1 [a]Kipm melnum alkupm a mentepm ukipma Wailen amentepmen Sisas Krais, kol kipm ukipma Sisas Krais, Wailen amentepmen a rpma Klalen pa, ampur kipm awi wor uk melnum ur pa, a awi paipm uk melnum ur pa, kolpa yaper! 2 Kol kipm ikwonilmpen yangkipm kil: ak wang a kipm rpma atning yangkipm a Maur Wailen rpma wan alkilen pa, kipm ari melnum wailen ur a ak lukglukg wor wor nowe num pa kulor wan pa, wa melnum ur a rpma tukwok a nowe apm rakolet pa wa kulor. 3 Kipm ari melnum wailen a ak lukglukg wor wor pa nowe num pa, kipm pirpiren ukulamtel wrik wor pa la kil rpme. Pake melnum a rpma tukwok pa, kipm la, “Kitn itni kai kwa pa aki, kitn ngko rpmi kanokg ti!” 4 Kipm antokg nikgwalpm kolpa kipm ari la pa wor aki? Pa kipm wako kipm alkipm ti itna mapming wekg. Pa kipm kol melnum a elng wam itna arki melnum ur la pa kil pa wor a melnum ur pa la kil pa paipm katila nikgwalpm paipm alkipmen ti kolti.

5 [b]Kipm melnum yek yek alkupm a mentepm ukipma Krais pa! Kipm itning yangkipm kil: melnum a rpma tukwok itna wulmpa a tu melnum ari la melnum pa kil rpma tukwok atom kil ukipma Sisas Krais pa, pa kil palng melnum wailen antiwe kweikwei itna wulmpa a Maur Wailen. Wa kil ikga uwi num ngklin kweikwei wor wor a Maur Wailen pake, kol pikekg kil yapon yangkipm la uk tu a plan ipma wor wasrongen kil pa. 6 Ti antokg kolai ti wa kipm uk num paipm tu a rpma tukwok pa? Ake tu pa arpmentepm paipm alkepm kalkuten arkolngkepm aye kai antokg yangkipm pa, kalpis. Pa tu melnum a antiwe kweikwei pa arpmentepm paipm pake. 7 Kipm a Sisas Krais, kipm aye nang alkilen, ari nang wor wrisen alkilen pa am tu melnum a antiwe kweikwei pa la paipmel ise.

8 [c]Kol kipm kutnun yangkipm titnongket kil a ela kai wrkapm a Maur Wailen pa pati wor pake. Pa itna ep angen yangkipm titnongket wrongkwail a Maur Wailen la pa, la, “Kitn plan ipma wor wasrongen tu wrongkwail, kol a kitn plan ipma wor wasrongen kitn alkitn ti!” 9 [d]Kol kipm ri melnum a rpma tukwok pipa, kipm awi paipm uk. A kipm ri melnum a rpma antiwe pipa, kipm awi wor la, kolpa pa kipm ake ak wor. Pa kipm ak paipm angketen yangkipm titnongket kil ise, a la, “Kitn wasrongen tu wrongkwail, kol a kitn wasrongen kitn alkitn!” 10 [e]Eng ntei, kipm katnun yangkipm titnongket wrongkwail tiur pake, kipm wangketen yangkipm titnongket wris ur kolti pa, pa kipm antokg paipm kol a tu melnum a angketen yangkipm titnongket wrongkwail pa. 11 [f]Maur Wailen kil la kolpa la, “Ampur kitn awi kin nanen kipman kinen a mlaur ai pa.” Wa kil la kolpa yat la, “Ampur kitn ilm melnum amo.” Kol ake kitn awi kin nanen kipman nanen pake, kol kitn ilm melnum ur imo pa, ampake, am kitn antokg paipm angketen yangkipm titnongket wrongkwail a Maur Wailen pa yat ise. 12 [g]Ikg a Maur Wailen kil alkil iyewepm kai itni ntokg yangkipm kitila yangkipm titnongket pikekg ak angketen paipmpaipm akipmen atom palng wor pa. Kolpa ti kipm itn riworwor la yangkipm ok wor wor kutnun kitila yangkipm titnongket pa. 13 [h]Ik wang a Maur Wailen uwiyepm iye kai itni ntokg yangkipm pa, kil ikgake rein melnum ur a ake arein melnum ur pa, kalpis. Kil ikga ikilmpe paipmpaipm akilen. Melnum ur kil rein melnum ur pa, Maur Wailen ikga reinsel ik wang a kil ikga itni ntokg yangkipm pa, kil ikgake ikilmpe paipmpaipm akilen pa.

