Zebur 91

91-küy •••• Xudaning herxil yamanliqtin, jin-sheytanlardin qoghdishi

1 Eng Aliy Bolghuchining mexpiy jayida turghuchi,

Hemmige qadirning sayiside aramxuda yashaydu.

2 Men Perwerdigarni: —

«Méning bashpanahim, Méning qorghinim;

Méning Xudayim, Uninggha tayinimen» — deymen.

3 Berheq, U qiltaqchining toziqidin séni qutulduridu,

Shum bala-qazadin hem xalas étidu. [a]

4 U peyliri bilen séni yapidu;

Qanatliri astida panah tapisen;

Uning heqiqiti sanga qalqan hem istihkamdur. [b]

5 Sen ne kéchidiki wehimidin,

Ne kündüzi uchuwatqan oqtin, [c]

6 Ne qarangghuluqta kezgüchi wabadin,

Ne chüsh waqtida weyranchiliq qilghuchi halakettin qorqmaysen.

7 Séning yéningda mingi yiqilip,

Ong yéqingda on mingi ghulap chüshsimu,

Lékin bala-qaza sanga yéqinlashmaydu.

8 Sen peqet közliring bilen béqip,

Pasiqlargha bérilgen jazani körisen.

9 Perwerdigarni panahim dep bilgining üchün,

Hemmidin Aliy Bolghuchini makan qilghining üchün, ◼

10 Béshinggha héch palaket chüshmeydu,

Wabamu chédiringgha yéqinlashmaydu.

11 U Öz perishtilirige séning heqqingde emr qilidu,

Shuning bilen ular pütkül yolliringda séni saqlaydu. [e]

12 Ayighing tashqa urulup ketmesliki üchün,

Ular séni qollirida kötürüp yüridu. [f]

13 Shir we kobra yilan üstidin bésip ötisen,

Arslan we ejdihani dessep-cheyleysen. [g]

14 «U Manga muhebbitini baghlighanliqi üchün,

Men uni qutuldurimen;

U namimni ten alghini üchün yuqirida saqlaymen.

15 U Manga nida qilidu, Men uninggha jawab bérimen;

Éghir kün uni basqanda uning bilen bille bolimen;

Men uni xalas qilip, izzet-hörmetke érixtürimen.

16 Uzaq ömür bilen uni qanatlendurimen,

Hem nijatliqimni uninggha körsitimen».