1 I oƣlum, tǝlimimni untuma,

Degǝnlirimni ⱨǝmixǝ kɵnglüngdǝ qing tut.□«qing tut» — degǝn sɵz ibraniy tilida: «ⱪoƣda, mudapiǝ ⱪil» degǝn mǝninimu bildüridu.

2 Qünki u sanga bǝrikǝtlik künlǝr, uzun ɵmür wǝ hatirjǝmlik ⱪoxup beridu.□«bǝrikǝtlik künlǝr» — ibraniy tilida «künlǝrning uzunluⱪi».  [c]

3 Meⱨriban wǝ ⱨǝⱪ-sǝmimiy boluxtin waz kǝqmǝ,

Bularni boynungƣa esiwal,

Ⱪǝlbinggǝ pütiwal.□«ⱪǝlbinggǝ pütiwal» — ibraniy tilida «ⱪǝlbingdiki tahtayƣa pütüwal» (Musa pǝyƣǝmbǝrgǝ tapxurulƣan muⱪǝddǝs ⱪanun ikki tax tahtayƣa pütülgǝnidi).  [e]

4 Xundaⱪ ⱪilƣanda Huda wǝ bǝndilǝrning nǝziridǝ iltipatⱪa layiⱪ bolisǝn, danixmǝn ⱨesablinisǝn.□«iltipatⱪa layiⱪ bolisǝn» — muxu yǝrdǝ ibraniy tilida «iltipat» degǝn sɵz ikki bisliⱪ bolup, ikkinqi mǝnisi «güzǝllik»tur.

5 Ɵz ǝⱪlinggǝ tayanmay, Pǝrwǝrdigarƣa qin ⱪǝlbing bilǝn tayanƣin;

6 Ⱪandaⱪla ix ⱪilsang, Pǝrwǝrdigarni tonuxⱪa intil;

U sanga toƣra yollarni kɵrsitidu.□«Ⱪandaⱪla ix ⱪilsang,...» — ibraniy tilida «Barliⱪ yolliringda...».  [h]

7 Ɵzüngni ǝⱪilliⱪ sanima;

Pǝrwǝrdigardin ǝyminip, yamanliⱪtin yiraⱪ bol.[i]

8 Xundaⱪ ⱪilƣiningda, bu ixlar dǝrdinggǝ dǝrman,

Ustihanliringƣa yilik bolidu.□«dǝrdinggǝ dǝrman... bolidu» — ibraniy tilida «kindikinggǝ salamǝtlik... bolidu».

9 Pǝrwǝrdigarning ⱨɵrmitini ⱪilip mal-dunyayingdin ⱨǝdiyǝlǝrni sunƣin,

Etizingdin tunji qiⱪⱪan mǝⱨsulatliringdin Uningƣa atiƣin;[k]

10 Xundaⱪ ⱪilƣiningda, ambarliring axliⱪⱪa tolup taxidu,

Xarab kɵlqǝkliringdǝ yengi xarab exip-texip turidu.[l]

11 I oƣlum, Pǝrwǝrdigarning tǝrbiyisigǝ bipǝrwaliⱪ ⱪilma,

Uning tǝnbiⱨidin bǝzmǝ.[m]

12 Qünki, ata ǝziz kɵrgǝn oƣliƣa tǝnbiⱨ-tǝrbiyǝ bǝrgǝndǝk,

Pǝrwǝrdigar kimni sɵygǝn bolsa uningƣa tǝnbiⱨ-tǝrbiyǝ beridu.[n]

13 Danaliⱪⱪa muyǝssǝr bolƣan kixi,

Yoruⱪluⱪⱪa igǝ bolƣan kixi nemidegǝn bǝhtlik-ⱨǝ!

14 Qünki danaliⱪning paydisi kümüxning paydisidin kɵptur,

Ⱪimmiti sap altunningkidinmu ziyadidur.[o]

15 U lǝǝl-yaⱪutlardin ⱪimmǝtliktur,

Intizar bolƣan ⱨǝrⱪandaⱪ nǝrsǝngdin ⱨeqbirimu uningƣa tǝng kǝlmǝstur.[p]

16 Danaliⱪning ong ⱪolida uzun ɵmür,

Sol ⱪolida bayliⱪ wǝ xɵⱨrǝt bardur.

17 Uning yolliri sanga hux puraⱪ tuyulur,

Uning barliⱪ tǝriⱪiliri seni aram tapⱪuzur.