14 Woi, kipm melnum alkupm a mentepm ukipma Sisas Krais! Kol melnum ur la, “Kupm kil ukipma Sisas Krais.” Pake atn a rpma a kil pa palng manet, kolpa pa ake wor. Ipma a kil uk kolpa pa mpa wa ngklinsel ik uwiyel iyekul wor kolai? Kalpis. 15 [i]Kol kin aki kipman ur a mentepm ukipma Sisas Krais kil rpmi tukwok eng okipma aki, nung aki, kweikwei kolpa, 16 kol kitn la, “Yek alkupm, Maur Wailen alkeitn wor, kai o! Kitn kai lile wakg pa rkgin rpmi, ntokg okipma pa il nikgwor rpmi riworwor rpmi o!” Ok a kitn ti la kolti tuwa, ake wa kitn angklinsel okipma a nung kweikwei ur pa, kalpis. Yangkipm a kitn la kolpa pa ak angklinsel la kolai? Pa kalpis. 17 Kitn ukipma Sisas Krais pake, atn a kwap a kitn ak pa palng manet. Kolpa ti ake kitn ukipma Sisas pa aklale.

18 [j]Ati nikgwalpm akipmen pa ur mpa la kol kil la, “Kupm kil ukipma Sisas Krais, a kitn pa atn wor akwap wor, am mentekg katnun Sisas Krais kolen tita pake.” Pake kupm la lanikeitn kol kil la: kol kitn ake akwap wor, atn wor pa, mpa kupm riwe la kolai la kitn ukipma Sisas Krais pa? Pake kol kitn ri atn wor, a kwap wor a kupm ak pa, pa planteitn la kupm ukipma Sisas Krais pake. 19 Kitn ukipma ariwe la Maur Wailen kil wris ata. Kitn ariwe wor pake, pa tu mring maur am wa ukipma ariwe kolpa yat pake, la Maur Wailen pa kil wris ata, ti tu ngkark warwar paipm. 20 Nikgwalpm a kitn la kolpa pa kitn titno, kitn ukipma Sisas Krais pake, kitn ake atn wor, kitn ake akwap wor, ti a kitn ukipma Sisas Krais pa ake angko ok arke. Ti kitn la kupm lanikeitn yangkipm yiprokgen alkil pa riworwor pen? 21 [k]Ti antokg kolai Apraam yoampei amentepmen ti? Kil elng warim kipman alkil Aisak elngtela kaino nung kwa a wes a kil ngkat alile tita pa, la ilmpel imo lap il wor uk Maur Wailen ti. Kil antokg katnun yangkipm ok a Maur Wailen la pa atom, Maur Wailen kil ukipma kil pa la kil melnum ute wor pa. 22 [l]Apraam kil ukipma Maur Wailen ti, wa kil alkil ngkat wes pa alile tita, la ilm Aisak pa imo lap il wor uk Maur Wailen, katnun yangkipm alkilen a kil la pa. Ti kitn ari aki kalpis? Kil akwap katnun ok a Maur Wailen lanakel pa atom, pa planto la kil ukipma Maur Wailen pa aklale. 23 [m]Ti yangkipm a Maur Wailen pikekg tu nira ela wrkapm, ti palng aklale ak wang a Apraam la ilm Aisak imo lap il wor uk Maur Wailen. Yangkipm pa la kolpa, “Apraam kil ukipma Maur Wailen, ti kil palng melnum ute wor itna wulmpa a Maur Wailen.” Kolpa ti Maur Wailen kil akwewel la melnum wor alkilen. 24 Ti kipm ariwe pa, melnum ake antiwe mpa ukipma Sisas Krais kalpmilel kolti pa, kalpis. Kil ukipma, kil ikwap pa kutnun pati, pa mpa kil palng melnum ute wor itni wulmpa a Maur Wailen pake. Kalpis pati, mpa kalpis.

25 [n]Kol Reap, kin a pikekg atn ya pa yat, kil pa am kolpake. Kil katnun yangkipm ok a Maur Wailen kolpa atom, Maur Wailen kil akwewel la kil kin ute wor itna wulmpa alkilen eng kil awi melnum wekg a Isrel lam, kil lanaken ya pa la mpa tuwekg ngkom nilokgen wrongmanto alntuwen. 26 Kol melnum ur ukipma Maur Wailen kalpmilel kolti pa, ake wa kil akwap katnun yangkipm ok a Maur Wailen la pa, kil ake wa ukipma aklale. Ti a kil ukipma kolpa pa kai kalpis kolti kol yokluk a amen wor or kai takwlelkgtel ise.

<- Semis 1Semis 3 ->