8
Jisas narp pris ondoh nanah moihlaꞌ
1 Sng 110.1Wusyep tehei kin ŋaiye ŋam manange pe, ki taꞌe leꞌe, pris ondoh poi, kin narp syep non tikin Miyeꞌ Ondoh kin, ŋaiye narp luh yilihe nanah moihlaꞌ pe, Got naŋaꞌe naŋ embere.*Pris ondoh pe, Jisas, kut Miyeꞌ Ondoh kin Got. 2 Kin ŋende wah taꞌe pris ondoh nanah moi yirise supule nato yokoh sel tikin Got. Yukur miyeꞌ pakaiye ŋahraꞌe yokoh sel yirise luku, pakai. Got kitikin ŋahraꞌe yokoh sel luku me wah kin ŋilyehme. 3 Wah lenge pris ondoh ŋaiye ka yenge yowor yende ofa topoꞌe ŋaiꞌe ŋaiꞌe bwore yilme Got. Taꞌe luku pe, pris ondoh Jisas topoꞌe ŋende ofa. 4 Ŋaiye ka orp kekep pe, yukur ka se orp tuꞌe pris, pakai. Detale, lenge pris syeꞌ titinge bamtihei Livai si yarp kekep pe, tinge ŋilyehme yaŋaꞌe yitini wula wula yalme Got jande wusyep erŋeme tikin Moses.†Jisas yukur bamtihei tikin Livai. 5 Kis 25.40Tinge yende wah yarp yato yokoh lotu ŋaiye sai kekep sasambe yipihinge jande ŋaimune ŋaiye nanah moihlaꞌ. Ki ŋahilyeh taꞌe ŋaiye Got ŋaname Moses, “Ŋupe ŋaiye na ende ŋaiꞌe ŋaiꞌe lalme el oto yukoh lotu sel pe, nin na ende gunde yipihinge ŋaiye ŋam yasam nin manar manah hwate.” 6 Kom tukwini pe, Jisas si nambaꞌe wah pris pe, wah kin nengelyembe wah pris tinge. Detale, kin narp taꞌe ŋaiye miyeꞌ bumbe ŋaiye ŋende bongolme kontrak ambaran. Kontrak ambaran uku ki nengelyembe kontrak telei ŋaiye somohonme. Detale, wusyep tupwaiꞌ ambaran tikin kontrak ambaran nengelyembe wusyep tupwaiꞌ tikin kontrak telei.
Kontrak ambaran ki nengelyembe kontrak telei
7 Ŋaiye kontrak ŋendehei ka bwore bwarme pe, yukur tatame ŋaiye Got ka ende kontrak ambaran. 8 Jer 31.31-34Kom Got kitikin ŋetekeꞌe kontrak telei yukur bwore pe, ki ŋanange na,
Yusyunde! Ŋam si malaŋatme ŋup ende
ŋaiye ma mende kontrak ambaran
motop lenge bamtihei Israel topoꞌe Juta.
9 Kontrak eꞌe yukur ka se ŋahilyeh tuꞌe kontrak telei
ŋaiye somohon ŋam mupwaiꞌe motop lenge loumwah tinge
ŋaiye ŋam marpe syep tinge menge lenge mase Isip mate tas.
Kom tinge yukur jande kontrak ŋam pe,
ŋam Lahmborenge mangang lenge teket.
10 Kom kontrak ambaran ŋaiye mindemboi ma mende
motop lenge miyeꞌ tuweinge Israel pe, ŋam Got manange taꞌe leꞌe:
Ŋam ma mende tinge ka ŋoiheryembe wusyep erŋeme ŋam pe,
ka yohor tihiꞌ yoto ŋoihmbwaip tinge.
Pe ma murp tuꞌe Got tinge pe,
tinge ka yurp tuꞌe lenge miyeꞌ tuweinge ŋam.
11 Ŋup uku pe, lenge mitiŋ pakaiye topoꞌe lenge mitiŋ
ŋaiye yambaꞌe naŋ embere, tinge lalme se ka sisyeme
nange ŋam Got tinge.
Yukur miyeꞌ ende ka ini lenge ŋemei lakai toꞌ kin
ŋaiye tinge ka sisyeme Lahmborenge.
Detale, tinge lalme si sisyeme Got.
12 Ŋup uku pe, ŋam ma ŋoihsipe hwap tinge pe,
ma mongohe hwap ŋaiye tinge yende pe,
yukur ma plihe ŋoiheryembe pupwa tinge.
13 Wusyep uku pe, Got kin ŋanange nal me kontrak ambaran. Kin ŋende kontrak endehei si nal telei ko. Pe ŋaimune ŋaiye si telei no, nala miꞌe pe, yukur ka se plihe si, pakai.
<- HIBRU 7HIBRU 9 ->