1 Ayup jawabǝn mundaⱪ dedi: —

2 «Aⱨ, mening dǝrdlik zarlirim tarazida ɵlqǝnsǝ!

Aⱨ, beximƣa qüxkǝn barliⱪ bala-ⱪaza bular bilǝn billǝ tarazilansa!□«... Aⱨ, beximƣa qüxkǝn barliⱪ bala-ⱪaza bular , yǝni dǝrdlik zarlirim bilǝn billǝ tarazilansa!» — Ayupning bu sɵzi: «dǝrdlik zarlirim» wǝ beximƣa qüxkǝn bala-ⱪazalar tarazada selixturulsa, ǝmǝliyǝttǝ mening zarlirimning az ikǝnliki kɵrünidu, degǝn mǝnini ɵz iqigǝ elixi mumkin.

3 Xundaⱪ ⱪilinsa u ⱨazir dengizdiki ⱪumdin eƣir bolup qiⱪidu;

Xuning üqün sɵzlirim tǝlwilǝrqǝ boluwatidu.[b]

4 Qünki Ⱨǝmmigǝ Ⱪadirning oⱪliri manga sanjilip iqimdǝ turuwatidu,

Ularning zǝⱨirini roⱨim iqmǝktǝ,

Tǝngrining wǝⱨimiliri manga ⱪarxi sǝp tüzüp ⱨujum ⱪiliwatidu.□«Ularning zǝⱨirini roⱨim iqmǝktǝ» — yaki, «Ularning zǝⱨǝri roⱨimni yǝp ketidu».  [d]

5 Yawa exǝk ot-qɵp tapⱪanda ⱨangramdu?

Kala bolsa yǝm-hǝxǝk üstidǝ mɵrǝmdu?

6 Tuz bolmisa tǝmsiz nǝrsini yegili bolamdu?

Ham tuhumning eⱪining tǝmi barmu?

7 Jenim ularƣa tǝgsimu sǝskinip ketidu,

Ular manga yirginqlik tamaⱪ bolup tuyulidu.

8 Aⱨ, mening tǝxna bolƣinim kǝlsidi!

Tǝngri intizarimni ijabǝt ⱪilsidi!

9 Aⱨ, Tǝngri meni yanjip taxlisun!

U ⱪolini ⱪoyuwetip jenimni üzüp taxlaxⱪa muwapiⱪ kɵrsidi!

10 Xundaⱪ bolsa, manga tǝsǝlli bolatti,

Ⱨǝtta rǝⱨimsiz aƣriⱪlarda ⱪiynalsammu, xadlinattim;

Qünki Muⱪǝddǝs Bolƣuqining sɵzliridin tanmiƣan bolattim!□«Ⱨǝtta ... xadlinattim; qünki Muⱪǝddǝs Bolƣuqining sɵzliridin tanmiƣan bolattim!» — Ayupning bundaⱪ oylixi: «Əgǝr ⱨazir Huda mening jenimni alsa, mǝn Uningdin yüz ɵrümigǝn mana muxu qaƣdila alsa boptikǝn; biraⱪ bu azab-oⱪubǝtlǝr dawamlaxturulsa, mǝndǝ nemǝ ɵzgirixlǝr bolar, mǝn Hudadin tanimǝnmu ⱪandaⱪ? Xunga yahxisi U ⱨazir meni ǝpkǝtsǝ, ⱪattiⱪ bir zǝrbǝ bilǝn ǝpkǝtsǝ mǝyli» degǝndǝk mǝnini beridu.

11 Mǝndǝ ɵlümni kütküdǝk yǝnǝ ⱪanqilik maƣdur ⱪaldi?

Mening sǝwr-taⱪǝtlik bolup ⱨayatimni uzartiximning nemǝ nǝtijisi bolar?

12 Mening küqüm taxtǝk qingmu?

Mening ǝtlirim mistin yasalƣanmidi?

13 Ɵzümgǝ yardǝm bǝrgüdǝk maƣdurum ⱪalmidi ǝmǝsmu?

Ⱨǝrⱪandaⱪ ǝⱪil-tǝdbir mǝndin ⱪoƣliwetilgǝn ǝmǝsmu?

14 Ümidsizlinip ketiwatⱪan kixigǝ dosti meⱨribanliⱪ kɵrsǝtmiki zɵrürdur;

Bolmisa u Ⱨǝmmigǝ ⱪadirdin ⱪorⱪuxtin waz keqixi mumkin.□«Ümidsizlinip ketiwatⱪan kixigǝ dosti meⱨribanliⱪ kɵrsǝtmiki zɵrürdur; bolmisa ...» — ayǝtning baxⱪa birnǝqqǝ tǝrjimiliri bar. Bularning biri: «Ⱨǝtta u Ⱨǝmmigǝ Ⱪadirdin ⱪorⱪuxtin ayrilƣan bolsimu, ümidsizlinip ketiwatⱪan kixigǝ dosti meⱨribanliⱪ kɵrsǝtmiki zɵrürdur».

15 Biraⱪ buradǝrlirim waⱪitliⱪ «aldamqi eriⱪ» süyidǝk,

Manga ⱨeligǝrlik bilǝn muamilǝ ⱪilmaⱪta;

Ular suliri eⱪip tügigǝn eriⱪⱪa ohxaydu.□«aldamqi eriⱪ» — qɵl bayawanda tuyuⱪsiz eⱪixtin tohtaydiƣan eriⱪ. Yoluqilarning muxundaⱪ eriⱪⱪa ixinixi intayin hǝtǝrlik, ǝlwǝttǝ. 20-21-ayǝtlǝrni kɵrüng.

