1 Kɵngüldiki niyǝtlǝr insanƣa tǝwǝdur;

Biraⱪ tilning jawabi Pǝrwǝrdigarning ilkididur.[a]

2 Insan ɵzining ⱨǝmmǝ ⱪilƣan ixini pak dǝp bilǝr;

Lekin ⱪǝlbdiki niyǝtlǝrni Pǝrwǝrdigar taraziƣa selip tartip kɵrǝr.□«ⱪǝlbdiki niyǝtlǝr» — ibraniy tilida «(adǝmlǝrning) roⱨliri» deyilidu.  [c]

3 Niyǝt ⱪilƣan ixliringni Pǝrwǝrdigarƣa tapxurƣin,

Xundaⱪ ⱪilƣanda pilanliring pixip qiⱪar.[d]

4 Pǝrwǝrdigar barliⱪ mǝwjudiyǝtning ⱨǝrbirini mǝlum mǝⱪsǝt bilǝn apiridǝ ⱪilƣan;

Ⱨǝtta yamanlarnimu balayi’apǝt küni üqün yaratⱪandur.[e]

5 Tǝkǝbburluⱪⱪa tolƣan kɵngüllǝrning ⱨǝrbiri Pǝrwǝrdigarƣa yirginqliktur;

Ⱪol tutuxup birlǝxsimu, jazasiz ⱪalmas.□«ⱪol tutuxup birlǝxsimu,...» — baxⱪa birhil tǝrjimisi: «xubⱨisizki,...».  [g]

6 Muⱨǝbbǝt-xǝpⱪǝt wǝ ⱨǝⱪiⱪǝt bilǝn gunaⱨlar kafarǝt ⱪilinip yepilar;

Pǝrwǝrdigardin ǝyminix adǝmlǝrni yamanliⱪtin haliy ⱪilar.□«...gunaⱨlar kafarǝt ⱪilinip yepilar» — Tǝwrat dǝwridǝ, gunaⱨlar ⱪurbanliⱪlar arⱪiliⱪ «yepilip kǝqürüm ⱪilindi» (yǝni, «kafarǝt ⱪilindi»). Injil dǝwrigǝ kǝlgǝndila, gunaⱨlar «elip taxlandi» (mǝsilǝn, «Yuⱨ.» 1:29).

7 Adǝmning ixliri Pǝrwǝrdigarni hursǝn ⱪilsa,

U ⱨǝtta düxmǝnlirinimu uning bilǝn inaⱪlaxturar.

8 Ⱨalal alƣan az,

Ⱨaram alƣan kɵptin ǝwzǝldur.[i]

9 Insan kɵnglidǝ ɵz yolini tohtitar;

Əmma ⱪǝdǝmlirini toƣrilaydiƣan Pǝrwǝrdigardur.

10 Ⱨǝtta padixaⱨning lǝwlirigǝ ⱪaritip ǝpsun oⱪulsimu,

Uning aƣzi toƣra ⱨɵkümdin qǝtnimǝs.□«Ⱨǝtta padixaⱨning lǝwlirigǝ ⱪaritip ǝpsun oⱪulsimu, uning aƣzi toƣra ⱨɵkümdin qǝtnimǝs» — yǝnǝ ikki hil tǝrjimisi bar: (1) «Padixaⱨning lǝwliridǝ Pǝrwǝrdigarning wǝⱨiyi bolsa, uning aƣzi toƣra ⱨɵkümdin qǝtnimǝs»; (2) «Padixaⱨning lǝwliri wǝⱨiygǝ ⱪarap sɵzlǝydu; uning aƣzi toƣra ⱨɵkümdin qǝtnimǝsliki kerǝk».

11 Adil taraza-mizanlar Pǝrwǝrdigarƣa hastur;

Taraza taxlirining ⱨǝmmisini U yasiƣandur.[k]

12 Padixaⱨ rǝzillik ⱪilsa yirginqliktur,

Qünki tǝht ⱨǝⱪⱪaniyǝt bilǝnla mǝⱨkǝm turar.

13 Ⱨǝⱪⱪaniy sɵzligǝn lǝwlǝr padixaⱨlarning hursǝnlikidur;

Ular durus sɵzligüqilǝrni yahxi kɵrǝr.

14 Padixaⱨning ⱪǝⱨri goya ɵlümning ǝlqisidur;

Biraⱪ dana kixi uning ƣǝzipini tinqlandurar.[l]

15 Padixaⱨning qirayining nuri kixigǝ jan kirgüzǝr;

Uning xǝpⱪiti waⱪtida yaƣⱪan «keyinki yamƣur»dur.□«Uning (padixaⱨning) xǝpⱪiti waⱪtida yaƣⱪan «keyinki yamƣur»dur» — ibraniy tilida: «Uning (padixaⱨning) xǝpⱪiti «keyinki yamƣurlar»ni ǝpkǝlgǝn buluttur». «Keyinki yamƣurlar» Israilda 3-ayda yeƣip, ǝtiyazliⱪ ziraǝtlǝrni pixuruxtǝk ⱨalⱪiliⱪ rolni oynaydu. Xunga ⱨǝrbir deⱨⱪan «keyinki yamƣur»ƣa tǝxnadur, ular uni bǝk ⱪǝdirlǝydu.  [n]

16 Danaliⱪ elix altun elixtin nǝⱪǝdǝr ǝwzǝldur;

Yorutuluxni tallax kümüxni tallaxtin xunqǝ üstündur![o]

17 Durus adǝmning egiz kɵtürülgǝn yoli yamanliⱪtin ayrilixtur;

Ɵz yoliƣa eⱨtiyat ⱪilƣan kixi jenini saⱪlap ⱪalar.

