Afocarifisi 18

Nitajiha Babilonia nesene

1 Nii baihane niicha ichana nainei ichaane coina cocoainanohineein, rai necaohacha que necaohachaain dede caje fauhin chauratane jiliitoha rai cono necaohacha que leeocha anjerane jana coaraaun. 2 Nii janate tonijiaain:

“Inae nitajiha itolere amurijiriin nenaa Babilonia nese tabai.

Inae moconajaera nenajaneeinte,

itolere lauri lauri coitucuchuhi que suujuequiin,

chaen rautaain coaanacaaojoae lanaala nenaa itolere ataebinae coitucuchuhi, tajaaecuru coitucuchuhichuru, naaonjoainuri ucuhaneein inae nerotoe.

3 Nitohanihane jaunte,

chabana nitohanai ichaain ichaonaa naineniha cachane saijieein,

rai nichao baaso aina cuaain,

satiin chauratane que nenacaauru cachaauru ichao aasajeein osa que sarunajaelu.

Chaen techu,

que ichao jeraquiin nerejetocure satiin chauratane que nenacaauru curuaanaacuru.

Chaen techu,

satiin caa chauratane que necoretenacaauru coriquihocure,

nechu jataain joaereein baaso ichacuruhane jaanuhacha que necoreteein,”

nae carai nii anjera.

4 Nii janate, nacoaauneein dedeeu tonii.

“Chajaain nii nese caje amuuche inara canu cachanequichene.

Nabana nii osaaonacaauru aina neeichene

acaauru osa leruhiche acaauru ainane,

necairichaaiche nii necairichaauruhane jaan quene coataa.

5 Dede quete

turuhelalajeein laujuae jataain acaauru osa tabai.

Nii jana Cana Coaunerate,

nii baaso chacuruhane coitucuhin chabana baitenereein.

6 Leeochaauru cairichaane amurijiriin,

coroata saain jeelai amuritoheriin nii niicha coheni jataain coaaerai jasiiteein que cairichaau.

7 Jataain necairichanaa tabai que cairichaau,

leeochaauru cairichaane amuritoheriin.

Nechu jataain joaereein nocohasitaa nocoetohane jaunte,

rai suujua cuhane:

‘Caune aiha curuaanaane rijijieein raotojoeein neeun.

Coatiha aiha autanane rijijieein necairichanaa coaarinaauni,’

naain necohasitae.

8 Nii jaunte,

le jiichonijin cuhane nichoae nalureein itolere necairichanaa, onaa, mijitena, nererojoecana, naaonjoainuri.

Chaen techu

usihanau moconojoiniha cureein.

Jataain itolere que laraajiin niicha ichana nainei ichaain

cha rucuheraniha nii casetecaeraneein nenaa Cana Coaunerane jaun,”

naa erenaane jana aonaaun.

9 Inae moco caaun suruaa tabai niha nii nesene coaracuruhanete, jataain inaderaain chanaa cuurureein caa chauratane que nenacaauru curuaanaacuru, nechu joaenreein nichao aasajeein nii nese aina ichaojeraconacaauru, nii baaso ichacuruhane que netojoejeein. 10 Nii jaunte, inae caseteconihane coaracuruhane coasiha rohan nichuuntanaa nainelanaala caje coriae netiin:

“Jataainte cairichaaojoaai itolere que laraajiin niha

nocoetohi natiin Babilonia nese tabai, coatejeneeine

jana luhecotariin ii rene turuha casetecone jaun,”

naaurureein coarajeein.

11 Satiin chauratane sacuritaain ecu necoretenacaauru techu, nii nese coinaderaain chanaa cuurureein. Inae nenerihani nii coroatajajelanaala acaauruhacha sirii rucuhele coreterane jaun. 12 Nii itolere, oro, plata neein curuajaain nenaa coata coreti, ajeri jataain caohatiin coreti, jataain cajione caohacha, cajione lanaajionjoai, cajione lanajai, itolere araai laurii enuha jujuhi caje nenaa, ebucu caje ichanohichuru rucuheleeuru, enuha jataain coretiin nenaa, coata lanajai boronce, leeocha lauri coata, ajeri jaberoco jataain nojoeein nenaa, 13 arajiin jujuaain nenaa canera, sacari jujuaain nenaa, miraa chaen leeochaauru jujuaain nenacaauru, perfume, bino, erene, arina caohacha, tirico, atane choae terei anajiin icharaauru, carenero, cabario, cabario que tararaeraain nenacaauru, chaen cachaauru letononeein nenacaauru, naaonjoainuri que necoreteeuruha, nii Babilonia cocoaichacuru raine jaun, jataain coinaderaaure. 14 Nii janate jataain inaderaain:

“Inae nihei iicha rautati rucuhele coreti satiin iicha sirii.

