7
Isaraeli laurichuru cojunacatenohineein nenacaauru
1 Nii baiha coaracaaunne janate, enoto mitu jeloon, enoto soo jeloon, enoto soo coarajeein cana raotono jeloon, enoto soo coarajeein cana ajaabiji jeloon, naaonjoainuri jeloon chujurijiatocure jenaain anjeraauru. Ecu neeinte situha nii jenai laurii jeloon caje uhin cujuanane coataa acatecure. Nabana situhi chauratane, cucuana, nuna, naaonjoainuri ichoae situhin jiatuhane coataa. 2 Chaen techu coaracaaune jana, enoto mitu asajai caje uhe leinjiin anjera. Acate Cana Coaunera ichaohin nenaa cojunaca seecho siri. Nii anjerate tonijiaain eheque, nii jenaain nenacaauru anjeraauru, chauratane, cucuana cuhanai, naaonjoainuri aasaaena nainecuruhane jaanu raaurera rai. Nitohaneein tonijiaain ehequiinte:
3 “Jiaonriha jaiti Cana Coaunera cachaneein nenacaauru nauri que Cana Coaunera cojunaca siricha seecho tenihacachene jana, chauratane, cucuana, nunacuru, naaojoainunri aasaaecache,” naain, eeheeque nii leinjiin nii jenaai naraai aanjeraauru rai.
4 Nii jana, aonacaaunne janate, le faasha jena choonca oaraancaain satiin Isaraelitaauru lauri caje nauri que Cana Coaunera cojunaca seecho sirichaauru curuaacuru janiichure. 5 Nitohaneeinte,
Jodaa lauri caje lechoonca coroata oaraancaain nauri que Cana Coaunera cojunaca seecho que cojunacatenoine.
Jana Robeen lauri caje lechoonca coroata oaraancaain.
Jana Gada lauri caje lechoonca coroata oaraancaain.
6 Jana Asere lauri caje lechoonca coroata oaraancaain.
Jana Nefatalii lauri caje lechoonca coroata oaraancaain.
Jana Manasee lauri caje lechoonca coroata oaraancaain.
7 Jana Simeon lauri caje lechoonca coroata oaraancaain.
Jana Lebi lauri caje lechoonca coroata oaraancaain.
Jana Isacara lauri caje lechoonca coroata oaraancaain.
8 Jana Saboloon lauri caje lechoonca coroata oaraancaain.
Jana Jose lauri caje lechoonca coroata oaraancaain.
Jana Beenjamiin lauri caje lechoonca coroata oaraancaain naaonjoaain Cana Coaunera cojunaca siricha seecho que acaauru auri que cojunacatenoinecuruhane janiichuruhane jana aonaaun.
Arajiin cachaauru somajai que cajionecooruhane
9 Nii baiha coaracaaunne janate, ecu araai lauriinchuru satiin chauratane sacutaain nenacaauru, araai lauriin nere que ereein nenacaauru, jelai natane que ichaohin nenacaauru, naaonjoainuri cachaauru ecu arajiin neeure. Acaaurute rori caohacha- trono aina Carenero Narejeen acatiha ecu arajiin chujuhacoore janiinacaje lanaala. Nitohaneeinte cajione somanerei que cajionecohinte, elele tocorijiane siijiariin cuure. 10 Nitohaneein cuhinte, tonijiaain ehequiin:
“Cana Coaunera- rai rori caohacha- trono ichoae nenaa aina nii rai Carenero Narejeente,
arajiin itolere, que nejeratenacaauru amuritoeraneein ne,”
naaure tonijiaain nii ecu satiin caa chauratane sacutaain nenacaauru araai laurii cachaauru. 11 Nii janate nii rori caohacha aina nii coroata choonca jenai ichauhenaauru, nii jenai ichaohin nenacaauru, naaonjoainuri tionoritiin chujuhacoore satiin anjeraauru. Nitohaneeinte nii rori caohacha acatiha neseeonriaain, atane que nauri turuanacanejeein nenorocoaain Cana Coaunera coroaaecure nii anjeraauru.
12 “Nitohaneein neeuruhine.
Jataain caohatoha Cana Coaunerane coitucuuruhine itolere bana.
Necaohacha que necaohachaa Cana Coaunerane coitucuuruhine itolere bana.
Jataain itolere coitucueraneein niha Cana Coaunerane coitucuuruhine itolere bana.
‘Narihara,’ naauruhine acaauru rausiaaeca Cana Coaunerane coreniha itolere bana.
Jataain nelatiha Cana Coaunerane coitucuuruhine itolere bana.
Acaneein nihane coitucuhin, itolere icharaneein laraajiin nihane coitucuuruhine.
Nitohaneein neeuruhine chabana satonoelanaala. Nitohaneein neeine,”
naain, Cana Coaunera cocoasitaaure satiin nii ecu nenacaauru anjeraauru.
13 Nii janate, nii coroata choonca jenaain ichauhenaauru caje leinjiin canu rai:
“Chaauruna caa somajai cajione que cajionecohacoaain cau ne. Chaaelai cajena uure,” naain canu caje bajaane janane: 14 “Iite acaauru coitucuhicha curuaanaa,” naain tonoraaun.
Nii jaunte canu rai: “Caa cachaaurute necairichanaa tabai abaantaauruhana jaaun, Carenero Narejeen coichana aina cuaain somarianohiniha acaauru cajionene jaaun nesomariaain nedae acaauru cajione.
15 Nii jaaunte,
nii Cana Coaunera rai rori caohacha- trono acatiha neeure,
jiichoo, janotiin, naaonjoaain Cana Coauneraacha jerei ichacuruha rai Teenforo asaaene coina.
Nii rori caohacha choaae lauheconaate acaauru beraicheein acaauru rohan neein.
16 Mijitena, cocoirena, enoto ajaano, ajaaronaa, naaonjoaain niha natiin acaauru reroecarinaai,
17 acaauru beraiha nii rori caohacha cataaun nenaa Carenero Narejeen ne jaaun.
Nii Carenero Narejeente acaauru beraicheein, carenero beraihuruha beraihurerane rijijieein.
Acate, esinaaeca caohacha- ichaonaa tera que acaauru cocoareein,
raotojoeein ichaaoruhane coina.
Inae acaauru coroatajaniha Cana Coaunerane jaun
necairichanaa coaraain chanaaururinaai chabana,”