1 Iesu uatabu abele paerlam, epe abi irmili gaire le lakub.

2 Dasmerare, nerute lepera tabarki a etkobeilu abim, kega, Opole ae, ese ma lag ma umele kari idigiri.

3 Ege Iesu ra tagu itirimuriklu a itutilu abim, E kega, Kara lag mari idigir. Epe sobkak idigir abara leper.

4 Ege Iesu abi detager, kega, Debele ma nole atomeret kak nerute le; a ma bakeamulu mabu, etomeret abele zogo le, a ma abi ikuar zeku lu mokakalam Mose ra gelar, atamelam uiabim.

5 Ege Iesu Kaperenauma tabarki, epe abele kerem le, abele netat handed le abara nosik, E tabaruk a abi damsare,

6 Kega, Opole ae, kara memeg le eidi meta ge gimgim, abele kegar au asiasi.

7 Ege Iesu abi detager, kega, Mena kaka bakeamulu a abi idigir

8 Kerem le, netat handed le abara nosik, abi detager, kega, Opole ae, nole abkoreb ma tabakeam bao muige kara meta; epe netat mara mer tabarki, a idigir kara memeg le.

9 Abelelam kaka nerute le kari sirdam, a kaka sirdam abele gaire ares le; ese kaka abi detager nerute le, Ma bakeam, epe E bakeam; a nerute le, Ma tabakeam, a ko tabakeam; pako kara memeg le, Ma ikeli abele lu, epe E ikeli.

10 Ege Iesu asoli, E au damared, E uiabim detagerare gaire le abi irmilare, kega, Ageakar kaka uabi detagerare, kaka nole erdali nerute Isaraela le nagri au oituli mokakalam.

11 Kaka uabi detagerare kega, Gaire le tabakeuare naigerlam a siailam, ko kemem okakis eroare Aberahama, a Isaaka, a Iakobo, abele kotor baselaia ge:

12 Epe ged kemle uerem giz uiaba imuare abele kupikup adige, a nagri au ebazuer a tereg ikukumared.

13 Ege Iesu abi detager abele kerem le, handed le abara nosik, Ma bakeam, mokakalam mara oituli, a ko ikeli marim abkoreb. Epe akaida abara memeg le abele haua ge.

14 Epe Iesu balu abele Peteru ra meta ge, E abi erdali abele apu Peteru ra kosker eidi abele urueri gim.

15 E itutilu abele kosker ra tag, epe akaida abara urueri gim; a E tekueilu abi memeg le uiabim.

16 Epe kikem, uiaba taraisare gaire le demoni barota; epe namuare adud lamar giz abele abara merlam, E idigiri uiaba gim le giz:

17 Iaueakai bakedida abele Isaia ra mer, kega, E ais meriba gebegeb, a ko bakuar meriba gim.

18 Ege Iesu dasmerare gaire le lakub abi derumeda, epe E uiabi detagerare, Ua bakeuare nerute apek.

19 Epe nerute aotale tabarki, a abi detager, kega, Ereuer le, kaka mari irmili gaire uteb ma bakeam.

20 Ege Iesu abi detager, kega, Arobe nagri abara kur, a ebur giz epereda nagri uteb uteidi; ege Le la Uerem E nole abara uteb uteidi.

21 Ege nerute abara kaimeg giz abi detager, Opole ae, ma kari namarid kaka kekiam bakeam etkobei kara aba.

22 Ege Iesu abi detager, Kari narmili; a dikaer eud le giz uiaba etkobei eud le giz.

23 E atiem abele nar, epe abara kaimeg giz abi irmilare.

24 Dasmerare, abele au uag tabarki abele gur ge, epe gaire zauber etatakoi abele nar; a E uteidi.

25 Epe abara kaimeg giz tabakeam, a abi itir, kega, Opole ae, ma uerkab keribim, a keriba maike nabaumer.

26 Ege E uiabi detagerare, kega, Nalugelam uaba geum, uaba kebikebi oituli? Epe E tekueilu, a dasiumda abele uag pako abele gur, iaueakai au metalug.

27 Ege uiaba le giz abi damared, kega, Au kale abele Opole, abelelam uag a gur aserei.

28 Ege E bakeamulu nerute apek abele ged Geregese tabarki, ege obapitei neis le demoni badariei tabakeamlam aolam, uiaba au saserim, umer kak nerute le ekase abele gab ge.

29 Darasmer, neis le ereretikri, kega, Nalu mara mer keribim, Iesu ae, Ade ra Uerem? Nako ma tabakeam ike keribim ikeli asiasi a nole bakedida abele niai kerker?

30 Ege muriz ge abele gaire borom degemeli.

31 Uiaba demoni giz abi damsare, kega, Ese ma keribim imuare adige, ma keribim namarid gaire borom giz.

32 Ege E abi detager uiabim, Ua bakeuare. Ui ge baos adem, a bakeuare abele gaire boromaem; darasmerare, abele borom au isir baupamarti abele au uak gur ge, a baum eseamulu abele gur ge.

33 Ege gaire le asisiem a koreder bamer, a baos abele uteb ge, a natomertare gaire lu uridili, a pako gaire lu ikeli neis le demoni dedkoli.

34 Dasmerare, gaire le uridili tabarkare abele utebelam a obapitare Iesuim; uaiba abi erdarare, epe uiaba abi damsare, A ma bakeam adem keriba gedlam.