1 Ⱨǝmdusana!

Pǝrwǝrdigarƣa tǝxǝkkür eytinglar!

Qünki U meⱨribandur, ǝbǝdiydur Uning meⱨir-muⱨǝbbiti.□«Pǝrwǝrdigar... meⱨribandur, ǝbǝdiydur Uning meⱨir-muⱨǝbbiti...» — bu küydǝ Tǝwrattiki «Mis.» 1-24-bablar, «Qɵl.» 11-17, 20-bablar, «Yǝxua», «Batur ⱨakimlar» ⱨǝm «Padixaⱨlar» degǝn ⱪisimlardiki tarih kɵzdǝ tutulidu.  [b]

2 Pǝrwǝrdigarning ⱪudrǝtlik ⱪilƣanlirini kim sɵzlǝp berǝlǝydu?

Uning bar xan-xɵⱨritini kim jakarlap berǝlǝydu?

3 Bǝhtliktur adalǝtni tutⱪan,

Daim ⱨǝⱪⱪaniyliⱪni yürgüzgǝn kixi!

4 Hǝlⱪinggǝ bolƣan ⱨimmiting bilǝn meni ǝsligǝysǝn, i Pǝrwǝrdigar;

Nijatliⱪing bilǝn yenimƣa kelip hǝwǝr alƣin!□«Nijatliⱪing bilǝn yenimƣa kelip hǝwǝr alƣin!» — ibraniy tilida: «Nijatliⱪing bilǝn meni yoⱪliƣaysǝn» degǝn sɵzlǝr bilǝn ipadilinidu.

5 Xuning bilǝn, Sǝn talliƣanliringning bǝrikitini kɵrǝy,

Ɵz elingning xadliⱪi bilǝn xad bolay,

Ɵz mirasing bolƣan hǝlⱪing bilǝn pǝhirlinip, yayrap yürǝy!

6 Biz ata-bowilirimiz ⱪatarida gunaⱨ ɵtküzduⱪ,

Ⱪǝbiⱨlik ⱪilduⱪ, yamanliⱪ ǝyliduⱪ.[d]

7 Misirda turƣan ata-bowilirimiz mɵjiziliringni nǝzirigǝ almay,

Kɵp meⱨribanliⱪliringni esigǝ almidi;

Bǝlki dengizda, Ⱪizil Dengiz boyida isyan kɵtürdi.[e]

8 Biraⱪ U ⱪudritimni namayan ⱪilay dǝp,

Ɵz nami üqün ularni ⱪutⱪuzdi.[f]

9 Uning Ⱪizil Dengizƣa tǝnbiⱨ berixi bilǝn,

U ⱪupⱪuruⱪ boldi;

Huddi ⱪaƣjiraⱪ qɵllüktin yetǝklǝp mangƣandǝk,

U ularni dengiz tǝgliridin ⱪuruⱪ ɵtküzdi.[g]

10 Ularni ɵq kɵrgǝnlǝrning ⱪolidin ⱨɵrlükkǝ qiⱪardi,

Ularƣa ⱨǝmjǝmǝt bolup düxmǝn qanggilidin ⱪutⱪuzdi.

11 Yawlarni sular basti,

Ularning ⱨeqbirsi saⱪ ⱪalmidi.[h]

12 Xundila ular Uning sɵzlirigǝ ixǝnq ⱪildi;

Ular Uni küylidi.[i]

13 Ular Uning ⱪilƣanlirini xunqǝ tez untudi,

Nǝsiⱨǝtini kütmidi;

14 Bǝlki dalada aq kɵzlükkǝ baladǝk berildi,

Qɵl-bayawanda Tǝngrini sinidi.[j]

15 Xunga U soriƣinini ularƣa bǝrdi,

Biraⱪ jüdǝtküqi bir kesǝlni janliriƣa tǝgküzdi.[k]

16 Ular bargaⱨda Musaƣa ⱨǝsǝt ⱪildi,

Hudaning muⱪǝddǝs bǝndisi Ⱨarunnimu kɵrǝlmidi.[l]

17 Yǝr eqilip Datanni yutuwǝtti,

Abiramni adǝmliri bilǝn ⱪapsiwaldi.[m]

18 Əgǝxküqiliri arisida ot yeⱪildi;

Yalⱪun rǝzillǝrni kɵydüriwǝtti.[n]

19 Ular Ⱨorǝb teƣida mozay butni yasidi,

Ⱪuyma ⱨǝykǝlgǝ sǝjdǝ ⱪilip,[o]

20 Ɵzlirining pǝhir-xɵⱨriti bolƣuqining orniƣa,

Ot-qɵp yǝydiƣan ɵküzning süritini almaxturdi.

21 Misirda uluƣ ixlarni kɵrsǝtkǝn Nijatkari Tǝngrini ular untudi.

22 Dǝrwǝⱪǝ, Ⱨam diyarida mɵjizilǝr yaratⱪan,

Ⱪizil Dengiz boyida ⱪorⱪunqluⱪ ixlarni kɵrsǝtkǝn Hudani untudi.

23 U ularni ⱨalak ⱪilimǝn degǝnidi —

Ɵz talliƣini Musa ⱪǝⱨrini yandurux üqün Uning aldida ariqi bolup tik turmiƣan bolsa,

— Dǝrwǝⱪǝ xundaⱪ ⱪilƣan bolar idi.[p]

24 Ular yǝnǝ güzǝl zeminni kǝmsitip rǝt ⱪildi,

Uning wǝdisigǝ ixǝnmidi;[q]

25 Bǝlki qedirlirida ⱪaⱪxap yürüp,

Pǝrwǝrdigarning awaziƣa ⱪulaⱪ salmidi.

