Wrkapm a Pol nira eng

Pilimon

1 Oi, Pilimon yek alkupm! Kil kil kupm Pol kilke, kupm akwap a Krais Sisas, kolpa atom tu awiyopm ayekul rpma wan tipmining kilke, ti kupm nira wrkapm kil kai eng kitn pake. Kupm nampokgen Timoti, melnum almentepm a mentepm ukipma Krais, mentekg nikgwalpm arkenteitn rka, kitn melnum a mentekg plan ipma wor wasrongenteitn a minto akwap wris a Krais. 2 [a]Wa mentekg uk wor Apia, muikgmayen wor amentepmen a mentepm ukipma Krais. Wa mentekg uk wor Arkipus, melnum a mentepm akwap wris arki kaikuten talpulng wrong, wa mentekg uk wor tu melnum a ukipma Sisas Krais a kaingkai takwem rka wris kai wan akitn eng atning yangkipm a Maur Wailen. 3 Mentekg oklala naki Maur Wailen, Yan amentepmen, nampokgen Wailen Sisas Krais, tuwekg mpa plan ipma wor ik ngklinsepm a ntokg ipmanikg akipmen pa rki kukula meen wor.

Pol kil atopen nikgwalpm wor a Pilimon

4-7 [b]Kupm atning a kitn Pilimon, kitn melnum alkupm a mentepm ukipma Krais, kitn ukipma, a kitn uk kitn alkitn pa kai Wailen Sisas pa. Wa kupm atning kitn plan ipma wor wasrongen tu wrong kin kipman a Maur Wailen pa. Kitn angklinsen atom tu awi titnongket wor. Yangkipm a kupm atning a kitn akwap wor kolpa, pa ak titnongketel ipma akupmen ti yat, kolpa atom kupm atopen. Kolpa atom akangklei kupm uk wor Maur Wailen akwonalmpenteitn ak wang a kupm oklala naki Maur Wailen akupmen pa. Kupm oklala naki Maur Wailen la, kitn laron kuina ur a Maur Wailen angklinseitn pa, mpa Maur Wailen ngkine lkeitn ariwe, eng mpa kitn ri kweikwei wrongkwail wor wor a mentepm a ukipma Krais awi pa.

Pol la Pilimon la kil uwi Onesimus pa kolen melnum wor yek alkil a tuwekg ukipma Krais pa, atom plan ipma wor wasrongentel

8-10 [c]Kupm la lanikeitn la, kitn ntokg kweiur wris ur kil pa la, kitn rein Onesimus kil, kol kitn arein tu wrong kin kipman a Maur Wailen pa. Ak wang a kupm rpma wan tipmning kil pa, kupm lanakel yangkipm a Maur Wailen kaingkai, kil plelng ipma, atom kil palng kol warim akupmen. Kupm Pol, kupm am wror tike, kupm akwap a Krais Sisas, atom tu awiyopm aye or rpma wan tipmining kilke. Ti Krais takweiyopm atom kupm ake ngkark, kupm wrongen antiwe titnongket, mpa lanikeitn titnongket ya ute la kitn kitila. Pake nikgwalpm a arein pa arkulo yatenen, kolpa ti kupm lanakeitn meen, la kitn rkul nikgwalpm a plan ipma wor wasrongen Onesimus pawo! 11 Ep pa ake kil akwap wor ak angklinseitn pa, kalpis. Ak wang kil pa kil akwap wor ak angklin kupm ti, ti ikga wa ik ngklin kitn pa yat pa.[d]

12 Mpa kupm ukwawel yaper kainteitn pake, pa wa kangku nol akupmen tuwa. 13 Kupm angkli yangkipm wor a la Krais Sisas, atom tu awiyopm aye or rpma wan tipmining ti. Kolpa atom kupm wasrongentel paipm la kil ntiwopm rpmi, eng mpa kil ngklin wrik akitnen ngklinsopm ik wang a kupm rpma wan tipmning kil. 14 Pake kol kitn ri kupm rkul Onesimus iye rpmi kil pa, mpa wa kitn ikwonilmpen la kupm angkweingen la, angklin alkitn pa rpmi eng ngklinsopm kalpmen. Kolpa kalpis, kol kitn alkitn pa uk wor pa pati, kol a kil rpmi eng ngklinsopm pake. Kolpa ti mpa kupm ukwa Onesimus kil yaper kainteitn pa pen.

15 Ti pikekg kil atnuurngkeitn kai a waiketn, kolpa eng ikga kitn uwiyel eng alkitnen wrisen. Ti mpa kolpa ur ai. 16 [e]La ake mpa kitn uwiyel kol melnum a akwap kalpmlel orngwatneikgen kitn pa kolti, kalpis. La mpa kitn plan ipma wor wasrongentel uwiyel kol melnum wor yek alkitn a kipmekg ukipma Krais. Ti wa kol kupm ti, kupm wa plan ipma wor wasrongen kil pa yat. Ti kupm ari kitn pa mpa plan ipma wor wasrongentel or kai ai pa. Eng ntei, kil pa palng melnum wor alkitnen a kipmekg yatenen uk ipma Wailen Krais, a kil palng melnum wor a ikga ikenteitn kwap pa riworwor.

17 Kol kitn ikwonilmpen kupm ti la, kupm ti melnum alkitnen a mentekg akwap wris pa, Onesimus la wli pa, mpa kitn uwi wor la kil pa, kol a kitn awi wor la kupm ti. 18 Pikekg kil antokgteitn kuina ur paipm aki, ake kil akalmpenteitn kuina ur a kil awi kai kitn pa pipa, la eng mpa kupm ikilmpenteitn. 19 Kil kupm Pol, kupm nira yangkipm kil ak wam alkupmen aklale la, kuloken wasek pa ikga kupm ikilmpe kuloken alkitnen pa lkeitn pa. Pake kitn ikwonilmpen kuloken wail a pikekg kupm angklinseitn eng kitn palng kolen melnum a ukipma Krais pa, pa rpma num a kitn pa a pa. 20 Pilimon, kitn melnum wor alkupm a mentekg ukipma Krais, kol kitn la ikilmpe kuloken akupmen pa, kitn ntokg Onesimus pa kitila kol a kupm la pa atnen a mentekg yatenen a Wailen Krais, eng mpa ntokg ipmanikg akupmen pa palng wor itopen.

21 Kupm niranteitn wrkapm kil, eng ntei, kupm ariwe pa, kitn melnum a atning nungkulkg yangkipmok, kitn mpa ntokg klangkil kitila kuina ur a kupm nira kil. 22 [f]Kupm yangkipm wris ur wa itna pa: pa kupm akwonalmpen la, wreren eng a Maur Wailen ikilmpe asen alkipmen, eng tu elngen kupm or wan tipmining ti kawor en eng yaper kai eng kipm pa. Kolpa ti kitn numprampen wan ur pa elngtitni eng kupm pa.

Pol nampokgen tu melnum a akwap wris pa tu uk wor Pilimon

23 [g]Epapras, kil melnum a mentepm akwap wris a Krais Sisas, mentekg rpma wan tipmining kil, kil la kupm nira nikeitn la kil nikgwalpm arkenteitn rka pa. 24 [h]Wa tunteng melnum a men akwap wris, Mak, Aristarkus, Temas, Luk, wa tunteng la kupm nira nikeitn la nikgwalpm a tunteng pa arkenteitn rka pa. Ampake, yangkipm a kupm Pol am kai itna kol pake.

25 Kupm oklala naki Wailen Sisas Krais la kil plan ipma wor alkil ik ngklinsepm kolpa iye kai.