୩ ଏନ୍ତେ ଇନ୍କୁ କାଟାବ୍କେଦ୍ତେ ଏନ୍ ବାରାନ୍କିନାଃ ଚେତାନ୍ରେ ତିଃଇ ଦହତାନ୍ଲଃ ବିନ୍ତିକେଦାକ ଆଡଃ ଇନ୍କିନ୍କେ ସେୱାକାମି ନାଗେନ୍ତେକ କୁଲ୍କେଦ୍କିନା ।
୬ ଇନ୍କୁ ସାଇପ୍ରସ୍ ଟାପୁ ପାରମ୍କେଦ୍ତେ ପାଫସ୍ ସାହାର୍ତେ ସେନଃୟାନାକ । ଏନ୍ତାଃରେ ଇନ୍କୁ ବାର୍ୟୀଶୁ ନୁତୁମ୍ ମିଆଁଦ୍ ଯିହୁଦୀ ଦେଅଁଣା ହଡ଼ଲଃ ନାପାମ୍ୟାନାକ । ଇନିଃ ଆପାନ୍କେ ନାବୀ ମେନ୍ତେ କାଜିନ୍ ତାଇକେନା । ୭ ସର୍ଗିୟସ୍ ପାଉଲୁସ୍ ମେନ୍ତେ ଇନିୟାଃ ମିଆଁଦ୍ ଗାତି ତାଇକେନାଏ, ଇନିଃ ଏନ୍ ଟାପୁରେନ୍ ଲାଟ୍ସାହେବ୍ ତାଇକେନାଏ । ସର୍ଗିୟସ୍ ପାଉଲୁସ୍ ମିହୁଡ଼୍ ସେଣାଁନ୍ ହଡ଼ ତାଇକେନାଏ । ଇନିଃ ପାର୍ମେଶ୍ୱାର୍ଆଃ ବାଚାନ୍ ଆୟୁମ୍ ନାଙ୍ଗ୍ ସାନାଙ୍ଗ୍କେଦ୍ ହରାତେ ବର୍ଣ୍ଣବାସ୍ ଆଡଃ ଶାଉଲ୍କେ ଆୟାଃତାଃ କେଡ଼ାକେଦ୍କିନାଏ । ୮ ମେନ୍ଦ ଦେଅଁଣାହଡ଼ରାଃ ଗ୍ରୀକ୍ ନୁତୁମ୍ ଏଲିମାସ୍, ଏନ୍ ଲାଟ୍ସାହେବ୍ ଆଲକାଏ ବିଶ୍ୱାସେକା ମେନ୍ତେ ଇନିଃ ଇନ୍କୁକେ କାଜିକଟଙ୍ଗ୍ କେଦ୍କଆ । ୯ ମେନ୍ଦ ଶାଉଲ୍, ଅକଏକେଚି ପାଉଲୁସ୍ ମେନ୍ତେହ କାଜିୟାଃକ, ଇନିଃ ପାବିତାର୍ ଆତ୍ମାତେ ପେରେଃୟାନ୍ଲଃ ଦେଅଁଣାହଡ଼କେ ମିଦ୍ଢିଟ୍ଗି ନେଲ୍କିୟାଏ, ଆଡଃ କାଜିକିୟାଏ, ୧୦ “ଏ ସାଏତାନ୍ଆଃ ହନ୍, ଆମ୍ ସବେନ୍ ବୁଗିନ୍ ବିଷାଏରେୟାଃ ବାଇରିତାନ୍ମେ । ଆମ୍ ସବେନ୍ ଲେକାନ୍ ଏତ୍କାନ୍ ବେଦାତେ ପେରେଜାକାନାମ୍ ଆଡଃ ସବେନ୍ ଇମ୍ତା ପ୍ରାଭୁଆଃ ସାନାର୍ତି ହରାକେ ହସଡ଼ ମେନ୍ତେ କାଜି ନାଙ୍ଗ୍ ଚେଷ୍ଟାଏ ତାନାମ୍ । ୧୧ ନାହାଁଃଗି ପ୍ରାଭୁ ଆମ୍କେ ସାଜାଇ ଏମାମେୟାଁଏ, ଆମାଃ ମେଦ୍ କାଣାଁଅଃଆ ଆଡଃ ଚିମିନ୍ ନେଡା ଜାକେଦ୍ ସିଙ୍ଗିରେ ଜେତ୍ନାଃ କାମ୍ ନେଲ୍ ଦାଡ଼ିୟା ।” ଇମ୍ତାଙ୍ଗି ଏଲିମାସ୍ ଆୟାଃ ମେଦ୍ରେ ନୁବାଃ ଦାଲବ୍ୟାନ୍ ଲେକାଏ ଆଟ୍କାର୍କେଦା ଆଡଃ ଜେତାଏ ମିହୁଡ଼୍ ଆୟାଃ ତିଃଇ ସାବ୍କେଦ୍ତେ ସୁତୁଃଇଦିକାକ ମେନ୍ତେ ଦାଣାଁକେଦ୍କଆ । ୧୨ ନେଆଁ ନେଲ୍କେଦ୍ତେ ଲାଟ୍ସାହେବ୍ ବିଶ୍ୱାସ୍କେଦାଏ, ଚିଆଃଚି ଇନିଃ ପ୍ରାଭୁଆଃ ଇନିତୁ ଆୟୁମ୍କେଦ୍ତେ ପୁରାଃଗି ଆକ୍ଚାକାଅଃ ତାଇକେନା ।
୧୬ ପାଉଲୁସ୍ ତିଙ୍ଗୁକେଦ୍ତେ, ହଡ଼କକେ ତିଃଇ ହିଲାଅତାନ୍ଲଃ କାଜିୟାଦ୍କଆ, “ନେତାଃରେ ମେନାପେ ସବେନ୍ ଇସ୍ରାଏଲ୍ ଆଡଃ ପାର୍ମେଶ୍ୱାର୍କେ ବରୱାଇତାନ୍ ସାଅଁସାର୍ ହଡ଼କ, ଆଇଁୟାଃ କାଜି ଆୟୁମେପେ, ୧୭ ନେ ଇସ୍ରାଏଲ୍ ହଡ଼କଆଃ ପାର୍ମେଶ୍ୱାର୍ ଆବୁଆଃ ପୁର୍ଖା ହଡ଼କକେ ସାଲାକେଦ୍କଆ ଆଡଃ ମିସାର୍ ଦିଶୁମ୍ରେ ଇନ୍କୁ ଏଟାଃ ଦିଶୁମ୍ରେନ୍ ହଡ଼କ ଲେକାକ ତାଇନଃ ତାଇକେନା, ଇମ୍ତା ଇନ୍କୁ ପୁରାଃ ଗାଦେଲ୍ ହଡ଼କ ହବାୟାନା । ପାର୍ମେଶ୍ୱାର୍ ଆୟାଃ ପୁରାଃ ପେଡ଼େଃତେ ଇନ୍କୁକେ ମିସାର୍ ଦିଶୁମ୍ହେତେ ଅଡଙ୍ଗ୍ ଆଉକେଦ୍କଆ, ୧୮ ଆଡଃ ଇନ୍କୁ ଇନିୟାଃ କାଜି କାକ ମାନାତିଙ୍ଗ୍ ତାଇକେନ୍ରେୟଗି, ଇନିଃ ବାର୍ହିସି ବାରାଷ୍ ଜାକେଦ୍ ବିର୍ରେ ଇନ୍କୁକେ ଆସୁଲ୍କେଦ୍କଆ । ୧୯ ଇନିଃ କିନାନ୍ ଦିଶୁମ୍ରେ ଏୟା[a] କିଲିକଆଃ ଦିଶୁମ୍ ଜିୟନ୍କେଦ୍ତେ ଆୟାଃ ସାଲାକାନ୍ ହଡ଼କକେ ଏନ୍ ଦିଶୁମାଏ ଏମାଦ୍କଆ ।
