Zǝbur 91

91-küy •••• Hudaning ⱨǝrhil yamanliⱪtin, jin-xǝytanlardin ⱪoƣdixi

1 Əng Aliy Bolƣuqining mǝhpiy jayida turƣuqi,

Ⱨǝmmigǝ ⱪadirning sayisidǝ aramhuda yaxaydu.

2 Mǝn Pǝrwǝrdigarni: —

«Mening baxpanaⱨim, Mening ⱪorƣinim;

Mening Hudayim, Uningƣa tayinimǝn» — dǝymǝn.

3 Bǝrⱨǝⱪ, U ⱪiltaⱪqining toziⱪidin seni ⱪutulduridu,

Xum bala-ⱪazadin ⱨǝm halas etidu. [a]

4 U pǝyliri bilǝn seni yapidu;

Ⱪanatliri astida panaⱨ tapisǝn;

Uning ⱨǝⱪiⱪiti sanga ⱪalⱪan ⱨǝm istiⱨkamdur. [b]

5 Sǝn nǝ keqidiki wǝⱨimidin,

Nǝ kündüzi uquwatⱪan oⱪtin, [c]

6 Nǝ ⱪarangƣuluⱪta kǝzgüqi wabadin,

Nǝ qüx waⱪtida wǝyranqiliⱪ ⱪilƣuqi ⱨalakǝttin ⱪorⱪmaysǝn.

7 Sening yeningda mingi yiⱪilip,

Ong yeⱪingda on mingi ƣulap qüxsimu,

Lekin bala-ⱪaza sanga yeⱪinlaxmaydu.

8 Sǝn pǝⱪǝt kɵzliring bilǝn beⱪip,

Pasiⱪlarƣa berilgǝn jazani kɵrisǝn.

9 Pǝrwǝrdigarni panaⱨim dǝp bilgining üqün,

Ⱨǝmmidin Aliy Bolƣuqini makan ⱪilƣining üqün, ◼

10 Bexingƣa ⱨeq palakǝt qüxmǝydu,

Wabamu qediringƣa yeⱪinlaxmaydu.

11 U Ɵz pǝrixtilirigǝ sening ⱨǝⱪⱪingdǝ ǝmr ⱪilidu,

Xuning bilǝn ular pütkül yolliringda seni saⱪlaydu. [e]

12 Ayiƣing taxⱪa urulup kǝtmǝsliki üqün,

Ular seni ⱪollirida kɵtürüp yüridu. [f]

13 Xir wǝ kobra yilan üstidin besip ɵtisǝn,

Arslan wǝ ǝjdiⱨani dǝssǝp-qǝylǝysǝn. [g]

14 «U Manga muⱨǝbbitini baƣliƣanliⱪi üqün,

Mǝn uni ⱪutuldurimǝn;

U namimni tǝn alƣini üqün yuⱪirida saⱪlaymǝn.

15 U Manga nida ⱪilidu, Mǝn uningƣa jawab berimǝn;

Eƣir kün uni basⱪanda uning bilǝn billǝ bolimǝn;

Mǝn uni halas ⱪilip, izzǝt-ⱨɵrmǝtkǝ erixtürimǝn.

16 Uzaⱪ ɵmür bilǝn uni ⱪanatlǝndurimǝn,

Ⱨǝm nijatliⱪimni uningƣa kɵrsitimǝn».