1 Wi ge bakarki able utebge maike au uteb Gerasa, nerut pekge ni keperge. 2 Nawar ge Iesu adem narlam eupamada, ege le tabakiamuda able uteblam ge nade paier nagriweretlare abi ops wadipiti. 3-4 Ege dimoni able lege dawer, e ge dawer bakir paierge. Nole ko le dawer abi malili lageru wadidbari: mitkar kerkerge iegize abra tag a teter wadaraubareda, e gair kerkerge malili lager wadarboli a wadareskimreda taba teterge. E au kelerkelar wadali nole ko nerut lelut abi ikaida ei maiem wekepli. 5 Kige a pako gergerge e paierge a paserge weseseredli ei sasmir wadimeli a tababu bakiru obasakli.

6 Able lelut Iesui terdari aumurislam ege abim korider temridari akaida tababu kokmamumamu emridari Iesui opem abi isorgiru ikaida. 7-8 Iesude eudige abi ikailu, “Dimoni, ma adem teosmer able lelam!” Ege sasmir dimridari, “Iesu able Au Adira Werem, “Ma nole nerut lu karim ikai! Mage Adi detager ma nole kari nares.”

9 Iesude abi itmeri, “Mara nei nako dikeredi?”.

Ege able lelut abi detagri, “Kara nei dikeredi Lera Kub ableglam ki mitkar uridli.” 10 Ege Iesuim bagwi yabi umerkak adem wanamarikdarda able utebiam.

11 Au kub puakara ge lewer erolare maike paserdege. 12 Able dimoni Iesuim bagwi, “Ma kerbi kei demarkare puakaem mage kerbi dikerare ki naba yabidoge nabarte.” 13 Iesu eudige iaglag baida. Ege dimoni adem bausi able lelam bakiauda puakage tabarti. Able kemerkemer maike 2,000 puaka korider bamri deibge barkarki a batweri wege gurim baragda a guni baiterda.

14 Able puaka aseseredle korider adem bamri mir lege ebreredlare muige utebge a gako yabidoge dorgele ge sumesge urder. Mitkar able le tabakiauda wadasmerda nalu lu ge akaida. 15 Wi tabakiauda ge Iesui doge wige able le erdarda ge abra aukaka mitkar dimoni abidoge urder. Wige geumge bakeri ableglam e ge irmireder abra wali damireder e nole ko urker ge dawer.

16 Nalegize ge abi erdarda, wader le daratagerlare nalu ge akaida able leem a able dimoniem a able puakaem. 17 Wi eudige bakeri Iesui itmerda e yaba uteb odikairti.

18 Nawar ga Iesu akawerter narge able le ya abra dimoni waduridli Iesuim bagwi e abidoge obakiamuda atiem. 19 Ege Iesu nole lagkak dawer abi waigardi taba doge. Ege able le detagri, “Ma bakiamu gedim mari buaiem yabi daratagrawem nalu marim Oplelut ikaida a e nalu debele marim dali.”

20 Ege able le bakiamuda 10 Utebem ge wader le daratagelare nalu Iesude abim akaidari. Na iegize ge abi asorda wige bazigmuarti.

21 Iesu ko akomedari narge bakiamuda nerut pekge ni keperge. Nade lera nikidetreder tabakiauda abi dairumareta maike ni keperge. 22-23 Netat sunago kirimle abra nei dikereder Zairus takabiamuda Iesuim. Nadege e Iesui erdari, Zairus tababu akaida kokmamu emridari aukelarkelar Iesuim bagwi, “Kara kebi neur no tididli e maike weteumi. Kape marim bagwi, ma taba mara tag abidoge tadakmerik ya waiakai abra gim wadesemu ei mena wadawer.” 24 Ege Iesu abidoge atabemeda, a lera ga nikidetreder abi irmirdlare a abi imuaretlare.

25 Netat koskir ko ge dawer e asiasi wadigili abra aukaise mam wadipitli able niainiai 12 urut. 26 Able koskiret ya ko tabara asiasi wadigili gair lukuplelam, e tabara bodom bakir wadikrili lukuplege ya waiakaida wi abi upiwaditidarda. Ege nole akaida sikak baida yabi upiatidarlam, ege no akaida au gimgim baida.

27 Able koskiret wasoli nako Iesude le wanadgireda, ege tabakiamuda keubu daraweida ge le nikidetreder Iesura wali paikai ditutida. 28 Able koskiret dikepwari, “Ese ka umele abra wall datutilu kara gim ya wesimu.” 29 Ege keko able dudumdudum abra mam ya abra wadipitli keko durwarti, ege umele baida abra gem dakaida sikak baidari able gimlam.

30 Keko Iesu umele baida abra sasrim abialam adem deosmeda. Ege bataurikda able kubge ge nikidetreder a yabi nautmerda, “Netide pe kara wali mop itutida?”

31 Abra memegle eudige bakeri abi ikaidarda, “Able le pema uridli mari naumarteda. Mape naluglam eutmeli, 'Netide kari natutidari?'” 32 Ege Iesu no mena ikweireder erkep ikereder able le wairdari ge netide abi itutidari.

33 Abra koskiret ga keubu dikepwari nalu lu abim akaida ege geumgeum tabakiamuda akaida Iesuidoge kokmamu emridari a abi detagri ge e nalu ikaidari.

34 Iesude abi detagri, “Kara neur, mara gim esemuda ableglam mara owatur ikeredi. Ma bakiamu mapodange sikak nawa nole able asiasi ko digiwa.”

35 Nawar ga Iesude mena able mir detauter, wader miraisisle tabakiauda Zairusi metalam a Zairusi detagerda, “Mara neur teumida. Epe nole pa ko ikeredi ma mena able Erwerle damisrer.

36 Iesude nole yabi mirem girip irdireder ge nalu wi detautlare. E akaida able sunago kirimle detagri, “Ma nole geumge akai, ma no kari narmirwa.” 37 Ege no yabi naisidare Peteru a Zemis a abra barada padali Zone bakiaudare kemem, nole nerut le ko dawer. 38 Wi bakiaudare ge able kirimle metage eosidare ge nade Iesude gair le nardarda ge wamisrer. Ege eudige i asri a ii sasmir. 39 Ege bakiamuda able metaem badari a akaida yabi daratagerda, “Wa naluglam pe wa bamisreda a wa naluglam i bazoli? Able kebi neur nole eumida - e no ut iperedi!” 40 Wige eudige bakeri abi ga desaredlare, ege yabi adem nausa metalam.

Ege no kebi neurira apuiba babei daragardi a abra neis a netat memegle pa darale bakiaudare able kebi ut uteb ge bartidare nade ge able kebi neur ipereder. 41 Ege bakiamuda abra tag derpeidari a abi taba miru detagri, “Talita kum” - “Kebi neur, ka mari peka natagri, ma ekiam!” 42 Ege keko able kebi neur ekiamda a digmer muige metage. E 12 urut dawer.

Wige no kemerkemer bazigmuarti. 43 Iesude yabi kelarkelar daratagerda, “Wa nole gair le daratagrawem.” A ga akaida yabi ko daratagerda, “Wa abi nalu ikwarare ei wairo.”

<- Mareko 4Mareko 6 ->