokai naküre bürüdi, unun dünüdi tauneaga.” 29 Maria dora baba edüdi, tergüdi menüm utungeaga, “Dora meme aranüm?”

30 Bangar Keriabüb dora dugurewegi ferede menüm waweaga, “Maria, na kimigegena. Keriab nu kob düneaga. 31 [t]Ede. Na mube kub kaiudi nono güre sinoyeregün. Bangar nub yanim Jisas yanübaue. 32 [u][v]Nu eregeam büreregeaga. Bangar Keriab Kekia Asaub Nono güdi yanübaweregen. Bangar Erekokai Keriabüde, oyebeb Devit sibe erekokayau difereregeaga. 33 [w]Nu Jekopüb gin toib erekokayau tüpür büreregeaga. Bangar nub koroba baba, kenegeregarge.”

34 Bangar Mariade Keriabüb dora dugurewegi fere menüm totoweaga, “Baba daba aranüm taidebeaga? Ye fere güre küre kinürge.”

35 [x]Bangar Keriabüb dora dugurewegi ferede dora nub menüm toweaga, “Etob Kedeb na gam ogureregeaga, bangar Keriab Kekia Asaub sogide korobaneregeaga. Bangar kuri nono sinoyeregün baba, nu Keriabüb fere nama, idadau bürar, Keriabüb Nonogüdi yanübaweregen.

36 “Ede. Anin fanam Elisabet abüdigfotuweagako, nu mube kub tugu gar nono sinoyeregeaga. Egime mogoi sinoyafaigargegenko, mügar nu mube kub tugu, edina nub kubete tugu kenegeaga. 37 [y]Am daba güre Keriabüde gegi dirugweregarge.”

38 Bangar Mariade menüm wageaga, “Edün. Ye Erekokaib sarua finege. Nu ye gam nag wagün sibe geregeaga.” Bangar Keriabüb dora dugurewegi fere nu uriaudi kümüneaga.

39 Baba sese gam Maria pirikanana siradüdi, Judia distriküb gir toi gam bag komeaga. Bangüdi fib ere güre bag büreaga baba gam kümüneaga. 40 Bangüdi Sekaraiab fata gam iruwaboudi, Elisabet ferebereweaga. 41 [z]Elisabet Mariab ferebere baba edar, nono Elisabetüb sibim gam büreaga baba kutuweaga. Bangar Etob Kedeb Elisabet korobaweaga. 42 [aa]Bangar Elisabet sogsogi igyogüdire wageaga, “Keriabüde unun düneaga, baba unun finabur gürekoi dünügeaga baba emegerweaga. Bangar nono nagüb sibim gam büregeaga baba, nu tugu Keriabüb unun deaga. 43 Ye won gar, igeab Erekokaib ana ye gam ogureaga? Ye finege tün tugubge. 44 Edün. Kagub yeb nab ferebere edegi sese gam, nono yeb sibim gam büreaga baba, nu tugu ebebearudi kutuweaga. 45 [bb]Na Erekokai nugede waneaga baba sibenana geregeaga, babaure na kob kainanagün, babaure na ebebearue.”

46 [cc][dd]Maria menüm wageaga,

56 Maria Elisabet küre edina küidag banüm büreaga, bangüdie nugeab fib gam maigüdi kümüneaga.

57 Elisabet mogoi sinoyegib sese taidar, nono sinoyeaga. 58 Elisabet nugeab fib büreabmana tugu, nugeab giniabmana tugu, Erekokaide Elisabet nuge niraraweaga baba doraman edüdi, Elisabet keab ebebearwen.

59 [ll]Dü düm kenegarbere nonob mube sike katuwebüre oguren. Yanim Sekaraia duwebüregen, emeb yanim sibe. 60 [mm]Bangeagako, nonob anade wageaga, “Kene. Yanim nub Jon yanübaub.” 61 Bangar wawen, “Ninagüb ginyanügmana güre yanim babanüm kene.” 62 Bangar eme kubede gürena totowen, nu nono am yanim duwebüregeaga. 63 Wanügar taper mara güre düdi oguredi dora feieregeaga, bangedi dora menüm feiaga, “Nub yanim Jon.” Bangar ututun toitoiwen. 64 Bangar pirikanana Sekaraiab sube maig taiboyeaga. Bangar doragüdi Keriabüb yanim siradgabereaga. 65 Bangar nugeab fib büreabmana gürenakuti, baba daba adab taideaga baba kegeudi kimigen. Bangar baba daba daba gürenakutib doraman baba saraudi fib gürenakuti, Judia distriküb gir toi gam büren bag kümüneaga. 66 [nn]Fere gürenakuti doraman baba edüdi, ututun toitoiudi menüm totogen, “Kuri nono baba fere aranüm taidebeaga?” Nin sibam, Erekokaib sogi nuküre büreaga.

67 [oo]Bana Etob Kedeb nono babab eme Sekaraia gam gobeaga, bangar kiari dora menüm wageaga, 68 [pp]“Erekokaib yanim siradgaberegi, Israelüb Keriab. Nude oguradi sige nugeab ferefinabur sagsigüdi maig igaisigeaga. 69 [qq]Sige Maig Igaisigegi Fere güre sogi tugu, Erekokaide Devitüb gin gam, taibereaga. Devit nu Erekokai nugeab saina mogoi. 70 [rr]Nuge egimenana nugeab kiari ferewar dora dünügar doragafotuwenwaib sibe. 71 [ss]Sige sigeab karauyasigmanangab kube gam tugu, sigeure kob koigafaigen baba ferewarüngab kube gam tugu, nugede maig igaisigeregeagagüdi wageaga. 72 [tt]Nuge sigeab matuwasigmana nirarangüdi sagüngeaga. Babaure nuge egime dora idafotugeaganwaib baba, nugeab utun gamnana büreaga. 73 [uu]Nuge sigeab matuwasig Abraham gam kürüna kekiagüdi wageaga, babaure nuge egime wageaga sibe, mügar sige gam gebüregeaga. 74 [vv]Nu sige maig karaungab kube gam igaisigebüregeaga, bangar sige nugeab fünai düdi kimigegige. 75 [ww]Babaure sige sese gürenakuti omo bürenan baba, nugeab ege gam kabia surur surur gam urigegi, bangar nuge kabia nama nama nimeweaga baba, sige gam goberegeaga. 76 [xx]Nono, na ba, kuri Keriab Kekia Asaub Kiari fere güdi yanübaneregen. Nade Erekokai nugeab erekobo daiebüre agfereregün. 77-79 [yy]Nade nugeab ferefinabur sarigabürüngab, nugeab nirara erekokai baba sibamgeregen. Keriab nugengab menmen unaigafotudi maig igaingebüregeaga. Fere gituwegi gam büren tugu, fere kumegure kimigen gam tugu, baba meram dünügebüre fib nama gamnab suboyegi sugurwar sige gam ogureregeaga. Nuge sigeab kebe sururgar, sige kob ebebear erekobo gam urigegi.”

80 [zz]Kuri nono baba adagar, Etob Kedebüde sogi duweaga. Bangar nu kümüna fib fere kene gam büreaga. Bangüdi kuri Israelwarüngab ege gamie, agüba taideaga.

LUK 2 ->