1 Pǝrwǝrdigardin «keyinki yamƣur» pǝslidǝ yamƣurni tǝlǝp ⱪilinglar; Pǝrwǝrdigar qaⱪmaⱪlarni qaⱪturup, ularƣa mol yamƣurlarni, xuningdǝk ⱨǝrbirigǝ etizda ot-qɵplǝrni beridu. □«Pǝrwǝrdigardin «keyinki yamƣur» pǝslidǝ yamƣurni tǝlǝp ⱪilinglar» — bu dua yuⱪiriⱪi bexarǝt bilǝn baƣlinixliⱪ; ziraǝtlǝr wǝ üzümlǝrgǝ yamƣur kerǝk, ǝlwǝttǝ. «Keyinki yamƣur» bolsa Pǝlǝstindǝ 3- yaki 4-ayda yaƣidu, ǝtiyazliⱪ ziraǝtlǝrni pixurux ⱨalⱪiliⱪ rolini oynaydu. Bu yamƣurlar bolmisa ⱨeq ⱨosul bolmaydu. 2 Qünki «ɵy butliri» bimǝnǝ gǝplǝrni eytⱪan, palqilar yalƣan «alamǝt»lǝrni kɵrgǝn, tuturuⱪsiz qüxlǝrni sɵzligǝn; ular ⱪuruⱪ tǝsǝlli beridu. Xunga hǝlⱪ ⱪoy padisidǝk tenǝp kǝtti; ular padiqisi bolmiƣaqⱪa, azar yemǝktǝ.□«ɵy butliri» — (ibraniy tilida «tǝrafim») pal bilǝn «yol kɵrsitidiƣan» birhil butlar idi.  ■Top. 5:6

3 Mening ƣǝzipim padiqilarƣa ⱪozƣaldi; Mǝn muxu «tekǝ» yetǝkqilǝrni jazalaymǝn; qünki samawi ⱪoxunlarning Sǝrdari bolƣan Pǝrwǝrdigar Ɵz padisidin, yǝni Yǝⱨuda jǝmǝtidin hǝwǝr elixⱪa kǝldi; U jǝngdǝ ularni Ɵzining ⱨǝywǝtlik etidǝk ⱪilidu. 4 Uningdin yǝni Yǝⱨudadin «Burjǝk Texi», uningdin «Ⱪozuⱪ», uningdin «Jǝng Oⱪyasi», uningdin «Ⱨǝmmigǝ ⱨɵkümranliⱪ Ⱪilƣuqi» qiⱪidu.□«Uningdin, yǝni Yǝⱨudadin «burjǝk texi», uningdin «ⱪozuⱪ»...» — «yǝni Yǝⱨudadin» degǝn sɵzlǝrni tǝrjimǝ yolida ⱪoxup kirgüzduⱪ. Ibraniy tilida pǝⱪǝt «uningdin» deyilidu. 9-ayǝttǝ «Yǝⱨuda jǝmǝti» kɵzdǝ tutulƣan bolƣaqⱪa, 10-ayǝtni xundaⱪ tǝrjimǝ ⱪilduⱪ. Mǝsiⱨ «Yǝⱨudadin» qiⱪidu, ǝlwǝttǝ.
Baxⱪa birhil tǝrjimisi «yǝni Hudadin». «uningdin ... «burjǝk texi», .. «ⱪozuⱪ», .. «jǝng oⱪyasi», .. «ⱨǝmmigǝ ⱨɵkümranliⱪ ⱪilƣuqi» qiⱪidu» — bu tɵt namning ⱨǝmmisi «Mǝsiⱨ-Ⱪutⱪuzƣuqi»ning unwanliri bolidu. Barliⱪ pǝyƣǝmbǝrlǝrning bexarǝtliri boyiqǝ «Mǝsiⱨ» qoⱪum Yǝⱨudaning ǝwladi boluxi kerǝk idi. «Ⱪoxumqǝ sɵz»imiznimu kɵrüng.
«Uningdin» degǝnni bǝzi alimlar «Hudadin» degǝn mǝnidǝ, dǝp ⱪaraydu.

5 Xuning bilǝn ular jǝngdǝ, düxmǝnlǝrni koqilardiki patⱪaⱪni dǝssigǝndǝk qǝylǝydiƣan palwanlardǝk bolidu; ular jǝng ⱪilidu, qünki Pǝrwǝrdigar ular bilǝn billidur; ular atliⱪ ǝskǝrlǝrnimu yǝrgǝ ⱪaritip ⱪoyidu. 6 Mǝn Yǝⱨuda jǝmǝtini küqǝytimǝn, Yüsüpning jǝmǝtini ⱪutⱪuzimǝn; Mǝn ularni ⱪaytidin olturaⱪlixixⱪa ⱪayturimǝn; qünki Mǝn ularƣa rǝⱨim-xǝpⱪǝtni kɵrsitimǝn. Ular Mǝn ⱨeqⱪaqan taxliwǝtmigǝndǝk bolidu; qünki Mǝn ularning Hudasi Pǝrwǝrdigarmǝn; Mǝn ularƣa jawab berimǝn. 7 Əfraimdikilǝr palwandǝk bolidu, kɵngülliri xarab kǝypini sürgǝnlǝrdǝk huxallinidu; ularning baliliri buni kɵrüp huxallinidu; ularning kɵngli Pǝrwǝrdigardin xadlinidu.

8 Mǝn üxⱪirtip, ularni yiƣimǝn; qünki Mǝn ularni bǝdǝl tɵlǝp ⱨɵrlükkǝ qiⱪirimǝn; ular ilgiri kɵpiyip kǝtkǝndǝk kɵpiyidu. 9 Mǝn ularni ǝllǝr arisida uruⱪtǝk qaqimǝn; andin ular Meni yiraⱪ jaylarda ǝslǝydu; xuning bilǝn ular baliliri bilǝn ⱨayat ⱪelip, ⱪaytip kelidu. □«Mǝn ularni ǝllǝr arisida uruⱪtǝk qaqimǝn; ...» — yaki «Mǝn ularni ǝllǝr arisida uruⱪtǝk qaqidiƣan bolsam,...». 10 Mǝn ularni ⱪaytidin Misir zeminidin elip kelimǝn, Asuriyǝdinmu qiⱪirip yiƣimǝn; ularni Gilead wǝ Liwan zeminiƣa elip kirgüzimǝn; yǝr-zemin ularni patⱪuzalmay ⱪalidu.

11 Xundaⱪ ⱪilip, U jǝbir-japa dengizidin ɵtüp, dengizdiki dolⱪunlarni uridu; Nil dǝryasining tǝgliri ⱪurup ketidu; Asuriyǝning mǝƣrurluⱪi wǝ pǝhri pǝs ⱪilinidu, Misirdiki xaⱨanǝ ⱨasimu yoⱪilidu. □«U jǝbir-japa dengizidin ɵtüp, dengizdiki dolⱪunlarni uridu» — «U» — Hudani kɵrsitidu, ǝlwǝttǝ.

12 Mǝn ularni Pǝrwǝrdigar arⱪiliⱪ küqǝytimǝn; ular Uning namida mangidu, dǝydu Pǝrwǝrdigar.