୨୦ “ନେ ସବେନାଃ ୪୫୦ ବାରାଷ୍ରେ ହବାୟାନା । ନେ ସବେନାଃରେୟାଃ ତାୟମ୍ତେ ନାବୀ ଶାମୁଏଲ୍ ଜାକେଦ୍ ପାର୍ମେଶ୍ୱାର୍ ଇନ୍କୁ ନାଙ୍ଗ୍ ବିଚାର୍ ହଡ଼କକେ ସାଲାକେଦ୍କଆ । ୨୧ ଆଡଃ ଇନ୍କୁ ମିଆଁଦ୍ ରାଜା ଆସିକେନାକ, ଇମ୍ତା ପାର୍ମେଶ୍ୱାର୍ ଇନ୍କୁଆଃ ଚେତାନ୍ରେ ୪୦ ବାରାଷ୍ ଜାକେଦ୍ ରାଇଜେ ନାଗେନ୍ତେ ବେଞ୍ଜାମିନ୍ କିଲିରେନ୍ କୀଶ୍ଆଃ ହନ୍ ଶାଉଲ୍କେ ଏମ୍କିୟା । ୨୨ ଏନ୍ତେ ପାର୍ମେଶ୍ୱାର୍ ଇନିଃକେ ରାଜ୍ଗାଦିହେତେ ଆତମ୍କେଦ୍ତେ, ଦାଉଦ୍କେ ଇନ୍କୁଆଃ ରାଜାଏ ବାଇକିୟା । ପାର୍ମେଶ୍ୱାର୍ ଦାଉଦ୍ଆଃ ବିଷାଏରେ ଗାୱା ଏମ୍କେଦ୍ତେ କାଜିକେଦା, ‘ଆଇଙ୍ଗ୍ ଚିଲ୍କା ହଡ଼କକେ ଦୁଲାଡ଼୍କଆଇଙ୍ଗ୍, ଯିଶିରାଃ ହନ୍ ଦାଉଦ୍ ଏନ୍ଲେକାନ୍ନିଃ ମିହୁଡ଼୍ ତାନିଃ । ଇନିଃ ଆଇଁୟାଃ ମନ୍ସୁରୁଦ୍ରେୟାଃ ଇଛାସାନାଙ୍ଗ୍ ଲେକା ସବେନାଃଏ କାମିୟା ।’ ୨୩ ନେ ଦାଉଦାଃ କିଲିରେନ୍ ୟୀଶୁକେ ପାର୍ମେଶ୍ୱାର୍ ଆୟାଃ ବାନାର୍ସା ଲେକାତେ ଇସ୍ରାଏଲ୍ ହଡ଼କଆଃ ଜୀଉବାଞ୍ଚାଅନିଃ ବାଇକିୟାଏ । ୨୪ [b]ୟୀଶୁ ଆୟାଃ କାମି ଏନେଟେଦ୍ ସିଦାରେ ଯୋହାନ୍ ଇସ୍ରାଏଲ୍ରେନ୍ ସବେନ୍ ହଡ଼କତାଃରେ ଉଦୁବ୍କେଦ୍ତେ କାଜିକେଦାଏ, ‘ଇନ୍କୁକେ ପାପ୍ହେତେ ହେୟାତିଙ୍ଗ୍ତାନ୍ଲଃ ଦାଆଃରେ ବାପ୍ତିସ୍ମା ଇଦି ଲାଗାତିଙ୍ଗ୍ୟାଁଃ ।’ ୨୫ [c]ଆଡଃ ଯୋହାନ୍ ଆୟାଃ ସେୱାକାମି ଟୁଣ୍ଡୁଇତାନ୍ ଇମ୍ତା ହଡ଼କକେ କୁଲିକେଦ୍କଆ, ‘ଆଇଁୟାଃ ବିଷାଏରେ ଆପେ ଚିନାଃପେ ଉଡ଼ୁଃତାନା ? ଆପେ ଅକଏକେପେ ନେଲ୍ହରାତାନା, ଇନିଃ ଆଇଙ୍ଗ୍ ନାହାଁଲିଙ୍ଗ୍ । ମେନ୍ଦ ଆୟୁମେପେ, ଆଇଁୟାଃ ତାୟମ୍ତେ ଅକଏ ହିଜୁଃତାନାଏ, ଇନିୟାଃ ଖାର୍ପାରେୟାଃ ତନଲ୍ ରାଡ଼ାଏ ଲେକାନ୍ନିଃ ନାହାଁଲିଙ୍ଗ୍ ।’
