1 Neghmichilerning béshigha tapshurulup oqulsun dep, Korahning oghulliri üchün yézilghan «Masqil»: —

I Xuda, öz qulaqlirimiz bilen angliduq,

Atilirimiz bizge bayan qilip,

Öz künliride, yeni qedimki zamanlarda Séning qilghan zor ishliringni uqturghanidi;

2 Sen ata-bowilirimizning aldida Öz qolung bilen yat ellerni qoghliwétip,

Ularning zéminigha ata-bowilirimizni orunlashturdung;

Yat qowmlargha apet chüshürüp, ularni tarqitiwetting.□«Yat qowmlargha apet chüshürüp, ularni (démek, yat ellerni) tarqitiwetting» — bashqa birxil terjimisi: «Yat qowmlargha apet chüshürdung, biraq ularni (démek, öz xelqingni) ronaq tapquzdung».  ■Mis. 15:17; Zeb. 80:9-9

3 Berheq, bowilirimiz zéminni öz qilichi bilen alghini yoq,

Öz biliki bilen özlirini qutquzghinimu yoq;

Bu belki Séning ong qolung, Séning biliking we jamalingning nurining qilghinidur;

Chünki Sen ulardin xursenlik tapting.

4 Sen Özüng méning padishahimdursen, i Xuda,

Sen Yaqup üchün ghelibiler buyrughuchidursen.□«Sen Yaqup üchün ghelibiler buyrughuchidursen» — bu yerde «Yaqup» Israil xelqini körsitidu, elwette.

5 Sen arqiliq biz reqiblirimizni heydiwétimiz;

Naming bilen özimizge qarshi turghanlarni cheyleymiz;

6 Chünki öz oqyayimgha tayanmaymen,

Qilichimmu méni qutquzalmaydu.

7 Chünki Sen bizni reqiblirimizdin qutquzdung,

Bizge öch bolghanlarni yerge qaratting.

8 Xudani kün boyi iptixarlinip maxtaymiz;

Namingni ebedil’ebedgiche medhiyileymiz.

Sélah!

9 Biraq Sen hazir bizni tashlawétip ahanetke qaldurdung;

Qoshunlirimiz bilen jengge bille chiqmaysen. ■Zeb. 60:3; 74:1; 89:38-39; 108:11

10 Sen reqiblirimiz aldida bizni chékindürdüng;

Bizni öchmenlerge xalighanche talan-taraj qildurdung.

11 Soyushqa tapshurulghan qoylardek, bizni ulargha tapshurdung,

Eller arisigha bizni tarqitiwetting.

12 Sen Öz xelqingni bikargha sétiwetting,

Uning qimmitidin Özüng héch béyip ketmiding;

13 Sen bizni qoshna ellerning mesxirisige qaldurghansen;

Etrapimizdikilerge ahanet, zangliq obyékti qildingsen.■Zeb. 79:4; 80:6; Yer. 24:9

14 Sen bizni eller arisida söz-chöchekke qoydungsen,

Yat qowmlar bizge bash chayqiship qarashmaqta.

15-16 Mesxire hem kupurluq éytquchilarning awazi tüpeylidin,

Düshmenler we öch alghuchilar tüpeylidin,

Kün boyi uyatim aldimdin ketmeydu,

Yüzümning nomusi méni chirmiwaldi.

17 Mana bularning hemmisi béshimizgha chüshti;

Biraq biz Séni untumiduq,

Yaki ehdengge héch asiyliq qilmiduq;

18 Qelbimiz héch yanmidi, Sanga sadaqetsizlik qilmiduq,

Qedemlirimiz yolungdin héch ézip ketmidi.

19 Biraq Sen bizni chilböriler makanida ezding,

Bizge ölüm sayisini chaplashturdung.

20 Eger biz Xudayimizning namini untughan bolsaq,

Yaki yat bir ilahqa qol kötürgen bolsaq,

21 Xuda Sen choqum buni sürüshte qilmas idingmu,

Qelbtiki sirlarni bilip turidighan tursang?

22 Biraq Sen tüpeyli biz kün boyi qirilmaqtimiz;

Boghuzlinishni kütüp turghan qoylar kebi hésablanmaqtimiz.■Rim. 8:36

23 Oyghan, i reb! Némishqa uxlap yatisen?

Ornungdin tur, bizni menggüge tashlawetmigeysen!

24 Némishqa yüzüngni bizdin yoshurisen?

Némishqa külpetlirimizge, uchrighan zulumlirimizgha pisent qilmaysen?

25 Qarighina, jénimiz tupraqta béghirlap yüridu;

Ténimiz yerge chaplashti;

26 Ornungdin turup bizge yardemde bolghaysen!

Özüngning özgermes muhebbiting sewebidin,

Bizlerni hörlükke chiqarghaysen!