26 Xunga U ularƣa ⱪǝsǝm ⱪilip ⱪol kɵtürüp: —

Silǝrni qɵldǝ yiⱪitip tügǝxtürimǝn —[r]

27 Əwladliringlarnimu ǝllǝr arisida yiⱪitip tügǝxtürüp,

Yaⱪa yurtlar ara tarⱪitiwetimǝn» — dedi.[s]

28 Ular Baal-Peor butⱪa ɵzini etip qoⱪunup,

Ɵlüklǝrgǝ atiƣan ⱪurbanliⱪlarni yedi.□«Ular Baal-Peor butⱪa ɵzini etip qoⱪunup, ɵlüklǝrgǝ atiƣan ⱪurbanliⱪlarni yedi» — «ɵlüklǝrgǝ ⱪurbanliⱪ ⱪilix», «yaƣ puritix» ⱪatarliⱪ ⱨǝrⱪandaⱪ paaliyǝtlǝr Tǝwratta ⱪǝt’iy mǝn’i ⱪilinƣan.  [u]

29 Ular ⱪilmixliri bilǝn Uning aqqiⱪini kǝltürdi,

Ular arisida waba ⱪozƣaldi;

30 Finiⱨas turdi-dǝ, ⱨɵküm yürgüzdi,

Xuning bilǝn waba tosuldi;

31 Bu ix Finiⱨasⱪa ⱨǝⱪⱪaniyǝt dǝp ⱨesablandi,

Uning nǝsligimu ǝwladidin ǝwladiƣiqǝ, ǝbǝdiy xundaⱪ ⱨesablandi.

32 Ular yǝnǝ Pǝrwǝrdigarni meribaⱨ suliri boyida ƣǝzǝpkǝ kǝltürdi,

Ularning sǝwǝbidin Musaƣimu zǝrǝr yǝtti;[v]

33 Qünki ular uning roⱨini teriktürdi,

Uning lǝwliri bihǝstiliktǝ gǝp ⱪilip saldi.□«Qünki ular uning roⱨini teriktürdi» — bǝzi tǝrjimilǝrdǝ «uning roⱨi» Musaning roⱨi ǝmǝs, bǝlki Hudaning Roⱨi dǝp qüxǝndürülidu. «... Ular uning roⱨini teriktürdi, uning lǝwliri bihǝstiliktǝ gǝp ⱪilip saldi» — «Qɵl.» 20:7-13ni kɵrüng.

34 Ular Pǝrwǝrdigarning ǝmrigǝ hilapliⱪ ⱪilip,

Xu yǝrdiki ⱪowmlarni yoⱪatmidi;

35 Bǝlki yat ǝllǝr bilǝn arilixip,

Ularning ⱪiliⱪlirini ɵgǝndi;[x]

36 Ularning butliriƣa qoⱪundi,

Bular ɵzlirigǝ bir tuzaⱪ bolup qiⱪti;

37 Qünki ular ɵz oƣul-ⱪizlirini soyup, jinlarƣa ⱪurbanliⱪⱪa beƣixlidi.[y]

38 Xundaⱪ ⱪilip ular bigunaⱨ ⱪanni,

Yǝni Ⱪanaandiki butlarƣa atap ⱪurbanliⱪ ⱪilip, ɵz oƣul-ⱪizlirining ⱪenini tɵkti;

Zemini ⱪanƣa bulƣinip kǝtti.[z]

39 Ular ɵz ⱪilmixliri bilǝn bulƣandi;

Ⱪiliⱪliri bilǝn paⱨixǝ ayaldǝk buzuldi.

40 Xunga Pǝrwǝrdigar Ɵz hǝlⱪidin ⱪattiⱪ ƣǝzǝplǝndi,

U Ɵz mirasidin yirgǝndi;

41 Ularni yat ǝllǝrning ⱪoliƣa bǝrdi,

Ularƣa ɵqmǝnlǝr ular üstidin ⱨɵkümranliⱪ ⱪildi.

42 Düxmǝnliri ularni ǝzdi,

Ular yaw ⱪoli astida egilip püküldi.

43 Kɵp ⱪetim Pǝrwǝrdigar ularni ⱪutⱪuzdi;

Biraⱪ ular bolsa, ɵz haⱨixliri bilǝn Uningƣa asiyliⱪ ⱪildi,

Ular ɵz ⱪǝbiⱨliki bilǝn pǝs ⱨalƣa qüxti.

44 Xundaⱪtimu U ularning nalǝ-pǝryadini angliƣanda,

Ularning jǝbir-japaliriƣa etibar bǝrdi;

45 Ⱨǝm ular bilǝn tüzgǝn ǝⱨdisini ǝslidi,

Zor meⱨir-xǝpⱪiti bilǝn, ƣǝzipidin yandi,□«Zor meⱨir-xǝpⱪiti bilǝn,...» — ibraniy tilida: «Zor meⱨir-xǝpⱪǝtliri bilǝn...».

46 U ularni sürgün ⱪilƣanlarning ⱪǝlbidǝ rǝⱨim oyƣatti.

47 Bizni ⱪutⱪuzƣaysǝn, i Pǝrwǝrdigar Hudayimiz!

Muⱪǝddǝs namingƣa tǝxǝkkür eytixⱪa,

Tǝntǝnǝ ⱪilip Seni mǝdⱨiyilǝxkǝ,

Bizni ǝllǝr arisidin yeningƣa yiƣiwalƣaysǝn![bb]

48 Israilning Hudasi bolƣan Pǝrwǝrdigarƣa,

Əzǝldin ta ǝbǝdgiqǝ tǝxǝkkür-mǝdⱨiyǝ ⱪayturulsun!

Pütkül hǝlⱪ «Amin» desun!

Ⱨǝmdusana! [cc]