1 Ayup jawabǝn mundaⱪ dedi: —

2 «Gǝplirimgǝ ⱪulaⱪ selinglar,

Bu silǝrning manga bǝrgǝn «tǝsǝlliliringlar»ning ornida bolsun!

3 Sɵz ⱪiliximƣa yol ⱪoysanglar;

Sɵz ⱪilƣinimdin keyin, yǝnǝ mazaⱪ ⱪiliweringlar!

4 Mening xikayitim bolsa, insanƣa ⱪaritiliwatamdu?

Roⱨim ⱪandaⱪmu bitaⱪǝt bolmisun?

5 Manga obdan ⱪaranglarqu? Silǝr qoⱪum ⱨǝyran ⱪalisilǝr,

Ⱪolunglar bilǝn aƣzinglarni etiwalisilǝr.

6 Mǝn bu ixlar üstidǝ oylansamla, wǝⱨimigǝ qɵmimǝn,

Pütün ǝtlirimni titrǝk basidu.□«Mǝn bu ixlar üstidǝ oylansamla, wǝⱨimigǝ qɵmimǝn, pütün ǝtlirimni titrǝk basidu» — Ayupning bundaⱪ ⱪorⱪup ketixi uning tɵwǝndiki sɵzliri bilǝn qüxǝndürülidu. Ayup taki ɵzini palakǝt basⱪanƣa ⱪǝdǝr Hudani Ⱨǝmmigǝ Ⱪadir, pütünlǝy adil ⱨǝm pütünlǝy meⱨriban dǝp ixinip kǝlgǝnidi. Biraⱪ u ǝmdiliktǝ baxⱪa bir ⱪorⱪunqluⱪ eⱨtimalliⱪⱪa yüzlinixkǝ mǝjbur boluwatatti. Huda rasttinla adalǝtlik, rasttinla yahximu? Jaⱨandiki bǝzi ǝⱨwallar buningƣa tǝtür guwaⱨliⱪ beriwatⱪandǝk ⱪilatti. Yaman adǝmlǝr beyip kitiwatidu, durus adǝmlǝr eziliwatidu. Huda bu ixlarƣa pisǝnt ⱪilmamdu? U ǝslidǝ tǝsǝwwur ⱪilmiƣan bu eⱨtimalliⱪlar uni ⱨazir intayin ⱪorⱪitiwatatti.

7 Nemixⱪa yamanlar yaxiweridu,

Uzun ɵmür kɵridu,

Ⱨǝtta zor küq-ⱨoⱪuⱪluⱪ bolidu?■Zǝb. 17:9-12; 73:12; Yǝr. 12:1; Ⱨab. 1:16

8 Ularning nǝsli ɵz aldida,

Pǝrzǝntliri kɵz aldida mǝzmut ɵsidu,□«Ularning , yǝni yamanlarning nǝsli ɵz aldida, pǝrzǝntliri kɵz aldida mǝzmut ɵsidu» — Ayup Zofarning baya ⱪilƣan sɵzlirini hulasǝ ⱪilip, ularƣa rǝddiyǝ beridu; yamanlar yoⱪalmaydu, ularning pǝrzǝntliri «Ɵz bayliⱪlirini miskinlǝrgǝ ⱪayturidu» ǝmǝs, bǝlki ular ɵz aldiƣa rawaj tapidu.

9 Ularning ɵyliri wǝⱨimidin aman turidu,

Tǝngrining tayiⱪi ularning üstigǝ tǝgmǝydu.

10 Ularning kaliliri jüplǝnsǝ uruⱪlimay ⱪalmaydu,

Iniki mozaylaydu,

Moziyinimu taxlimaydu.

11 Rǝzillǝr kiqik balilirini ⱪoy padisidǝk talaƣa qiⱪiriweridu,

Ularning pǝrzǝntliri taⱪlap-sǝkrǝp ussul oynap yüridu.

12 Ular dap ⱨǝm qiltarƣa tǝngkǝx ⱪilidu,

Ular nǝyning awazidin xadlinidu.

