1 Katta ǝrbab bilǝn ⱨǝmdastihan bolsang,

Aldingdiki kim ikǝnlikini obdan oylan.

2 Ixtiying yaman bolsa,

Gelingƣa piqaⱪ tǝnglǝp turƣandǝk ɵzüngni tart.□«Ɵzüngni tart» — ibraniy tilida «gelingƣa piqaⱪ tǝnglǝp tur» degǝn sɵz bilǝn ipadilinidu.

3 Uning nazunemǝtlirini tama ⱪilma,

Ular adǝm aldaydiƣan tamaⱪlardur.

4 Bay bolimǝn dǝp ɵzüngni upratma;

Ɵzüngning zeⱨningni bu ixⱪa ⱪaratma.□«Ɵzüngning zeⱨningni bu ixⱪa ⱪaratma» — baxⱪa birhil tǝrjimisi: «Ɵz ǝⱪlingdin qekinip ɵzüngni tart». 3:5-ayǝtni kɵrüng.

5 Bayliⱪlarƣa kɵz tikixing bilǝnla, ular yoⱪ bolidu;

Pul-mal dǝrwǝⱪǝ ɵzigǝ ⱪanat yasap,

Huddi bürküttǝk asmanƣa uqup ketǝr.

6 Aq kɵzning nenini yemǝ,

Uning esil nazunemǝtlirini tama ⱪilma;

7 Qünki uning kɵngli ⱪandaⱪ bolƣandǝk, ɵzimu xundaⱪ.

U aƣzida: — Ⱪeni, alsila, iqsilǝ! — desimu,

Biraⱪ kɵnglidǝ seni oyliƣini yoⱪ.

8 Yegǝn bir yutum taamnimu ⱪusuwetisǝn,

Uningƣa ⱪilƣan qirayliⱪ sɵzliringmu bikarƣa kǝtkǝn bolidu.

9 Əhmǝⱪⱪǝ yol kɵrsitip salma,

Qünki u ǝⱪil sɵzliringni kɵzgǝ ilmas.[c]

10 Ⱪǝdimdǝ bekitkǝn yǝrning pasil taxlirini yɵtkimǝ,

Yetimlarning etizliriƣimu ayaƣ basma;[d]

11 Qünki ularning Ⱨǝmjǝmǝt-Ⱪutⱪuzƣuqisi intayin küqlüktur;

U Ɵzi ular üqün üstüngdin dǝwa ⱪilar.□«Ⱨǝmjǝmǝt-Ⱪutⱪuzƣuqi» — kona Israilda «ⱨǝmjǝmǝt-ⱪutⱪuzƣuqi» («goel»)ning ⱪilidiƣan yǝnǝ bir ixi ɵzining jǝmǝtidiki uwal ⱪilinƣanlar üqün adalǝtni yürgüzüx idi. Uning uruⱪ-tuƣⱪanliridin birsi ⱪatilliⱪ ⱪǝstigǝ uqriƣan bolsa, «ⱨǝmjǝmǝt-ⱪutⱪuzƣuqi»ning ⱪatilni ɵltürüx ⱨoⱪuⱪi ⱨǝm wǝzipisi bar idi. Muxu ayǝttiki «ⱨǝmjǝmǝt-ⱪutⱪuzƣuqi» bolsa Huda Ɵzidur, ǝlwǝttǝ.

12 Nǝsiⱨǝtkǝ kɵngül ⱪoy,

Ilim-bilimlǝrgǝ ⱪulaⱪ sal.

13 Balangƣa tǝrbiyǝ berixtin erinmǝ;

Əgǝr tayaⱪ bilǝn ursang, u ɵlüp kǝtmǝydu;[f]

14 Sǝn uni tayaⱪ bilǝn ursang,

Bǝlkim uni tǝⱨtisaradin ⱪutⱪuziwalisǝn.□«tǝⱨtisara» — ɵlgǝnlǝrning roⱨliri baridiƣan jayni kɵrsitidu.

15 I oƣlum, dana bolsang,

Mening ⱪǝlbim ⱪanqǝ hux bolar idi!

