1 Maur Wailen planto ipma arein alkil pa atom kil alko kwap kil a laron kla weten a kil lam pa, kolpa ti minto ake mpa ngkirk atom elngen kwap pa. 2 [a]Minto pa ake antokg kweikwei a uk numpaipm a tu antokg ampen, wa minto ake melnum a atn laron yangkipm kansil aki plelngen yangkipm a Maur Wailen pa kai raimpe manet pa, kalpis. Minto melnum a laron yangkipm aklale angko wunong, eng mpa ik plan tu wrongkwail ri atom ikwonilmpen itni wulmpa a Maur Wailen pa itning ok wusok alntuwen la minto ti melnum kolai kolai pa. 3 Ti tu tiur atning yangkipm wor a minto laron Krais kil pa, tu lala pa miningket, kol minto ak apm aur yangkipm pa. Ari kolpa kalpis, apm pa akaur nol nikgwalpm a tu melnum pake, atom tu pa ikga kai wakg. 4 [b]Satan maur paipm a ikgalen kanokg itna ti akampri nol nikgwalpm a tu a ake ukipma Sisas pa, atom klalen ake antiwe mpa iklen tu pa. Tu ake antiwe atning yangkipm wor a la Krais pa la kil antiwe klalen wail manten, a wa tu ake antiwe ari Krais pa la kil planten mrangkum a Maur Wailen kil alkil pa.

5 Minto ake laron kuina ur a la minto alminto ti pa kalpis, minto laron Krais Sisas pa la kil melnum Wailen, wa minto ti pa ukipma Sisas, kolpa atom minto aken kwap orngwatneikgen kipm pa a angklin kipm pa. 6 [c]Pikekg ep pa Maur Wailen kil la, “Ti klalen pa len miningket pawo!” Kil alkil pa klalen alen ikgokg a Krais, atom mentepm ari pa, pa ak alen ipma amentepmen atom mentepm awi ariwe la pa klalen a Maur Wailen am pake.

7 [d]Minto ariwe klalen a Maur Wailen a rpma kawor ipma amintowen pa kol kweiur wor wrisen alkilen, pake alupm rpma kuntuk mang ti kolti, eng mpa plan tu wrongkwail riwe la pa ake titnongket amintowen ti pa, pa titnongket wail manten a Maur Wailen ai. 8 [e]Kalkuten wailet a pa a pa wlinto pake, pa ake wa ak arkuwo kai paipm pa. Wa kweikwei wailet kul akampriwo, atom minto rpma titnowen num la mpa minto ntokg kolai? Pake pa ake wa ak antokg minto ti wa elngen kwap pa. 9 Tu itnawento kolpa kai alko wleket, pake Maur Wailen ake atnuurngko. Tu oro paipm kalkuten elng kai rmpa kanokg pake, ake wa ur a minto pa amo. 10 [f]Minto aye amo ti nakur num atn kolti, kol Sisas a pikekg kil atn atom tu orel amo pa. Eng mpa ik plan eng tu ri la Sisas pa rpma atom angklinso atom minto rpma. 11 [g]Ak wang a minto akwap a Sisas rpma kanokg a ti pa, minto aye amo ti nakur num atn kolti, pa ak plan eng tu ri la Maur Wor a Sisas a rpma yongkyong pa rpma numpalk a mintowen a ikga kai imo ti. 12 Minto ti akangklei atn angkli num akwap kuinel la imo ikilen kipm pa, atom kipm awi yaprekg watin eng rpma yongkyong.

13 [h]Minto nikgwalpm wris kol melnum a nira ela kai wrkapm a Maur Wailen pa la, “Kupm ukipma, kolpa atom ari kupm la.” Ti minto am wa ukipma kolpa yat pake, atom ari wa minto wa la. 14 [i]Atnen minto ariwe la, Maur Wailen a pikekg la atom Wailen Sisas a pikekg amo pa wa wrekg, ti kil ikga wa la minto ti yat, atom minto ti ikga wa wrekg numpokgen Sisas pa. Wa kil ikga wa uwi minto ti numpokgen kipm pa iye kai itni wulmpa alkilen. 15 Kweikwei wrongkwail a palngto ti pa, pa minto arki eng akangklin kipm pake. Atom ipma wor a Maur Wailen plan ak angklin kipm pa wa plan ak angklin tu wrongkwailet wa plan ak angklin kolpa kolpa aye kai wail yela, eng mpa tu wrongkwailet ukwor Maur Wailen ngkit nang alkilen pa iye kolpa kai wail.

16 [j]Minto akwap a Maur Wailen a wor kolpa, atom minto ake ngkark kai rpma pa. Titnongket a numpwam amintowen pa aye kinar aye kinar eng a kai plalng pake, maur wor a mintowen pa palng weten akangklei wang wris wris kolpa aye kai. 17 [k]Kalkuten a wleket a minto arki ti pa kukulawen ikga itni wang tukwok waiketn kolti, pake Maur Wailen ikga ikilmpe lko klalen wail manten paipm ai klangkil or kai ai a ikga itni yongkyong iye or pa kai. 18 [l]Minto ake nigkwalpm arkekgen kweikwei a minto ari ari ti pa, kalpis. Minto nikgwalpm arkekgen kuina ur a ake minto ari ari pa, apa. Minto ariwe la kuina ur a minto ari ari ti pa, ikga itni wang waiketn kolti kai plalng, kuina ur a minto ake ari ari pa, pa ikga itni yongkyong.

<- 2 Korin 32 Korin 5 ->