13 Ular künlirini awatqiliⱪ iqidǝ ɵtküzidu,

Andin kɵzni yumup aqⱪuqila tǝⱨtisaraƣa qüxüp ketidu.□«Ular künlirini awatqiliⱪ iqidǝ ɵtküzidu, andin kɵzni yumup aqⱪuqila tǝⱨtisaraƣa qüxüp ketidu» — Ayup bundaⱪ yamanlar ɵmürwayǝt azadiliktǝ yaxiƣandin keyin ⱨeq azablanmay, ⱨeq jazalanmay dunyadin ketidu, dǝwatidu. «Andin kɵzni yumup aqⱪuqila tǝⱨtisaraƣa qüxüp ketidu» degǝnning baxⱪa birhil tǝrjimisi: «Ular hatirjǝmliktǝ tǝⱨtisaraƣa qüxidu».

14 Ⱨǝm ular Tǝngrigǝ: «Bizdin neri bol,

Bizning yolliring bilǝn tonuxⱪimiz yoⱪtur!» — dǝydu,■Ayup 22:17

15 — «Ⱨǝmmigǝ Ⱪadirning hizmitidǝ boluxning ǝrzigüdǝk nǝri bardu?

Uningƣa dua ⱪilsaⱪ bizgǝ nemǝ payda bolsun?!».■Mis. 5:2; Mal. 3:14

16 Ⱪaranglar, ularning bǝhti ɵz ⱪolida ǝmǝsmu?

Biraⱪ yamanlarning nǝsiⱨiti mǝndin neri bolsun!□«Ⱪaranglar, ularning bǝhti ɵz ⱪolida ǝmǝsmu?» — baxⱪa bir hil tǝrjimisi: «Ⱪaranglar, ularning awatliⱪi ɵz ⱪoli bilǝn kǝlmǝs» (awatliⱪi Hudadin kǝlgǝn, demǝkqi).  ■Ayup 22:18

17 Yamanlarning qiriƣi ⱪanqǝ ⱪetim ɵqidu?

Ularni ɵzlirigǝ layiⱪ külpǝt basamdu?

Huda ƣǝzipidin ularƣa dǝrdlǝrni bɵlüp berǝmdu?■Ayup 20:29; Zǝb. 11:5-6

18 Ular xamal aldidiki engizƣa ohxax,

Ⱪara ⱪuyun uqurup ketidiƣan pahalƣa ohxaxla yoⱪamdu?

19 Tǝngri uning ⱪǝbiⱨlikini baliliriƣa qüxürüxkǝ ⱪalduramdu?

Huda bu jazani uning ɵzigǝ bǝrsun, uning ɵzi buni tetisun!

20 Ɵzining ⱨalakitini ɵz kɵzi bilǝn kɵrsun;

Ɵzi Ⱨǝmmigǝ Ⱪadirning ⱪǝⱨrini tetisun!□«Ⱨǝmmigǝ Ⱪadirning ⱪǝⱨrini tetisun!» — ibraniy tilida «Ⱨǝmmigǝ Ⱪadirning ⱪǝⱨrini iqsun!».

21 Qünki uning bekitilgǝn yil-ayliri tügigǝndin keyin,

U ⱪandaⱪmu yǝnǝ ɵz ɵydikiliridin ⱨuzur-ⱨalawǝt alalisun?

22 Tǝngri kattilarning üstidinmu ⱨɵküm ⱪilƣandin keyin,

Uningƣa bilim ɵgitǝlǝydiƣan adǝm barmidur?!□«kattilar» — ibraniy tilida «aliylar». Bǝlkim muxu yǝrdǝ pǝrixtilǝrni kɵrsitixi mumkin. «Uningƣa bilim ɵgitǝlǝydiƣan adǝm barmidur?!» — Ayup ularning «Yamanlar tezla jazalinidu» degǝnlirining natoƣriliⱪini ispatliƣanidi. Biraⱪ u ⱨazir: «Silǝrning bu sɵzliringlarda qing turiwelixinglar «Huda bizning pikrimizni anglap andin bu ixlarni xundaⱪ orunlaxturuxi kerǝk» degǝnlikkǝ barawǝr» demǝkqi.  ■Yǝx. 40:13; Rim. 11:34; 1Kor. 2:16

23 Birsi saⱪ-salamǝt, pütünlǝy ƣǝm-ǝndixsiz, azadiliktǝ yilliri toxⱪanda ɵlidu;

24 Beⱪinliri süt bilǝn semiz bolidu,

Ustihanlirining yiliki heli nǝm turidu.