18 U ɵzini tapⱪan adǝmgǝ «ⱨayatliⱪ dǝrihi»dur,

Uni qing tutⱪan kixi nemidegǝn bǝhtlik!□«ⱨayatliⱪ dǝrihi» — xübⱨisizki, «Erǝn baƣqisi»diki Adǝm’atimiz wǝ Ⱨawa’animizning bǝⱨrimǝn boluxiƣa tǝyyarlanƣan «ⱨayatliⱪ dǝrihi»ni kɵrsitidu (Tǝwrat, «Yar.» 2:9).

19 Pǝrwǝrdigar danaliⱪ bilǝn yǝr-zeminni bǝrpa ⱪildi,

Ⱨekmǝt bilǝn asmanni ornatti.

20 Uning bilimi bilǝn yǝrning qongⱪur ⱪatlamliri yerildi,

Ⱨǝmdǝ bulutlardin xǝbnǝm qüxti.□«yǝrning qongⱪur ⱪatlamliri yerildi» — bǝlkim Nuⱨ pǝyƣǝmbǝrning waⱪtidiki «qong topan» bilǝn munasiwǝtlik bǝzi ixlarni kɵrsitixi mumkin («Yar.» 7:11)  [s]

21 I oƣlum! Danaliⱪ bilǝn bilimni kɵzüngdin qiⱪarma,

Pixⱪan ⱨekmǝt wǝ pǝm-parasǝtni qing tut.

22 Xuning bilǝn ular jeningƣa jan ⱪoxidu,

Boynungƣa esilƣan esil marjandǝk sanga güzǝllik ⱪoxidu.

23 Xu qaƣda yolungda aman-esǝn mangalaysǝn,

Yolda putlaxmaysǝn.[t]

24 Yatⱪanda ⱨeq nemidin ⱪorⱪmaysǝn,

Yetixing bilǝnla tatliⱪ uhlaysǝn.[u]

25 Bexingƣa dǝⱨxǝtlik wǝⱨimǝ qüxkǝndǝ ⱪorⱪmiƣin,

Rǝzillǝrning wǝyranqiliⱪidin ƣǝm ⱪilmiƣin!□«Rǝzillǝrning wǝyranqiliⱪidin ƣǝm ⱪilmiƣin!» — yaki «Rǝzillǝrning bexiƣa qüxkǝn wǝyranqiliⱪtin ƣǝm ⱪilmiƣin!».  [w]

26 Qünki Pǝrwǝrdigar sening tayanqingdur,

U putungni ⱪapⱪanlardin neri ⱪilidu.

27 Pǝⱪǝt ⱪolungdin kǝlsila, ⱨajǝtmǝnlǝrdin yahxiliⱪni ayimiƣin.

28 Ⱪolum-ⱪoxniliring seningdin ɵtnǝ sorap kirsǝ, «Ⱪaytip ketip, ǝtǝ kǝlgin, ǝtǝ berǝy» — demigin.

29 Ⱪoxnangƣa ziyankǝxlik niyitidǝ bolma,

Qünki u sanga ixinip yeningda hatirjǝm yaxaydu.

30 Birsi sanga ziyan yǝtküzmigǝn bolsa,

Uning bilǝn sǝwǝbsiz majiralaxma.□«sǝwǝbsiz majiralaxma» — yaki «sǝwǝbsiz dǝwalaxma».

31 Zulumhor kixigǝ ⱨǝsǝt ⱪilma,

Uning yol-tǝdbirliridin ⱨeqnemini tallima.[y]

32 Qünki ⱪingƣir yollarni mangidiƣanlar Pǝrwǝrdigarning nǝziridǝ yirginqliktur,

Lekin Uning sirdax dostluⱪi durus yaxawatⱪan adǝmgǝ tǝǝlluⱪtur.[z]

33 Pǝrwǝrdigarning lǝniti rǝzillik ⱪilƣuqining ɵyididur,

Lekin U ⱨǝⱪⱪaniy adǝmning ɵyigǝ bǝht ata ⱪilur.[aa]

34 Bǝrⱨǝⱪ, mǝshirǝ ⱪilƣuqilarni U mǝshirǝ ⱪilidu,

Lekin kiqik peil kixilǝrgǝ xǝpⱪǝt kɵrsitidu.[bb]

35 Danalar xɵⱨrǝtkǝ warisliⱪ ⱪilidu,

Lekin ⱨamaⱪǝtlǝr rǝswa ⱪilinidu.□«Lekin ⱨamaⱪǝtlǝr rǝswa ⱪilinidu» — yaki «Lekin U (Huda) ⱨamaⱪǝtlǝrni nomusⱪa ⱪalduridu» (ibraniy tilida kinayǝ ixlitip, ahirⱪi sɵz «kɵtürülidu» bolidu).