18 Mǝƣrurluⱪ ⱨalak boluxtin awwal kelǝr,

Tǝkǝbburluⱪ yiⱪilixtin awwal kelǝr.[p]

19 Kǝmtǝr bolup miskinlǝr bilǝn bardi-kǝldidǝ bolux,

Tǝkǝbburlar bilǝn ⱨaram mal bɵlüxkǝndin ǝwzǝldur.

20 Kimki ixni pǝm-parasǝt bilǝn ⱪilsa payda tapar;

Pǝrwǝrdigarƣa tayanƣan bolsa, bǝht-saadǝt kɵrǝr.□«Kimki ixni pǝm-parasǝt bilǝn ⱪilsa payda tapar» — yaki «nǝsiⱨǝt sɵzigǝ kɵngül ⱪoyƣan payda tapar».  [r]

21 Kɵngli dana kixi sǝgǝk atilar;

Yeⱪimliⱪ sɵzlǝr adǝmlǝrning bilimini axurar.

22 Pǝm-parasǝt ɵzigǝ igǝ bolƣanlarƣa ⱨayatliⱪning buliⱪidur;

Əⱪilsizlǝrgǝ tǝlim bǝrmǝkning ɵzi ǝⱪilsizliktur.[s]

23 Aⱪilanǝ kixining ⱪǝlbi aƣzidin ǝⱪil qiⱪirar;

Uning lǝwzigǝ bilimni ziyadǝ ⱪilar.

24 Yeⱪimliⱪ sɵzlǝr goya ⱨǝsǝldur;

Kɵngüllǝrni hux ⱪilip tǝngǝ dawadur.

25 Adǝm balisiƣa toƣridǝk kɵrünidiƣan bir yol bar,

Lekin aⱪiwiti ⱨalakǝtkǝ baridiƣan yollardur.[t]

26 Ixligüqining ixtiyi uni ixⱪa salar;

Uning ⱪarni uningƣa ⱨǝydǝkqilik ⱪilar.□«Uning ⱪarni uningƣa ⱨǝydǝkqilik ⱪilar» — ibraniy tilida «Uning aƣzi uningƣa ⱨǝydǝkqilik ⱪilar».

27 Muttǝⱨǝm kixi yaman gǝpni kolap yürǝr;

Uning lǝwliri lawuldap turƣan otⱪa ohxar.□«Muttǝⱨǝm kixi» — ibraniy tilida «Belialning oƣli» deyilidu. «Belial»ning mǝnisi «ǝrzimǝs» degǝnlik bolup, bǝlkim Iblisni kɵrsitidu.  [w]

28 Əgri adǝm jedǝl-majira tuƣdurƣuqidur;

Ƣǝywǝtqi yeⱪin dostlarni ayriwetǝr.[x]

29 Zorawan kixi yeⱪin adimini azdurar;

Uni yaman yolƣa baxlap kirǝr.□«Uni yaman yolƣa baxlap kirǝr» — ibraniy tilida «Uni yahxi ǝmǝs bir yolƣa baxlap kirǝr».

30 Kɵzini yumuwalƣan kixi yaman niyǝtni oylar;

Lewini qixligǝn kixi yamanliⱪⱪa tǝyyardur.□«Kɵzini yumuwalƣan kixi» — yaki «kɵz ⱪisⱪuqi kixi», «kɵzini qimildatⱪuqi adǝm».  [aa]

31 Ⱨǝⱪⱪaniyǝt yolida aⱪarƣan qaq,

Adǝmning xɵⱨrǝt tajidur.□«Ⱨǝⱪⱪaniyǝt yolida aⱪarƣan qaq, adǝmning xɵⱨrǝt tajidur» — ayǝtning baxⱪa birhil tǝrjimisi: «Aⱪ qaq bolsa adǝmning xɵⱨrǝt tajidur; u ⱨǝⱪⱪaniyǝt yolida pǝyda bolidu».

32 Asan aqqiⱪlimaydiƣan kixi palwandin ǝwzǝldur;

Ɵzini tutuwalƣan xǝⱨǝr alƣandinmu üstündur.□«Ɵzini tutuwalƣan» — ibraniy tilida: «Ɵz roⱨini idarǝ ⱪilidiƣan» degǝn sɵzlǝr bilǝn ipadilinidu.

33 Qǝk etǝkkǝ taxlanƣini bilǝn,

Lekin nǝtijisi pütünlǝy Pǝrwǝrdigardindur.