25 Yǝnǝ birsi bolsa aqqiⱪ armanda tügǝp ketidu;

U ⱨeqⱪandaⱪ raⱨǝt-paraƣǝt kɵrmigǝn.

26 Ular bilǝn billǝ topa-qangda tǝng yatidu,

Ⱪurutlar ularƣa qaplixidu.■Ayup 17:14

27 — Mana, silǝrning nemini oylawatⱪanliⱪinglarni,

Meni ⱪarilax niyǝtliringlarni bilimǝn.□«... silǝrning nemini oylawatⱪanliⱪinglarni, meni ⱪarilax niyǝtliringlarni bilimǝn» — dostlirining sɵzlirining kɵpinqisi daritma gǝp; biraⱪ, heli roxǝnki, bu yǝrdǝ Ayupⱪa ⱪaritip ⱨujum ⱪilinidu.

28 Qünki silǝr mǝndin: «Esilzadining ɵyi nǝgǝ kǝtkǝn?

Rǝzillǝrning turƣan qedirliri nǝdidur?» dǝp sorawatisilǝr.□«Silǝr mǝndin: «Esilzadining ɵyi nǝgǝ kǝtkǝn?» dǝp sorawatisilǝr» — ularning muxu «esilzadǝ» degini, xübⱨisizki, Ayupni kɵrsitidu. «Silǝr mǝndin: «... Rǝzillǝrning turƣan qedirliri nǝdidur?» dǝp sorawatisilǝr» — Ayup yǝnǝ muxu yǝrdǝ: Silǝrning bu soalliringlar meni daritip kɵrsitidiƣanliⱪini bilimǝn, dǝwatidu.

29 Silǝr yoluqilardin xuni sorimidinglarmu?

Ularning xu bayanliriƣa kɵngül ⱪoymidinglarmu?□«Silǝr yoluqilardin xuni sorimidinglarmu?» — Zofar: «Iplaslarning huxalliⱪi birdǝmliktur», xundaⱪla bu ix «yǝr yüzidǝ Adǝm’atimiz apiridǝ bolƣandin beri» ⱨǝmmǝ adǝmgǝ ayan — degǝn. Biraⱪ Ayup yiraⱪ yurtlarƣa berip kǝlgǝnlǝrning bayanliri baxⱪiqǝ, dǝydu.

30 Demǝk, «Yaman adǝm palakǝt künidin saⱪlinip ⱪalidu,

Ular ƣǝzǝp künidin ⱪutulup ⱪalidu!» — dǝydu.■Pǝnd. 16:4

31 Kim rǝzilning tutⱪan yolini yüz turanǝ ǝyiblǝydu?

Kim uningƣa ɵz ⱪilmixi üqün tegixlik jazasini yegüzidu?

32 Əksiqǝ, u ⱨǝywǝt bilǝn yǝrlikigǝ kɵtürüp mengilidu,

Uning ⱪǝbrisi kɵzǝt astida turidu.

33 Jilƣining qalmiliri uningƣa tatliⱪ bilinidu;

Uning aldidimu sansiz adǝmlǝr kǝtkǝndǝk,

Uning kǝynidinmu barliⱪ adǝmlǝr ǝgixip baridu.

34 Silǝr nemixⱪa manga ⱪuruⱪ gǝp bilǝn tǝsǝlli bǝrmǝkqi?

Silǝrning jawabliringlarda pǝⱪǝt sahtiliⱪla tepilidu! □«Silǝr nemixⱪa manga ⱪuruⱪ gǝp bilǝn tǝsǝlli bǝrmǝkqi? Silǝr yoluqilardin xuni sorimidinglarmu?» — oⱪurmǝnlǝr bayⱪisunki, Ayupning üq dosti awwal sǝl eƣir-besiⱪraⱪ sɵz ⱪilidu, andin gǝp ⱪilƣanseri aqqiⱪ ⱨǝm tǝlwǝlik bilǝn sɵzlǝydu; Ayup bolsa awwal intayin tǝlwilǝrqǝ wǝ jiddiyliⱪta sɵz ⱪilƣan bolsimu, lekin uning sɵzliri barƣanseri tǝmkin bolidu.