1 Iwe ngo semal mo luwulur angelus kowe fismol we re hasi tohog we fisre yesa budoh irey sa kangaluyey bo, “Budoh bo ibe kewar ngalug fefel we ye haffayeg we yema tap chuway iy le re bele fang yal hagerger, ila haplom we ye tagiyet we re fatleha lengchel mololul kala ye cholop.Jr 51:13 2 Ir kingel talople ila resa rol faor maltemay ngal fefel le ye haffayeg, ngo yarmetael faileng le resa belas irel yar yulmi wine le, le ila mele yael fefel le wegdegel maltemay.”Is 23:17; Jr 51:7

3 Espritu Santus sa bidiy uwoy ngo angelus we sa hasiyey loh lal sew tolmay loh. Isala wiri semal fefel le ye maroro wol semal malfefedeg le ye checha mala ddolal, ngo yor yid kowe ye tayikof mo irel Deus le ye teftaf fedal uwol. Iwe ngo malfefedeg le ila fusuw chemal, ngo seg talengal le ye wochog taelengel karbow.Rev 13:1 4 Fefel le ila ye mengag irel mengag kowe ye ngos mo checha ddolal. Ngo ye hawwulu loh irel hoal, mo pearls, mo feas kowe ye pachigchig ngo ye chaw paliyal. Iwe ngo ye holu sew kap hoal le ye ssogol maltemay mo wegdeg tayikof, le ye budoh mo irel wegdegel maltemay la yal.Jr 51:7 5 Iwe ngo ye teftaf sew yid wol mala mangol le tor le ye gola fal, ngo mala fal iy yid le ila: “Babylon we ye tagiyet mele seler panger fefel ka rema tap chuway holongor, mo pangal wegdeg tayikof lal faileng.” 6 Ngo iwiri fefel we le ye belas irel cchar mokwe lol Deus, mo rechokwe re limeserloh bo fael molwe ir re dabey Jesus.

Yodwe iy wiri fefel le ngo iluwdah irel. 7 Iwe ngo angelus we sa kasiyayey bo, “Meda mele ho luwdah iyang? Ibele kangalug fael molwe ye mwol le kofael fefel le, mo malfefedeg la ye maroro fefel la uwol. Malfefedeg la ila fusuw chemal ngo seg taelengal. 8 Malfefedeg la ila ye mel fael sew yad le ye molow iyang ngo igla ila sa mes. Yesa harep yal be bidah mo falulol ngo re bele hasiloh re bela limeseloh. Panger rechokla re mel wol talop le, le te teftaf ider lal babioror cho molow mo imol molwe be subdoh faileng le, ngo rebe luwdah irel yodla rebe wiri malfefedeg le. Ye mel fael sew yad le ye molow; ngo igla ngo sa mes; ngo yebe chil tefaldoh.Dn 7:7; Rev 11:7; Ps 69:28

9 “Habe luwaley hamayi mele ngo habe medaf iyang. Mekla chemal malfefedeg le, le fusuw, ila fusuw tayit le fefel le ye maroro uwol, 10 wol ir mele fismol king ngo limmal mo luwulur ila resa mes ngo semal mele ye chil tamol igla, ngo ila semal ila ye ted budoh; bela budoh ngo ye towe ssulay fael yal tamol 11 iwe ngo malfefedeg we mele ye mel fael sew yad we ye molow ngo sa mes igla. Ila iy mele ha walmolol king le iy semal chowe fismol le ye loh bo re bela limeseloh.

12 Mokwe taelengal we seg we ho wiri, ila seg king le re ted bulong fael tamol, ila re bele moch fang keler bo rebe tamol irel sew awa le ir mo malfefedeg we.Dn 7:24 13 Chola seg ila panger ngo ye hafedeg chog yar luluwal, ngo resa fang mekla keler mo mekla re lamli ngal malfefedeg le. 14 Panger ngo re bele fedeg ngal Fadiyel Saaf we; ngo Fadiyel Saaf we mo rechokla yesa ffesangur ngo ye duwler bo choluwal le ye fel wegdigir, ila rebe win bo fael mala iy mele Samolol samol ngo iy mele Kingel king.”

15 Angelus we ye wol kangaluyey bo, “Chael kala ho wiri le fefel la ye hafayeg le ma tap chuway holongol ye maroro lengchel ila sere mo sere lam, mo yarmat, ngo sew mo sew daodol yarmat mo yalol fuluy. 16 Malfefedeg le mo mekla taelengal le seg le ho wiri, ngo re bele hafobdiri fefel le ma tap chuway holngol, ngo rebe hasi tangi pangal formel ngo resa ligdadiy le towol yor formel uwol, rebe hangi mekla fodgol ngo re fisgaloh. 17 Bo Deus sa yetolong lal yar luluwal le rebe foru mekla iy ye luluwaley, bo be sew chog yar luluwal ngo rebe fang mekla keler ngal malfefedeg le yee, la hola yodla bela llah le ye katos mekla yalol Deus.

18 “Fefel le ho wiri ila haplom le ye tagiyet le iy mele ye lamlir kingel faileng.”

<- REVELATION 16REVELATION 18 ->