Inae chabana nihei jerichanejeein sirii neeine,”

naaurureein nii neseu necoretenacaauru.

15 Nii neseu necoretenacaaurute jataain coriquihotiin neeure. Inae caseteco coaraane janate, caje coriae neein coinaderaain chanaain coarajeeurureein jataain coasina caaun. Chaen techu jataain coisiin:

16 “Jataainte cairichaaojoaai, itolere nese amurijiriin tabaain nenaa.

Cajione caohacha que necoreeteein, lanajaain jichohajiojoai que necoreeteein oro,

chaen jataain coretiin nenaa ajeri jaberoco, perla, naaonjoainuri que urerihanohin cajione que necoreetiha leinjiin enene tocohaneei niqui.

17 Nete luhecotariin coacueneeine jana, inae nitaje nii itolere iicha sirichuri,”

naaurureein.

Satiin bote cuhane curuaanaaneein nenacaauru curuaanaacuru cafitaancuru- cucuana cuhane amuhemuhenacaauru, chaen marinerooru, satiin cucuana cuhane nichao que ichaohin raotojeein amuhemuhenacaauru, naaonjoainurite coriae netiin coarajeeure. 18 Inae moco caaun suruaa niha, nii nesene coaraainte: “Coatiha catohaneein jataain leeochaauru amurijiriin jataain caohatiin nenaa nese caa catohaneein nedaai,” naaure tonijiaain.

19 Chaen techu, coinaderaain chanaain, couturi ichoae atane bujuinaa chorohin:

“Jataainte cairichaaojoae taa nese itolere amurijiriin nenaa, naain chanaaurureein,

satiin nii cucuana cuhane bote sirii amunacaauru,

nii nese aina cuaain coriquihonaneein nedanacaauru.

20 Nii nese cairichaa Cana Coaunerane coroaaecuche

dedeeu Cana Coaunera cachaneein janijiin niicha cotihanohineein nenacaauru,

chaen afosotooru, profetacuru, naaonjoainuri. Acaauru casetecaane ucuaetohate, inara rai caohacha ichae Cana Coaunera,”

21 Nii jaunte, nii itolere que nelateein, niicha ichana nainera neein nenaa anjera, nii leinjiin ajeri jaberoco seeonjoan- cha tutuuruhane jaa tocohaneein nenaa baihataain cucuana cuhane siheitiin:

“Catohaneeinte,

itolere amurijiriin nelaetiin niha nocoetohinatiin,

inae chaque nelatelanaala neei Babilonia nese. Inae chaelon nihei nacoaauneein jerichanejeein neeine jana ichoharaauruhane.

22 Inae chaelai janonaa bana nihei nacoaauneein ii que aohanraa,

nenateein quitara rijijieein nenaa toteein, aunone maajeein toteein, coreneta tocohaneein nenaa toroonfeta, naaonjoainuri toteeuruhane.

Inae nerinaain ii que amihaneeni.

Niheichu aohanrarinaain tonijiainiha natiin ichaain cha tutuera.

23 Chaenchu

chaelai janonaa bana nihei, ii que niha conone jana,

ii que aohanraa tonijiai ichaain nisirihateeuruhane jaa besetane.

Coatiha

inae chaque nelateein neeuruhi ichei rucuhele que necoreteein nenacaauru,

satiin chauratane que nenacaauru amurijiriin itolere que nelaetoha nocoetiin neeuruhalu natiin.

Chaen techu,

benaneniha nocoetohine que,

satiin lauri lauri nenacaauru cachaauru coritaain nerejetohi,”

nae nii anjera.

24 Nii nese quete erunojoi ne niicha sohin niicha jaaorilu profetacuru coichana, chaen nii janijiin Cana Coauneraacha ranojoinurilu rai cachaauru, chaen satiin caa chauratane que sohin niicha jaaorilu coichana, naaonjoainuri.

<- Afocarifisi 17 Afocarifisi 19 ->