1 Nǝƣmiqilǝrning bexiƣa tapxurulup oⱪulsun dǝp, Koraⱨning oƣulliri üqün yezilƣan küy: —

I barliⱪ hǝlⱪlǝr, kɵngül ⱪoyup anglanglar!

Yǝr yüzidǝ turuwatⱪanlar, ⱪulaⱪ selinglar!

2 Mǝyli addiy puⱪra, ya esilzadilǝr,

Ya bay, ya gadaylar bolsun, ⱨǝmminglar anglanglar!

3 Aƣzim danaliⱪni sɵzlǝydu,

Dilim ǝⱪilgǝ uyƣun ixlarni oylap qiⱪidu.□«Aƣzim danaliⱪni sɵzlǝydu» — ibraniy tilida «Aƣzim danaliⱪlarni sɵzlǝydu».

4 Ⱪuliⱪim ⱨekmǝtlik tǝmsilni zǝn ⱪoyup anglaydu,

Qiltar qelip sirliⱪ sɵzni eqip berimǝn.[b]

5 Eƣir künlǝrdǝ, meni ⱪiltaⱪⱪa qüxürmǝkqi bolƣanlarning ⱪǝbiⱨlikliri ǝtrapimda bolsimu,

Mǝn nemixⱪa ⱪorⱪidikǝnmǝn?

6 Ular bayliⱪliriƣa tayinidu,

Mal-mülüklirining zorluⱪi bilǝn qongqiliⱪ ⱪilidu;

7-9 Insan mǝnggügǝ yaxap,

Gɵr-ⱨangni kɵrmǝsliki üqün,

Ⱨeqkim ɵz buradǝrining ⱨayatini pul bilǝn ⱪayturuwalalmaydu;

Wǝ yaki Hudaƣa uning jenini ⱪutuldurƣudǝk baⱨani berǝlmǝydu;

(Qünki uning jenining baⱨasi intayin ⱪimmǝt,

Wǝ bu baⱨa boyiqǝ bolƣanda, mǝnggügǝ ⱪǝrz tapxuruxi kerǝktur)□«Wǝ bu baⱨa boyiqǝ bolƣanda, mǝnggügǝ ⱪǝrz tapxuruxi kerǝktur» — yǝnǝ birhil tǝrjimisi: «Wǝ muxu baⱨa bolsa, uni ǝbǝdiy tɵliyǝlmǝydu».

10 Ⱨǝmmigǝ ayanki, danixmǝn adǝmlǝrmu ɵlidu;

Ⱨǝmmǝ adǝm bilǝn tǝng, nadan wǝ ⱨamaⱪǝtlǝr billǝ ⱨalak bolidu,

Xundaⱪla ular mal-dunyasini ɵzgilǝrgǝ ⱪaldurup ketidu.

11 Ularning kɵnglidiki oy-pikirlǝr xundaⱪki:

«Ɵy-imaritimiz mǝnggügǝ,

Makan-turalƣulirimiz dǝwrdin-dǝwrgiqǝ bolidu»;

Ular ɵz yǝrlirigǝ isimlirini nam ⱪilip ⱪoyidu.□«Ularning kɵnglidiki oy-pikirlǝr xundaⱪki: «Ɵy-imaritimiz mǝnggügǝ...»; Ular ɵz yǝrlirigǝ isimlirini nam ⱪilip ⱪoyidu» — toluⱪ ayǝtning yǝnǝ birhil tǝrjimisi «Ular yǝrlirigǝ ɵz isimlirini nam ⱪilip ⱪoyƣini bilǝn, ularning xu yǝrliri dǝwrdin-dǝwrgiqǝ ularning yatidiƣan jayi, yǝni ularning ⱪǝbriliri bolidu, halas».

12 Biraⱪ insan ɵzining nam-izzitidǝ turiwǝrmǝydu,

U ⱨalak bolƣan ⱨaywanlardǝk ketidu.

13 Ularning muxu yoli dǝl ularning nadanliⱪidur;

Lekin ularning kǝynidin dunyaƣa kǝlgǝnlǝr, yǝnila ularning eytⱪan sɵzlirigǝ apirin oⱪuydu.

Selaⱨ.

14 Ular ⱪoylardǝk tǝⱨtisaraƣa yatⱪuzulidu;

Ɵlüm ularni ɵz ozuⱪi ⱪilidu;

Ətisi sǝⱨǝrdǝ duruslar ularning üstidin ⱨɵküm yürgüzidu;

Ularning güzǝlliki qiritilixⱪa tapxurulidu;

Tǝⱨtisara bolsa ularning ⱨǝywǝtlik makanidur!□«Ətisi sǝⱨǝrdǝ duruslar ularning üstidin ⱨɵküm yürgüzidu» — «ǝtisi sǝⱨǝr» bu yǝrdǝ, xübⱨisizki, ⱪiyamǝt küni, yǝni ɵlümdin tirilix künini kɵrsitidu. «Ular ⱪoylardǝk tǝⱨtisaraƣa yatⱪuzulidu... Tǝⱨtisara bolsa ularning ⱨǝywǝtlik makanidur!» — toluⱪ ayǝtning baxⱪa birnǝqqǝ hil tǝrjimilǝr uqrixi mumkin.

15 Biraⱪ Huda jenimni tǝⱨtisaraning ilkidin ⱪutⱪuzidu;

Qünki U meni ⱪobul ⱪilidu.

Selaⱨ.

16 Birsi beyip ketip,

ailǝ-jǝmǝtining abruyi ɵsüp kǝtsimu,

Ⱪorⱪma;

17 Qünki u ɵlgǝndǝ ⱨeqnǝrsisini elip ketǝlmǝydu;

Uning xɵⱨriti uning bilǝn billǝ gɵrgǝ qüxmǝydu.

18 Gǝrqǝ u ɵmür boyi ɵzini bǝhtlik qaƣliƣan bolsimu,

(Bǝrⱨǝⱪ, kixilǝr ronaⱪ tapⱪiningda, ǝlwǝttǝ seni ⱨaman mahtaydu)

19 Ahiri berip, u yǝnila ata-bowilirining yeniƣa ketidu;

Ular mǝnggügǝ yoruⱪluⱪni kɵrǝlmǝydu.

20 Insan izzǝt-abruyda bolup, lekin yorutulmisa,

Ⱨalak bolidiƣan ⱨaywanlarƣa ohxax bolidu, halas.