1 Yunus beliⱪning ⱪarnida turup Pǝrwǝrdigarƣa mundaⱪ dua ⱪildi: —

2 «Mǝn dǝrd-ǝlimimdin Pǝrwǝrdigarƣa pǝryad kɵtürdum,

U manga ijabǝt ⱪildi.

Mǝn tǝⱨtisaraning tǝktidin pǝryad ⱪildim,

Sǝn awazimƣa ⱪulaⱪ salding.□«Tǝⱨtisara» — (ibraniy tilida «xeol») «yǝr astidiki saray» (yǝni, «tǝkt sarayi»), ɵlgǝnlǝrning roⱨliri baridiƣan, ⱪiyamǝt künini kütidiƣan jayni kɵrsitidu. Yunus ɵzini ɵlüp, tǝⱨtisaraƣa qüxkǝndǝk ⱨes ⱪilidu. Yǝnǝ bir mumkinqiliki barki, u beliⱪ ⱪarnida ⱨǝⱪiⱪǝtǝn ɵlgǝn, andin Huda uni (beliⱪning aƣzidin qiⱪⱪanda) tirildürgǝn.  [b]

3 Qünki Sǝn meni dengiz tǝktigǝ, dengiz ⱪarniƣa taxliwǝtting,

Kǝlkün eⱪinliri meni arisiƣa eliwaldi,

Sening barliⱪ dolⱪunliring ⱨǝm ɵrkǝxliring üstümdin ɵtüp kǝtti;[c]

4 Wǝ mǝn: «Mǝn nǝziringdin taxliwetilgǝnmǝn;

Biraⱪ mǝn yǝnila muⱪǝddǝs ibadǝthanangƣa ⱪarap ümid bilǝn tǝlmürimǝn» — dedim.□«Biraⱪ mǝn ... tǝlmürimǝn» — baxka birhil tǝrjimisi: «Mǝn ⱪandaⱪmu muⱪǝddǝs ibadǝthanangƣa ümid bilǝn tǝlmürǝp ⱪaraymǝn?».

5 Sular meni yutup kǝtküdǝk dǝrijidǝ oriwaldi,

Dengiz tǝkti meni ⱪapsiwaldi;

Dengiz qɵpliri beximƣa qirmixiwaldi.

6 Mǝn taƣlarning tǝglirigiqǝ qüxüp kǝttim;

Yǝr-zemin tegidiki taⱪaⱪlar meni ǝbǝdil’ǝbǝdkiqǝ ⱪamap ⱪoydi;

Ⱨalbuki, Sǝn jenimni ⱨang iqidin qiⱪarding, i Pǝrwǝrdigar Hudayim.

7 Jenim iqimdǝ ⱨalidin kǝtkǝndǝ Pǝrwǝrdigarni esimgǝ kǝltürdum,

Duayim Sanga yetip,

Muⱪǝddǝs ibadǝthanangƣa kirip kǝldi.

8 Bimǝnǝ ǝrzimǝs butlarƣa qoⱪunƣanlar ɵzigǝ nesip bolƣan meⱨribanliⱪtin mǝⱨrum bolidu.

9 Biraⱪ mǝn bolsam tǝxǝkkür sadayim bilǝn Sanga ⱪurbanliⱪ ⱪilimǝn;

Mǝn iqkǝn ⱪǝsǝmlirimni Sening aldingda ada ⱪilimǝn.

Nijat-ⱪutⱪuzux Pǝrwǝrdigardindur!»[e]

10 Pǝrwǝrdigar beliⱪⱪa buyrudi, beliⱪ Yunusni ⱪuruⱪluⱪⱪa ⱪǝy ⱪildi.