6 Itna wrik a tu arke pa, kuntuk mang wail wampwomis wampwompwris pa rpma. Pa kuntuk a men Suta arpmen u eng ak klak klak nepm wam a kweikwei, pa ya almenen a men katnun katnun eng palng kukula wriwen wor itna wulmpa a Maur Wailen. U wampeng wampwomis wampwompwraur aki wampwam aki wampwam karpo tuwek pa (80-130 lita) antiwe alung elng kinar kuntuk mang wris pa mpa no pik. 7 Sisas lanaki tu melnum akwapel pa la, “Kipm inong u pa wli lung kinar kuntuk mang pa no pik.” Tu atning kolpa atom tu anong u pa alung kinar kuntuk mang pa kulno pik. 8 Atom kil lanaken la, “Kipm unong u tiur a rka kuntuk mang ti ngkiten iye kai eng melnum yan a ngkaten ok okipma pa.” Atom tu ngkaten u pa aye kai. 9 Atom melnum yan a ngkaten ok okipma wail pa al u pa akwiyen, ari u pa am wet palng u wain ise, pake kil ake ariwe la u pa wet palng or kolai? Pake tu melnum a anong u pa aye kaino pa, tu pa ariwe pake. Atom kil akwe melnum kipman a awi kin weten pa kul, 10 a kil lanakel la, “Mla ur a ngkaten ok okipma kol ti pa, kil ampreing ampreing u wain titnongket wor pa uk uk tu pa ep ep. Tu al kolpa kai atom tu eng a kai titno pake, a pa kil ampreing u wain a ake titnongket wor pa alken tu al katnukg. Pake kitn ti lam u wain wor wrisen ti rpma kai a i atom wa kitn awi aye wli ti!”
11 Sisas ake pikekg elng kla ur ak plan titnongket a Yan alkil angkai ai kulngkul, kil antokg itna anong Kana a anong kanokg Kalili tike. Pa kil plan kil alkil angko wunong, atom tu wrong kin kipman ari titnongket a nang wailen alkilen pa. Atom tu watnom alkilen a kil aroaro wonel pa ari pa, atom tu ukipma kil pa.
12 [b]Sisas nampokgen tu wusok wusok, a man alkilen pa wa tu watnom a kil aroaro wonel pa, tu atnuurng anong Kana pa a tu kai kaino rka kaino anong Kaperneam. Tu kai rka pa wang aripm ur a pa.
13 [c]Pa wreren wang wail a men Suta la wli tukwem rki wris ikwonilmpen a pikekg Maur Wailen akawi tu amenen takwleikgen tu Isip pa aye kul wor. Wang wail pa kul wrer, atom Sisas kil angkaino anong kanokg a Kalili pa nar anong kanokg a Sutia ti kul no anong wail Serusalem. 14 Kil no palng Serusalem ai pipa, kil kai kawor yipmingki wunen a yalming a Maur Wailen pa, kil ari tu melnum a aye manto nepm watin, a manto walkg malkgu a wel punum aye wli itna eng mpa tu wrong rmpen iye kai uk tu ipma krakgen a al wor uk uk Maur Wailen. A wa tu alntu a ak ak marpm a yalming awiye marpm a tu ak armpen armpen kweikwei kawor en ai pa rka.[d] 15 Sisas awi ampei pa ak or ungkwan tu pa kimeket nampokgen manto nepm watin, a manto walkg malkgu takwleikgen wan yalming pa, a kil taipurng tipmakg a tu a akawiye tita marpm ok pa elng kai punprarng kai kanokg ai. 16 Kil akle ungkwan tu a ak wel punum awi marpm pa la, “Wrekg wrekg, ilmnon kweikwei alkipm ti plalng iye kai tukuleikgen o! Wa kipm antokg wan a Yan akupmen ti palng kolen la wan ur a armpen kweikwei a ak kweikwei awi marpm atne tuwa!” 17 [e]Tu watnom a kil aroaro wonel pa atning ari pa, atom tu wonuwen yangkipm ur a nira ela wrkapm a Maur Wailen pa lala, “Kupm langkinen wan akitnen pa paipm wrisen, atom kupm la rki kaikuten eng la ntokg wan akitnen pa palng wor.”
18 Tu melnum wailen wailen a men Suta tu ari a Sisas ungkwan tu kolpa atom tu pa la, “Mla la atom kitn ungkwan tu pa kolpa? Kol kitn la kitn melnum a antiwe titnongket nang arke pa, ti kitn elng kla ur pa elngkitni ik planto nang wailen akitnen a kitn antiwe ntokg kweikwei kolpa.” 19 [f]Ari Sisas akalmpe la, “Kipm tikale Wan Yalming a Maur Wailen tiwo! Ikga kupm wa le wan ti itni kiti kiti ik wang wraur kolti.” 20 Tu wailen wailen a men Suta akalmpe la, “Pikekg tu ngkat ale wan ti, pikekg ampenet, itna wringkwringen, wring kamel wekg tuwek wampwomis wampwompwris. Pake wa kitn wa la ngkit le wan ti ik wang wraur kolti!”
21 [g]Pake yalming a Sisas kil la pa, pa kil la num a kil alkil ti. 22 [h]Wa tu watnom a Sisas a kil aroaro wonel pa wa ake wa ariwe yangkipm pa, kolpa kulngkul, kul angko wang a Sisas amo plalng wa kil wrekg rpma, pa tu wonuwen yangkipm a kil la ti. Atom tu ukipma yangkipm a la ela wrkapm a Maur Wailen pa la, aklale wrisen. Yangkipm a kil pikekg la le wan pa, am palng aklale tike.
- a 2:4 Son 7:30; 8:20
- b 2:12 Mat 4:13
- c 2:13 Taku 12:1-27
- d 2:14 Marpm enen a tu Rom pa akentiwe mpa ik rmpen wlikgok a kweikwei pa itni yalming a Maur Wailen pa. Mpa tu ikuwiye marpm alkil a itna yalming wunen a Maur Wailen pa atom tu ik pa ik rmpen kweikwei pake.
- e 2:17 Nang 69:9
- f 2:19 Mat 26:61; 27:40
- g 2:21 1 Kor 6:19
- h 2:22 Luk 24:6-8; Son 12:16
- i 2:23 Son 7:31