1 Kepkep gerger barukdarda Iesu ko akomeda Kapanaumem, ege legize asorda e ko takomeda taba metaem. 2 Au kub lera etami wige meta damida mitkar barki mena adge tege derapeiri.

Nawer ge Iesude marauermer mitkar leem, 3 wader le bosi, neis a neis legizege atmutatmut le tigardidere. 4 Wi umerkak able kimiar waigareda Iesuim ableglam yaba gab aomaom ikereder able mitkarlelam, wige ao dirbidere totge lesui natkak. Wige able le ditimdidere taba papekge able nebge.

5 Nade Iesude yaba au owatur dasmeri ege able atmutatmut le detagri, “Kara werem, mara wit pe bamaidereda.”

6 Wader Aotarle ge emreder. Wige dikepwarlare, 7 “E seksek dikeredi able leem e ke waditauter. Nole le ko dali e wit uwadimaidered, no Adide wit wadimaidered.”

8 Iesu keko umelebaidari wi nako dikepwarlare, ege eudige daratagerda, “Wa nole ke dikepwararwem. 9 Wage ke dikepwararwem: nalu sikak dikeredi, able atmutatmut le obatager, “Ma wit bamaiderdi” a “Ma ekwei, papek mara etaruk, mage nagem”? 10 Pe irdi ka yaka wabi datomertare able Le Wermira sasrim dikeredi able gesepge ko wit waimaidered.” E eudige atmutatmut le detagri, 11 “Ka mari aukaise natagri, ma eti, mara papek etaruk, mage bakiamu gedim.”

12 Ege legize abi lidkarem dasmerlare nade ge e ekweilu, tabara papek etarukda a bakiamuda. Wige bazigmuarti a wi Adi dispilare. Wi tabara batagelare, “Mi nole able orwairorwair lu kikem dasmerda.”

13 Iesu akomeda bakiamuda Galilaia keperge wege. Lera kub abim tabakiauda ege eudige akaida yabi nerwerda. 14 Nadege e digmer, ege bodom bakir atkimed le erdari, abra nei dikereder Libai, Alpiasira werem. Libai ge imireder taba dorge utebge. Iesu akaida abi dabgeri, “Ma kari tararmir.” Libai ekweidari a abi irmiri.

15 Keubu, Iesude lewer erwer Libai metage. Wader bodom bakir atkimed le a adud le ko ge turder.

16 Wader Aotarle ge Parisaio urder Iesui erdarda lewer erwer able lekem, wige abra kaimegiz darautmerda, “E naluglam lewer eroli adud lege?” 17 Iesude yaba autmer mir asri, ege eudige akaida, “No gimgimle pe lukuple iaglag uridli, gimkakle pe nole lakak. Kaka tabakiamuda adud le darabgerare, nole debele.”

18 Netat gergerge, Zonera a Parisaiora kaimegiz nole lewer arokak urder. Wader le tabakiauda Iesuim a abi itmerda, “Zonera a Parisaiora kaimegiz lewer arokak uridli. Naluglam mara kaimegiz nole ko lewer arokak waurder?”

19 Iesude detauti, “Wa nalu dikepwareda? Nako le paipu lewerge oba werer ge obakerer? Nole. Nade paipule yabidoge wadawer wi lewer wairolare. 20 Able kerker ya watabaruk nade paipule ya yabialam obakiamu. Able gergerge wi ya lewer arokak waurder.

21 Nole netat lelut kerkar walimog etketi emeret walige. Nalu ya wakai? Able kerkar walimog ya obazrare emeret walilge.

22 A nole netat lelut kerkar waina epaiterdi muige emeret tarporge. Nalu ya wakai? Able kerkar wainade ya able emeret tarpor wadiskimer, a able waina a pako tarpor ya obatkowam. Nole, pardarlegize kerkar waina waipaiterdare muige kekar tarporge.”

23 Sabadge, Iesu a abra kaimegiz wi daragemda bakiauda kon gedubge. Abra kaimegiz bakiauda wader kon etoperda. 24 Ableluglam Parisaio bakeri Iesui ikaidarda, “Ma yabi darasmerare! Wi keriba geiar erapeda wi able lu ikereda Sabadge.”

25 Iesu yabi daratagerda, “Agekar wawa etageda Dawitara mir, nade e a abra armirle wige wererge bakeri. 26 Ege bakiamuda Adi metage badari a arito irwi pe no Adim wagimuaretlare. Able lu ge akaida nadege Abiata Kirim Merkemle dawer. Muige kerbi Gelarge, no merkemide tebteb arito wairwer; Dawitade irwi a wader ge tabara armirle naiswerda.”

27 A e yabi daratagerda, “Sabadge barsirda leem, nole le barsirda Sabadem. 28 Pirdiredi, Lera Werem pe Ople dali gair lugira, Sabad ko irdiredi.

<- Mareko 1Mareko 3 ->