Link to home pageLanguagesLink to all Bible versions on this site
35
35-küy •••• Ziyankǝxlik ⱨǝm aⱨanǝttǝ ⱪalƣanda ⱪilƣan dua
1 Dawut yazƣan küy: —
 
I Pǝrwǝrdigar, mǝn bilǝn elixⱪanlar bilǝn elixⱪaysǝn;
Manga jǝng ⱪilƣanlarƣa jǝng ⱪilƣaysǝn!
2 Ⱪolungƣa sipar wǝ ⱪalⱪan alƣin;
Manga yardǝmgǝ ornungdin turƣaysǝn;
3 Nǝyzini suƣurup, meni ⱪoƣlawatⱪanlarning yolini tosⱪaysǝn;
Mening jenimƣa: «Mǝn sening nijatliⱪingdurmǝn!» — degǝysǝn!
4 Mening ⱨayatimƣa qang salmaⱪqi bolƣanlar yǝrgǝ ⱪaritilip xǝrmǝndǝ bolƣay;
Manga ⱪǝst ǝyligǝnlǝr kǝynigǝ yandurulup rǝswa bolƣay.■Zǝb. 40:14; 70:2-3
5 Ular goya xamalda uqⱪan samandǝk tozup kǝtkǝy;
Pǝrwǝrdigarning Pǝrixtisi ularni tarⱪitiwǝtkǝy! ■Ayup 21:18; Zǝb. 1:4; Yǝx. 29:5; Ⱨox. 13:3
6 Ularning yoli ⱪarangƣu wǝ teyilƣaⱪ bolƣay,
Pǝrwǝrdigarning Pǝrixtisi ularni ⱪoƣliwǝtkǝy!
7 Qünki ular manga orunsiz ora-tuzaⱪ tǝyyarlidi;
Jenimni sǝwǝbsiz elixⱪa ular uni kolidi.
8 Ⱨalakǝt tuydurmastin ularning bexiƣa qüxkǝy,
Ɵzi yoxurun ⱪurƣan torƣa ɵzi qüxkǝy,
Ⱨalakǝtkǝ yiⱪilƣay.
9 U qaƣda jenim Pǝrwǝrdigardin sɵyünidu,
Uning nijatliⱪ-ⱪutⱪuzuxidin xadlinidu!
10 Mening ⱨǝmmǝ ustihanlirim: — «I Pǝrwǝrdigar, kimmu Sanga tǝngdax kelǝlisun?» — dǝydu,
— «Sǝn ezilgǝn mɵminlǝrni küqlüklǝrning qanggilidin,
Ezilgǝnlǝr ⱨǝm yoⱪsullarni ularni buliƣuqilardin tartiwelip ⱪutⱪuzisǝn».
11 Yawuz, yalƣan guwaⱨqilar ⱪopup,
Hǝwirim bolmiƣan gunaⱨlar bilǝn üstümdin xikayǝt ⱪilmaⱪta.
12 Ular mening yahxiliⱪimƣa yamanliⱪ ⱪilip,
Meni panaⱨsiz yetim ⱪilip ⱪoyƣanidi!
13 Lekin mǝn bolsam, ular kesǝl bolƣanda,
Bɵzni yɵgǝp kiyiwaldim;
Ularni dǝp roza tutup, ɵzümni tɵwǝn ⱪildim;
Əmdi duayim bolsa ⱨazir baƣrimƣa yenip kǝldi!□« ... ular kesǝl bolƣanda, bɵzni yɵgǝp kiyiwaldim» — «bɵz kiyim»ni kiyiwelix (ⱨaza tutⱪandǝk) ɵzi yaki baxⱪilar üqün ⱪattiⱪ dua ⱪilixning birhil ipadisi idi. «... duayim bolsa ⱨazir baƣrimƣa yenip kǝldi!» — bu ibarining mǝnisi bǝlkim: — (1) Huda jawab bǝrmigǝn bolsimu (kesǝl adǝm saⱪaymidi), biraⱪ dua ⱪilƣuqini bǝrikǝtlidi; yaki (2) dǝrwǝⱪǝ kesǝl adǝm saⱪaydi, biraⱪ ⱪerixⱪandǝk dua ⱪilƣuqiƣa ziyankǝxlik ⱪildi. Bizningqǝ 2-imkaniyǝt toƣridur.
14 Mǝn bu ixlardin dost yaki ⱪerindiximning bexiƣa qüxkǝn ixⱪa ohxax mǝyüslinip yürdum,
Mǝn ɵz anisiƣa ⱨaza tutⱪandǝk, beximni selip yürdüm.
15 Biraⱪ mǝn putlixip kǝtkinimdǝ,
Ular huxal boluxup kǝtkǝnidi,
Bir yǝrgǝ jǝm boldi;
Dǝrwǝⱪǝ jǝm boluxup muxu zorawanlar manga ⱪarxi qiⱪixti,
Biraⱪ hǝwirim yoⱪ idi.
Ular meni parǝ-parǝ ⱪilix üqün tohtimay zǝrbǝ berixti.
16 Huddi bir qixlǝm poxkal üstidǝ qaⱪqaⱪ wǝ talax ⱪilƣan hudasizlardǝk,
Ular manga qixlirini ƣuqurlitip hiris ⱪilixti.□«Huddi bir qixlǝm poxkal üstidǝ qaⱪqaⱪ wǝ talax ⱪilƣan hudasizlardǝk,...» — baxⱪa birhil tǝrjimisi: — «Huddi bir qixlǝm poxkal üstidǝ qaⱪqaⱪ wǝ huddi ǝzwǝylǝp mazaⱪ ⱪilƣuqi ǝhlaⱪsizlardǝk,...».
17 I Rǝb, ⱪaqanƣiqǝ pǝrwa ⱪilmaysǝn?
Jenimni ularning ⱨalakitidin ⱪutⱪuzƣaysǝn,
Mening birdinbir ⱨayatimni muxu yirtⱪuq xirlarning aƣzidin tartiwalƣaysǝn!
18 Zor jamaǝt arisida mǝn Sanga tǝxǝkkür eytimǝn;
Nurƣunliƣan hǝlⱪ arisida Seni mǝdⱨiyilǝymǝn.■Zǝb. 40:9,10; 111:1
19 Yalƣan sǝwǝb bilǝn manga rǝⱪib bolƣanlarni üstümdin xadlandurmiƣaysǝn;
Mǝndin sǝwǝbsiz nǝprǝtlǝngǝnlǝrni ɵzara kɵz ⱪisixturmiƣaysǝn!■Yⱨ. 15:25
20 Ular dostanǝ sɵz ⱪilmaydu,
Zemindiki tinqliⱪpǝrwǝrlǝrgǝ pitnǝ-iƣwa toⱪumaⱪta.
21 Ular manga ⱪarap eƣizini yoƣan eqip:
«Way-way! Kütkünimizni ɵz kɵzimiz bilǝn kɵrüwalduⱪ!» — deyixidu.
22 I Pǝrwǝrdigar, Sǝn bularni kɵrüp qiⱪting, süküt ⱪilmiƣaysǝn;
I Rǝb, mǝndin Ɵzüngni yiraⱪlaxturmiƣaysǝn;
23 Ⱪozƣalƣaysǝn,
Mǝn üqün ⱨɵküm qiⱪirixⱪa oyƣanƣaysǝn,
I mening Hudayim — Rǝbbim!
24 Mening ixim üstidǝ ɵz ⱨǝⱪⱪaniyliⱪing boyiqǝ ⱨɵküm qiⱪarƣaysǝn, i Pǝrwǝrdigar Hudayim;
Ularni mening onguxsizliⱪimdin xadlandurmiƣaysǝn!
25 Ular kɵnglidǝ: «Waⱨ! Waⱨ! Əjǝb obdan boldi!» — deyixmisun;
Yaki: «Uni yutuwǝttuⱪ!» — deyixmisun.
26 Mening ziyinimdin huxal bolƣanlar yǝrgǝ ⱪaritilip xǝrmǝndǝ bolƣay;
Meningdin ɵzlirini üstün tutⱪuqilarning kiyim-keqiki hijalǝt wǝ nomussuzluⱪ bolsun!
27 Mening ⱨǝⱪⱪaniyliⱪimdin sɵyüngǝnlǝr tǝntǝnǝ ⱪilip xadlansun!
Ular ⱨǝmixǝ: «Ɵz ⱪulining aman-esǝnlikigǝ sɵyüngǝn Pǝrwǝrdigar uluƣlansun!» — degǝy.□«Mening ⱨǝⱪⱪaniyliⱪimdin sɵyüngǝnlǝr tǝntǝnǝ ⱪilip xadlansun! Ular ⱨǝmixǝ: «Ɵz ⱪulining aman-esǝnlikigǝ sɵyüngǝn Pǝrwǝrdigar uluƣlansun!» — degǝy» — Dawut pǝyƣǝmbǝr muxu ayǝttǝ bǝlkim ɵzidin keyin kelidiƣan, ɵz ǝjdadi bolƣan Ⱪutⱪuzƣuqi-Mǝsiⱨ toƣruluⱪ bexarǝt beridu.
28 Xu qaƣda mening tilim kün boyi ⱨǝⱪⱪaniyliⱪing toƣruluⱪ sɵzlǝydu, mǝdⱨiyilǝrni yangritidu.