16 Erigǝn muz suliri eriⱪⱪa kirgǝndǝ ular ⱪaridap ketidu,

Ⱪarlar ularning iqidǝ yoⱪilip ketidu,

17 Ular pǝsilning illixi bilǝn ⱪurup ketidu;

Ⱨawa issip kǝtkǝndǝ, izidin yoⱪilip ketidu.□«Ⱨawa issip kǝtkǝndǝ, izidin yoⱪilip ketidu» — demǝk, ǝng kerǝk bolƣan waⱪitta bu eriⱪlar ƣayib bolidu.

18 Sǝpǝrdaxlar mangƣan yolidin qiⱪip, eriⱪⱪa burulidu;

Ular eriⱪni boylap mengip, qɵldǝ ezip ɵlidu.

19 Temaliⱪ karwanlarmu eriⱪ izdǝp mangdi;

Xebaliⱪ sodigǝrlǝrmu ularƣa ümid bilǝn ⱪaridi;□«Xebaliⱪ sodigǝrlǝrmu ularƣa ümid bilǝn ⱪaridi» — yaki «Xebaliⱪ sodigǝrlǝrmu ularƣa uqraxni ümid ⱪilatti».

20 Biraⱪ ular ixǝnginidin ümidsizlinip nomusta ⱪaldi;

Ular axu yǝrgǝ kelixi bilǝn parakǝndiqilikkǝ uqridi.

21 Mana silǝr ularƣa ohxax manga tayini yoⱪ bolup ⱪaldinglar;

Silǝr ⱪorⱪunqluⱪ bir wǝⱨimini kɵrüpla ⱪorⱪup ketiwatisilǝr.

22 Mǝn silǝrgǝ: «Manga beringlar»,

Yaki: «Manga mal-mülükliringlardin ⱨǝdiyǝ ⱪilinglar?» — degǝnni ⱪaqan dǝp baⱪⱪan?□«Manga mal-mülükliringlardin ⱨǝdiyǝ ⱪilinglar?» — degǝnni ⱪaqan dǝp baⱪⱪan?» — Ayup u dostliriƣa ⱨeqⱪaqan ⱪǝrzdar bolup baⱪmiƣan. U: «Silǝrdin pul yaki mal-mülük kütkinim yoⱪ, silǝrdin kütkinim pǝⱪǝt azraⱪ ⱨesdaxliⱪ yaki meⱨribanliⱪ, halas» demǝkqi.

23 Yaki: «Meni ezitⱪuqining ⱪolidin ⱪutⱪuzunglar!»

Yaki «Zorawanlarning ⱪolidin gɵrügǝ pul bǝrsǝnglar!» dǝp baⱪⱪanmu?

24 Manga ɵgitip ⱪoyunglar, süküt ⱪilimǝn;

Nǝdǝ yoldin qiⱪⱪanliⱪimni manga kɵrsitip beringlar.

25 Toƣra sɵzlǝr nemidegǝn ɵtkür-ⱨǝ!

Biraⱪ ǝyibliringlar zadi nemini ispatliyalaydu?!□«Biraⱪ ǝyibliringlar zadi nemini ispatliyalaydu?» — xu waⱪitⱪiqǝ Ayupning üq dosti arisidin pǝⱪǝt Elifaz sɵz ⱪilƣan. Ayup «ǝyibliringlar» (kɵplük xǝkli) degǝn sɵzi bilǝn ularƣa: «Silǝr yenimƣa kelixtin awwal ǝⱨwalim toƣruluⱪ til biriktürüwalƣan ohxaysilǝr» dǝp puritiwatidu.

26 Ümidsizlǝngǝn kixining gǝpliri ɵtüp ketidiƣan xamaldǝk tursa,

Pǝⱪǝt sɵzlǝrnila ǝyiblimǝkqimusilǝr?□«Ümidsizlǝngǝn kixining gǝpliri ɵtüp ketidiƣan xamaldǝk tursa,...» — Ayup bu gǝpliri bilǝn ɵzümning bǝzi sɵzlirimning ⱨǝddidin exip kǝtkǝnlikini bilimǝn, dǝp etirap ⱪilƣan bolsa kerǝk. Baxⱪa birhil tǝrjimisi: «Silǝr pǝⱪǝt sɵzlǝrnila ǝyiblimǝkqimusilǝr, ümidsizlǝngǝn kixining gǝpliri naⱨayiti ɵtüp ketidiƣan bir xamaldǝkla dǝp ⱪarimaⱪqisilǝr?».

27 Silǝr yetim-yesirlarning üstidǝ qǝk taxlixisilǝr!

Dost-buradiringlar üstidǝ sodilixisilǝr!□«Dost-buradiringlar üstidǝ sodilixisilǝr!» — baxⱪa birhil mǝnisi: «Silǝr dost-buradǝrlǝr üqün ora kolixisilǝr».

28 Əmdi manga yüz turanǝ ⱪarap beⱪinglar;

Aldinglardila yalƣan sɵz ⱪilalamdim?

29 Ɵtünimǝn, boldi ⱪilinglar, gunaⱨ bolmisun;

Rast, ⱪaytidin oylap beⱪinglar,

Qünki ɵzümning toƣriliⱪim tarazida turidu.□«Qünki ɵzümning toƣriliⱪim tarazida turidu» — yaki: «Qünki bu ixta ⱨǝⱪ mǝn tǝrǝptidur».

30 Tilimda hataliⱪ barmu?

Tilim yamanliⱪni zadi tetiyalmasmu?