1 Ege Iesude yabi daratagerlare mir abisir miru: “Kimiaret tabara luneg waina gedubge irti. Ege kar irki abi deraweidari, e awak dirbi waina agmem a meta dimri muige gedubge. Ege wader asesered le namarikdarda bakiauda gedubge urder ya waiakai wi abi wader lewer waiswereda. Ege bakiamudari muris gedim.

2 Nade ga nur kerker itutidari, ege tabara dorge le emarikda able asesered leem ko yabiaiam abra arapergair wataisa able nur kerkerlam. 3 Ege asesered legize able dorge le erpeidarda a eparsirda a abi emarikdarda nole lukak.

4 Ege able kimiaride nerut dorge le emarikda; ege able asesered legize able dorge le kirimge eresa a abi aiselare. 5 Ege nerut dorge ga emarikda, wige abi ipita. Ege able lelut wader mitkar dorge le ga emarki; asesered legize yabi nareslare a wader ge eudem naresa.

6 Ege able kimiarira no netat le barikda ko waimarikda - abra nasnas werem. Ege keubu ga emarik abra werem bakiamuda asesered leem. E dikepwarer, “Wi ya sikak kara werem wairpeirare.”

7 Nadege able asesered legize abi erdarda, wige tabara batagelare, “Able lukem lera werem pe ikase. Tabakiaware, mi abi apitare, able gedub ya wakai meriba obai!” 8 Wige abi erpeidarda a ipita, a abra gem adem gedublam bataweredarda.

9 Iesude yabi nautmerda, “Aka wa nako dikepwareda able gedub kemlelut nalu ya nerut lu waikai? E ya watakomer a yabi asesered le ya wanarsare, a wader kerkar asesered le ya waiker gedubge wanamrare. 10 Wa dikepwarare able mog zogoziawalilam wawa emetu etageda: 'Able bakir, amer le detuakda e akaidari agekar bakir baidari. 11 Oplede able lu ikeri e merbi poniem sikak ikeredi”'

12 Wige laglag urder Iesui gelar pekge wairpeidarda ableglam wi umele urder able mir abisir miride yaba gem ermer. Wige no geumge bakerer ableglam lera nikidetreder. Wige abi ge dikaireta wige adem bakiauda.

13 Wi wader Parisaio le a Erodira le lesuim taramirikdarda ko abi tabara miru wadamisirda. 14 Wi tabakiauda ge abidoge a abi detagerda, “Erwerle, ki umele uridli ma gair kerkerge agekar waditauter a ma nole le geumge wekerer. Ki umele uridli ma nole girip wairdirer able leem e nete dali; ma le agekar wanerwerlare Adira gab. Ma kerbi detagrare, pe keriba geiar ikeredi, nako e agekar ikeredi mi Kaisai bodomalam aiswelare? Nako nolekar?”

15 Ege Iesude umele wadasmeli yaba mir amisir. Ege yabi nautmerda, “Wa naluglam mokakalam ikereda kari namisreda? Wa zorom bakir tikadarare ya waiakai ka dasmere.”

16 Wige bodom bakir abim tikadarda ege eutmeri, “Netira nei iba opei pe nauperedi?”

Wige abi detagerda, “Kaisara.”

17 Ege Iesude yabi daratagerda, “Wa Kaisai aiswerawem nalu lu pe Kaisara nagriwerteda, a Adi aisweawem nalu lu pe Adira nagriwerteda.” Wige abi miriam bazigmuarti.

18 Wader Sadusaio tabakiauda Iesuim (wipe waditautlare le ya umerkak eudlam obakiam).

19 Wige Iesui detagerlare, “Erwerle, Mosede kerbi gelarge ditari ese kimiar nole omaskirkak weieumi able kimiar baradade ya abra maik wadispi ya waiakai able omaskir ya obos abi baradaem. 20 7 barada urder. Narbit baradade koskir ispida ege no eumida nole omaskirkak. 21 Ege nerut baradade ga abra maik dispida, a ega eumida nole omaskirkak. Able lu ko akaida nerut baradaem, 22 a able lu gako akaidari gair able barada ge urder. Gair able 7 barada baumi nole omaskirkak. Keubu ga koskir ko eumida. 23 Able kerker watabaruk nade ya eudle obakiamu ididem, ei netira koskir ya wadawer? Ege gair 7 baradage ispida.”