୨୬ “ହେ ଇସ୍ରାଏଲ୍ ହାଗାକ, ଆବ୍ରାହାମ୍ଆଃ କିଲିରେନ୍ ହନ୍କ ଆଡଃ ପାର୍ମେଶ୍ୱାର୍କେ ବରୱାଇତାନ୍ ସବେନ୍ ସାଅଁସାର୍ ହଡ଼କ, ଆବୁକେଗି ନେ ଜୀଉବାଞ୍ଚାଅରେୟାଃ କାନାଜି ଏମାକାନା । ୨୭ ମେନ୍ଦ ଇନିଃ ଜୀଉବାଞ୍ଚାଅନିଃ ତାନିଃ ମେନ୍ତେ ଯୀରୁଶାଲେମ୍ରେ ତାଇନ୍ତାନ୍ ହଡ଼କ ଆଡଃ ଇନ୍କୁଆଃ ଆଗୁଆଇକ କାକ ସାରିକାଦ୍ ତାଇକେନା । ଇନ୍କୁ ସବେନ୍ ରୁଡ଼ୁନ୍ ହୁଲାଙ୍ଗ୍ରେ ପାଢ଼ାଅଃ ତାଇକେନ୍ ନାବୀକଆଃ କାଜି କାକ ଆଟ୍କାର୍ଉରୁମେ ତାଇକେନା । ଏନ୍ରେୟ ଇନ୍କୁ ୟୀଶୁକେ ଚିଟାକେଦ୍ତେ ନାବୀକଆଃ କାଜିକେ ପୁରାକେଦାକ । ୨୮ [d]ଇନ୍କୁ ଗନଏଃ ସାଜାଇ ଏମ୍ରେୟାଃ ଜେତାନ୍ ଗୁହ୍ନାଁ କାକ ନାମ୍କେଦ୍ରେୟ, ଇନିଃକେ ଗନଏଃ ସାଜାଇ ଏମ୍ ନାଗେନ୍ତେ ପିଲାତୁସ୍କେ କାଜିକିୟାକ । ୨୯ [e]ଇନିୟାଃ ବିଷାଏରେ ଧାରାମ୍ପୁଥିରେ ଅଲାକାନ୍ ଲେକାଗି ସବେନ୍ କାମି ରିକାକେଦ୍ ତାୟମ୍ତେ ଇନ୍କୁ ଇନିଃକେ କ୍ରୁଶ୍ଏତେ ଆଡ଼୍ଗୁକିୟାକ ଆଡଃ ତପାଗାଡ଼ାରେ ଦହକିୟାକ । ୩୦ ମେନ୍ଦ ପାର୍ମେଶ୍ୱାର୍ ଇନିଃକେ ଗନଏଃହେତେ ଜୀଉବିରିଦ୍କିୟା, ୩୧ [f]ଆଡଃ ପୁରାଃ ମାହାଁ ଜାକେଦ୍ ଇନିଃଲଃ ଗାଲିଲ୍ଏତେ ଯୀରୁଶାଲେମ୍ତେ ହିଜୁଃ ସେନଃତାନ୍ ହଡ଼କତାଃରେ ଉଦୁବେନ୍ୟାନା । ଇନ୍କୁ ନାହାଁଃ ଇସ୍ରାଏଲ୍ ହଡ଼କତାଃରେ ଇନିୟାଃ ଗାୱାକ ତାନ୍କ । ୩୨ ଆଡଃ ଆଲିଙ୍ଗ୍ ଆପେକେ ଏନ୍ ସୁକୁକାଜି ଉଦୁବ୍ ନାଗେନ୍ତେ ନେତାଃରେ ମେନାଲିୟାଁ, ଅକ୍ନାଃଚି ପାର୍ମେଶ୍ୱାର୍ ଆବୁଆଃ ପୁର୍ଖା ହାଡ଼ାମ୍ହଡ଼କକେ ବାନାର୍ସା ଏମାକାଦ୍କ ତାଇକେନାଏ, ୩୩ ପାର୍ମେଶ୍ୱାର୍ ୟୀଶୁକେ ଜୀଉବିରିଦ୍କିଃ ହରାତେ ଆବୁ ନାଗେନ୍ତେ ନାହାଁଃ ପୁରାକାଦାଏ ଆଡଃ ଆବୁ ଇନ୍କୁଆଃ କିଲିରେନ୍କ ହବାକାନାବୁ । ଦାଉଦ୍ଆଃ ଦୁରାଙ୍ଗ୍ପୁଥି ୨ ଆଧ୍ୟାଏରେ ନେ'ଲେକା ଅଲାକାନା,
୪୨ ପାଉଲୁସ୍ ଆଡଃ ବର୍ଣ୍ଣବାସ୍ ସାମାଜ୍ ଅଡ଼ାଃ ବାଗିକେଦ୍ତେ ସେନଃ ତାଇକେନାକିନ୍ ଇମ୍ତା, ହଡ଼କ ଏଟାଃ ରୁଡ଼ୁନ୍ ହୁଲାଙ୍ଗ୍ରେ ହିଜୁଃ ରୁହାଡ଼୍କେଦ୍ତେ ନେ ସବେନ୍ ବିଷାଏରେ ଆଡଃଗି ପୁରାଃତେ କାଜି ନାଙ୍ଗ୍ ଇନ୍କିନ୍କେ ବିନ୍ତିକେଦ୍କିନାକ । ୪୩ ହଡ଼କ ପାଞ୍ଚେଟ୍ ବାଗିକେଦ୍ତେ ସେନଃୟାନ୍ ତାୟମ୍ତେ, ପୁରାଃ ଯିହୁଦୀ ଆଡଃ ସାଅଁସାର୍ହେତେ ଯିହୁଦୀ ଧାରାମ୍ତେ ବାଦ୍ଲାଅକାନ୍ ହଡ଼କ, ପାଉଲୁସ୍ ଆଡଃ ବର୍ଣ୍ଣବାସ୍କେ ଅତଙ୍ଗ୍କେଦ୍କିନାକ । ପ୍ରେରିତ୍କ ଇନ୍କୁଲଃ ଜାଗାର୍କେଦାକ ଆଡଃ ପାର୍ମେଶ୍ୱାର୍ଆଃ ସାୟାଦ୍ତେ ଜୀଦାନ୍ ବିତାଅ ନାଗେନ୍ତେ ଉସ୍କୁର୍କେଦ୍କଆକ ।
୪୪ ଏଟାଃ ରୁଡ଼ୁନ୍ ହୁଲାଙ୍ଗ୍ରେ, ସାହାର୍ରେନ୍ ଲାଗ୍ଭାଗ୍ ସବେନ୍ ହଡ଼କ ପ୍ରାଭୁଆଃ ବାଚାନ୍ ଆୟୁମ୍ ନାଗେନ୍ତେକ ହିଜୁଃୟାନା । ୪୫ ଯିହୁଦୀ ହଡ଼କ ଗାଦେଲ୍ ହଡ଼କକେ ନେଲ୍କେଦ୍ତେ ହିସ୍ଙ୍ଗାତେ ପେରେଃୟାନାକ ଆଡଃ ପାଉଲୁସ୍ଆଃ କାଜିରେ କାଜିକଟଙ୍ଗ୍କେଦ୍ତେ ଇନିଃକେ ଲାନ୍ଦାକିୟାକ । ୪୬ ମେନ୍ଦ ପାଉଲୁସ୍ ଆଡଃ ବର୍ଣ୍ଣବାସ୍ ଆଡଃଗି ବେଗାର୍ ବରତେ କାଜିକେଦାକିନ୍, “ଆପେତାଃରେ ପାହିଲାତେ ପାର୍ମେଶ୍ୱାର୍ଆଃ ବାଚାନ୍ କାଜିୟଃ ଲାଗାତିଙ୍ଗ୍ ତାଇକେନା । ମେନ୍ଦ ଆପେ ଜାନାଅ ଜୀଦାନ୍ ନାମେକାଲେ ମେନ୍ତେ କାପେ ବିଚାର୍କେଦ୍ ହରାତେ, ଆଲିଙ୍ଗ୍ ଆପେକେ ବାଗିକେଦ୍ତେ ସାଅଁସାର୍ ହଡ଼କତାଃତେଲିଙ୍ଗ୍ ସେନା । ୪୭ ଚିଆଃଚି ପ୍ରାଭୁ ଆଲିଙ୍ଗ୍କେ ନେ ଲେକାଏ ଆଚୁକାଦ୍ଲିୟାଁ,
୪୮ ସାଅଁସାର୍ ହଡ଼କ ନେଆଁ ଆୟୁମ୍କେଦ୍ତେ ରାସ୍କାୟାନାକ ଆଡଃ ପ୍ରାଭୁଆଃ କାନାଜି ନାଗେନ୍ତେ ମାନାରାଙ୍ଗ୍କେଦାକ । ଅକ ହଡ଼କ ଜାନାଅ ଜୀଦାନ୍ ନାମେ ନାଗେନ୍ତେ ସାଲାୟାନାକ, ଇନ୍କୁ ଏନ୍ କାନାଜିରେ ବିଶ୍ୱାସ୍କେଦାକ ଆଡଃ ବିଶ୍ୱାସୀ ହବାୟାନାକ । ୪୯ ପ୍ରାଭୁଆଃ ବାଚାନ୍ ଏନ୍ ପାର୍ଗାନ୍ରେୟାଃ ସବେନ୍ସାଃରେ ନିତିର୍ୟାନା । ୫୦ ମେନ୍ଦ ନାଗାର୍ରେନ୍ ଆଗୁଆଇ ହଡ଼କକେ ଆଡଃ ସାମାଜ୍ରେ ମାଇନ୍ ନାମେତାନ୍ ସାଅଁସାର୍ କୁଡ଼ିକ, ଅକନ୍କଚି ପାର୍ମେଶ୍ୱାର୍କେ ବରଭାକ୍ତିତାନାକ, ଇନ୍କୁକେ ଯିହୁଦୀ ହଡ଼କ ଉସ୍କୁର୍କେଦ୍ତେ ପାଉଲୁସ୍ ଆଡଃ ବର୍ଣ୍ଣବାସ୍କିନାଃ ବିରୁଧ୍ରେ ସାସାତି ଏଟେଦ୍କେଦାକ ଆଡଃ ଇନ୍କିନ୍କେ ଏନ୍ ପାର୍ଗାନ୍ତାଃଏତେ ଅଡଙ୍ଗ୍କେଦ୍କିନାକ । ୫୧ [g]ପ୍ରେରିତ୍କିନ୍ ଆକିନାଃ କାଟାରେୟାଃ ଧୁଡ଼ି ଇନ୍କୁଆଃ ବିରୁଧ୍ରେ କଟାବାଗିକେଦ୍ତେ ଇକନିୟାତେକିନ୍ ସେନଃୟାନା । ୫୨ ଆଡଃ ଆନ୍ତିୟୋଖ୍ରେନ୍ ବିଶ୍ୱାସୀକ ପାବିତାର୍ ଆତ୍ମା ଆଡଃ ରାସ୍କାତେ ପେରେଃୟାନାକ ।
<- ପ୍ରେରିତ୍ 12ପ୍ରେରିତ୍ 14 ->