16 Aƣzingda orunluⱪ sɵzlǝr bolsa, iq-iqimdin xadlinimǝn.□«iq-iqimdin xadlinimǝn» — ibraniy tilida «bɵrǝklirim xadlinidu».

17 Gunaⱨ sadir ⱪilƣuqilarƣa rǝxk ⱪilma,

Ⱨǝrdaim Pǝrwǝrdigardin ǝyminixtǝ turƣin;[i]

18 Xundaⱪ ⱪilƣiningda jǝzmǝn kɵridiƣan yahxi kününg bolidu,

Arzu-ümiding bikarƣa kǝtmǝs.[j]

19 I oƣlum, sɵzümgǝ ⱪulaⱪ selip dana bol,

Ⱪǝlbingni Hudaning yoliƣa baxliƣin.

20 Mǝyhorlarƣa arilaxma,

Nǝpsi yaman gɵxhorlar bilǝn bardi-kǝldi ⱪilma;[k]

21 Qünki ⱨaraⱪkǝx bilǝn nǝpsi yaman ahirida yoⱪsulluⱪta ⱪalar,

Ƣǝplǝt uyⱪusiƣa patⱪanlarƣa jǝndǝ kiyimni kiygüzǝr.

22 Seni tapⱪan atangning sɵzini angla,

Anang ⱪeriƣanda uningƣa ⱨɵrmǝtsizlik ⱪilma.[l]

23 Ⱨǝⱪiⱪǝtni setiwal,

Uni ⱨǝrgiz setiwǝtmǝ.

Danaliⱪ, tǝrbiyǝ wǝ yorutuluxnimu al.[m]

24 Ⱨǝⱪⱪaniy balining atisi qong huxalliⱪ tapar;

Dana oƣulni tapⱪan atisi uningdin hursǝn bolar.[n]

25 Ata-anangni sɵyündürüp,

Seni tuƣⱪan anangni hux ⱪil.

26 I oƣlum, ⱪǝlbingni manga tapxur;

Kɵzliringmu ⱨayatliⱪ yollirimƣa tikilsun!

27 Qünki paⱨixǝ ayal qongⱪur oridur,

Buzuⱪ yat ayal tar zindandur;[o]

28 Ular ⱪaraⱪqidǝk mɵküwelip,

Insaniyǝt arisidiki wapasizlarni kɵpǝytǝr.

29 Kimdǝ azab bar? Kimdǝ dǝrd-ǝlǝm? Kim jedǝl iqidǝ ⱪalar? Kim nalǝ-pǝryad kɵtürǝr? Kim sǝwǝbsiz yarilinar? Kimning kɵzi ⱪizirip ketǝr?

30 Dǝl xarab üstidǝ uzun olturƣan,

Əbjǝx xarabtin tetixⱪa aldiriƣan mǝyhorlar![p]

31 Xarabning ajayib ⱪizilliⱪiƣa, uning jamdiki julaliⱪiƣa,

Kixining gelidin xundaⱪ siliⱪ ɵtkǝnlikigǝ mǝptun bolup ⱪalma!

32 Ahirida u zǝⱨǝrlik yilandǝk qeⱪiwalidu,

Oⱪ yilandǝk nǝxtirini sanjiydu.

33 Kɵz aldingda ƣǝlitǝ mǝnzirilǝr kɵrünidu,

Aƣzingdin ⱪalaymiⱪan sɵzlǝr qiⱪidu. □«ƣǝlitǝ mǝnzirilǝr kɵrünidu» — yaki «ƣǝlitǝ ayallar kɵrünidu».

34 Huddi dengiz-okyanlarda lǝylǝp ⱪalƣandǝk,

Yǝlkǝnlik kemining moma yaƣiqi üstidǝ yatⱪandǝk bolisǝn.

35 Sǝn qoⱪum: — Birsi meni urdi, lekin mǝn yarilanmidim!

Birsi meni tayaⱪ bilǝn urdi, biraⱪ aƣriⱪini sǝzmidim!» — dǝysǝn.

Biraⱪ sǝn yǝnǝ: «Ⱨoxumƣa kǝlsǝmla, mǝn yǝnila xarabni izdǝymǝn! — dǝysǝn.