1 Wige tabakiauda maike Ierusalemage. Wi taba kikem ge able utebge Betpeiz a Betenia ge Oliwa Paserge. Iesude tabara kikem neis memegle namarikda. 2 Iesude yabi daratagri, “Wa bakiamulam able utebge pe noko kikem irdiredi. Pe noko muige able utebge wa asinara werem ya erdaram pe noko tidimriredi. Nole le abidoge egimudari. Wage tidituimerlam a kei tigaredlam. 3 Ese nalelut wabi waditmerwa, “Wa naluglam able ikereiei?” wage abi detagerwam, “Ople laglag dali. E ya abi kei dudumge watimarik.””

4 Wige bakiamudariei a able asina erdariei metage adge ekweireder, tege dimrireder. Nawer ga wi ditwimeretlei, 5 wader le ge urder yabi nautmerlei, “Wa nalugem wa asina ditwimerteiei?” 6 Wige yabi daratagerda nako ge yabi Iesude tadaratagri, ege le laglag berda.

7 Wige able asina tigardi Iesuim. Wige tabara amiwali tumem asinage isigirda, a Iesu ge akarikda tumem emrida. 8 Mitkar legize tabara amiwali gabge isigerlare, a wader legize lutam isimlare gedublam a gabge isigerlare.

9 Lege kikem Iesuidoge nakasirweretlare a keubu ga tarakasirweretlare ererbakrier, “Mi Adi daospirlare! Adira werkab able lege ikeredi ge tabakiamuda Ople neige! 10 Adira werkab pe merbi bab Dawitai basalaiage ikeredi! Able basalaia pe tikase! Gair aospir Adim!” 11 Iesu Ierusalema balu. E bakiamuda au zogometa badari a erkep ikereder gair lu ge darasmerlare. Ege bakiamuda eosmeda ko akomeda Beteniem taba 12 memeglekem ableglam au kikem irdireder.

12 Nerut gergerge wi Benenialam tabakomerti. Ege Iesura werer barki. 13 Ege egremada aukaka lulam iulam lu murisge taraireder nole agegkak ege bakiamuda able luge agegem watadasmeri nako abra ageg tadaramer. Ege no lam tidiwereder ableglam abra nole kerker dirdireder abra ageg obakerda. 14 Iesude eudi able turumkak lu detagri, “Lelut umerkak ya marialam kurup ko wairo.” Abi memeglegize asorlare e able mir detauter.

15 Nade wi tabakiauda Ierusalemage bosi, Iesu bakiamudari au zogometage badari a eudige gair le adem taramuda ge wi lu baraplare a salem ikelare. E able lera yaba zorom bakir apigerlera laulau irpi adem dikri didbi a eraskiri a pako amrir bao able lera daragri ge wi dibadiba salem ikelare. 16 E le daramagerda, “Wa nole lu ko aisare zogometa gabem.” 17 Ege le ga nerwerda. E yabi daratagerda, “Able mir bautarda zogoziawalige: Kara metaya ivadabgerlare erkepasam meta able legize gair gedlam wape no pewa detauirikdarda akaidari erwamlera kur baidari!” 18 Kebi Kirim Merkem legize a Aotalegize able mir tasorda, wige bakeri mir ipulare nalu korepkorep wi Iesui waipita. Wi abi geumge bakerer ableglam kemerkemer lege bazigmuarti able erwerlam.

19 Nade kupkupi kega atraper Iesu a abra memegle pa duridli adem bakiauda able au uteblam.

20 Nerut idim kakarge, nade wi gabge nakasirweretlare, wige able turumkak lu erdarda. Able lu sipkem ikemuda. 21 Peterude dikepwali nalu ge tabakerda ege akaida Iesui ikaidari, “Erwerle ma kei egremar! Able lu ge mama detagri e eumida!”

22 Iesude eudige yabi daratagerda, “Waba owatur Adidoge waikedawa. 23 Ka wabi agekar detagerda, ese na lelut able paser waditager, “Ma mabu bataruk a mabu batimed gurem,” a nole abra nerkepge wadimarik, ese no wairmirer nalu e waditaut ya watabakerlare, e ya abim ya obakerlare. 24 Abieluglam kaka wabi detagreda, nade wa erkepbasamwa a bamsawem nerut lugem, oetrawem wa ya ereplare, a wa ya ereplare nalu lu wa ya damoslare.

25 A nade wa erkepasamwa, ese waba lidobageblare wader leem, wa nole yabim ipitawem nalu ge wi wabim ikerda, ya waikakai waba Bab kotorge wabi wadimaiderdare wabi witlam.” 26 [Ese wa umerkak wader le daramaideredlare, waba Bab kotorge umerkak wabi wadimaiderdare wabi witlam.]

27 Wi tabakomerti Ierusalemage. Nade Iesu ga tidigmer tabakiamuda Au zogometage, ege Kebi Kirim Merkem Le a Aule pa uridii abim tabakiauda 28 a abi itmerda, “Mara nalu sasrim ikeredi mape able lu ikeli? A netide mari able sasrim nakwari?”

29 Iesude yabi daratagerda, “Ka ko wabi kara netat lu dautmerare. Ese wa kari natagrare kai wabi yaka detagrare nalu sasrimge kaka peka able lu ikeli. 30 Wa kari natagrare, nako Zonera sasrim dikeredi le baptaiso wadarapaitlare tabakiamuda Adilam? Ese nole, nako e lelam ikeredi?”

31 Wige eudige bakeri ga tabara basarediare, “Mi nalu mi detautlare? Ese mi nabatkarte, “Adilam ikeredi”, e merbi ya waditagrare, “Wage naluglam nole Zone asorlare?” 32 Ese mi datautare, “No lelam ikeredi -". (Wi le geumge bakerer ableglam gair le umele urder Zone ge agekar peropeta dawer.)

33 Ableluglam, yaba mir Iesuim ikereder, “Ki nole umerkak.” Iesude ge yabi daratagerda, “Kai umerkak wabi detagrare nalu sasrimge kaka able lu ikeli.”

<- Mareko 10Mareko 12 ->