24 Iesude yabi daratagerda, “Wawa seksek le uridli ableglam wa nole umerkak zogoziawali a waba nole Adira sasrim ikeredi. 25 Nade eud le obakiamu ididem wi ya waurder angelaise waturder kotorge; kimiar koskirkem ya umerkak ko tabara watabasiblare. 26 Agekar, eud le ya obakiamu. Ese wawa emetu etagda able ziawali ge Mosede ditari, muige able adge ge ur edger luneg ititier wa emetu pewa waitaglare Adide Mosei detagri, “Kaka peka abra Ad nali Isakara a Iakobara. 27 Ei idid lera Ad dali, e nole eud lera dali. Wawa aukaka seksek dikepwareda!”

28 Netat le Autarlelam ge dawer able mir asri ge wi miripulare. E asri Iesude barkak mir Sadusaio daratagerda. Ege tabakiamuda lesuim ko abi waitmeri, “Nalu gelar pe aukakale ikeredi?”

29 Iesude abi detagri, “Able aukaka gelar pe ikeredi, 'Israla le, wa asrare! Ople meriba Ad E Ople tebteb dali. 30 Wa omar waba Ople waba Ad kemerkemer waba nerkepu a kemerkemer waba lamaru a kemerkemer waba idoniu a kemerkemer waba kelaru! 31 Maike pe able aukaka gelarge ikeredi, Wa able le omarge nakerawem pe wabidoge maikes uridli able orwairorwairpe wawa wabu omarge bakereda Nole ko nerut gelar ikeredi aukakale yabim pe able neis gelar nakeredi.” 32 Aotarlelut Iesui detagri, “Erwerle, mama agekar detautli. E agekar dikeredi, E no netat Ad dalia nole ko nerut Ad dali.

33 Ese legize Adi omarge waikelare kemerkemer taba nerkepu kemerkemer taba idoniu a kemerkemer taba kelaru, a ese legize tabara maikes le omarge wanakelare, able lu ya sikak waikereder yabim able ieem pe ebur a wader lu wagimuaretlare Adim zogozogo lauiauge.

34 Iesude ge abi detagri, “Mama au maike nali Adi basalaiage!”, ableglam e abi asri able lera mir au pardarpardar ikereder. Keubu, gair le ge urder yaba geum barukda abi wader lugem ko waitmerda.

35 Nade Iesude yabi au zogometage nerwerlare, ege le ge carautmerda, “Aotarlegize nalugem detauteda Keriso ya Dawitara werem wadawer? 36 Lamar Zogode Dawitai detagrer e waditauti, Oplede kara Ople detagri 'Ma ge emri kari narbit pekge nade ka mara kurab le akere mari tetergab aodage! 37 Dawitade Kerisoi dabgerer Ople. Pa dikeredi, Keriso ya naluglam Dawita werem wadawer?”

Ege able au kub lera ge nikidetreder Iesu sererserer asorlare.

38 Muige abi erwerge, Iesude lera kub daratagerda, “Wa okeoke uridwa Aotarleem wi laglag wadaragemlare piripiri wali obatkirer a yabi tamage wanareplare. 39 Wi tabara auka debe uteb waitutilare sunagoge a lewer aroge. 40 Wi koskir maikera meta erwamem wadaraislare, a tababu pa obakelare wi zogozogo le uridli pe auka piripiri erkep obasamer. Wi able tonar pe ikereda yaba asiasi bodomalam waiakai aukaise obai!”

41 Iesu ga irmireder maike au zogometara bodom bakir akri bokesge, a le darasmelare bodom bakir abidoge arotlare. Gair lugizkemle kimiar aukaka bodom bakir arotlare. 42 Ege lukak koskir maik tabakiamuda badari a eudige neis kebi bodom bakir natimeda, wi okakise nakereder no neisneis bodom bakir. 43 Iesude tabara memegle okakise darabgerda a eudige daratagerda, “Ka wabi agekar detagreda, able lukak koskir maik pe dali e aukaise arti bodom bakir bokesge pe wader legize arteda. 44 Ege wader legize tabara kaier bodom bakir arotlare, ege e arti nalu lu ge abra daragriweretlare. E lukak le dawer, a able bodom bakir e dikri ge no abra able bodom bakir daragriwertelare.

<- Mareko 11Mareko 13 ->